große klanigkeit
heit nutz i mein blogpost, um eich zu erinnern, doss schon de klanstn sochn a große freid bewirkn kennen. vua ollem sollte man sich des jetzt kurz vua weihnochtn vua augn holtn, bevua man sich vadommt teire geschenke überlegt, de eventuell nit amol so onkemen. oba lests lei weita.
„schaug, hob i da mitgnommen“. und des seit monaten. regelmäßig. imma ans der lieblingsgetränke. und imma aufs neiche gehts herzl auf, man is donkboa und freit sich wie bam erstn mol.
wos gibs bessas, wie leit, de auf an denkn, wenn se wo sein und da wos mitnehmen?
bei jedem neichn mitbringsl wert de wertschätzung nit weniga, eher mehr. es is nie selbstverständlich, dafia imma wieda a klana freidnsprung im herzln drinn. braucht ma kana dazeln, doss es imma lei um de großn geschenke und unglaublich aufwendigen dinge geht. weil wenn i mi schon nit über an soft drink fia unta zwa euro gfrein konn, von herzln: warum soll mir wos ondares donn a freid bereitn kennen? und warum sollt i es donn überhaupt vadiant hom? und es steigt jo a nit de erwartung, doss man des jetzt imma greg. es is ka „i gewöhn mi do so stoak dronn, doss wenn i des nerma hon, spinn i uma.“ es is imma wieda aufs neies a klitzeklana beweis der wertschätzung oder der liebe.
„anfoch so“. mit der intention tuat man des. nit weil man sich am handy wieda mol aufgfiat hot, weil man unfair woa oda dem ondan irgendwie wos beweisen muas. man mocht dem menschn anfoch so a freid, weil er dir jo a anfoch so a lieblingsmensch is. weil in ana partnerschoft, oba a in ana freindschoft geht es jo nit lei um de höhen und tiafn. es geht nit drum, an streit mit geschenken zu mildern, de fehlende zeit mit teiren sochn auszugleichn oda erst donn de beziehung zu schätzen, wenn man wos greg. des sollte jo a „anfoch so“ passian de wertschätzung, liebe und de freid. weil seima uns ehrlich, frischverliebt is a a holba tog im bett luxus pur. do sein drei stund in da therme wie a kurzurlaub und anfoch des zommhuckn reicht da. do muast nit 4 tog wellnessurlaub foan oda fäncy essn gehn: valiebta schmeckt sogoa a toast geila! und des is a anfoch so. sein de anfochen mci dates mit da bestn freindin oft coola wia a grosses event. daham am kuchltisch oft schenare erinnerungen gsommelt wia im club.
es braucht oft decht so wenig fia a erfülltes herzl.
sogoa beim abholen vom fuatgehn hupft man schnell wo eine, um so a saftl aufzutreibn. im kühlschrank steht imma mindestens ans bereit. und bei ana längeren autofoat liegt in da beiforatia schon mindestens a dosele. oda zwa. am bestn is holt wenn bade drauf denkn und sich gegenseitig wos mitnehmen. es is so klan, oba molt da decht imma a lächln auf de lippn. oba nit lei der beschenkte hot a freid, sundan der, der des tuat, hot a guats gefühl. weil er was, wie man dem ondan wos guates tuan konn.
und hjo: wenn du di partout über nix klanes frein konnst, imma mehr willst und eben glott beleidigt bist, wenn da wer nit de welt schenkt und noch 30 sochn: wa mol zeit a bisi mehr donkboakeit zu erlernen hm? und momente sommln zu kennen. mei hasa tipp wie immer: zähl da jedn tog 3 sochn auf, fia de du donkboa bist. oda hol da es 6-mintogebuach oda wos a imma: es is lei oabeit, de du selba mochn muast! Do is a blogpost dazua.
natürlich funktioniat des a mit bliamlen, schokoladen, lieblingssnacks, wos a imma. sogoa wenns a liebesbriafl oda a stan is, warum nit. muas a nix kostn ausa a bisi a zeit, wenn überhaupt? die geste is jo schon so vü mehr wert wia des wissn, des hot jetzt a vermögn gekostet.
und gonz ehrlich: du gregst so ane sochn in jedn gschäft, wo du normalerweise a mindestens amol de woche hinkimmst. es is a fia mi oft de frog, wenn sich wer bluamen wünscht und nie ane greg: de gibs echt zur not oft on da kasse. des hot nix mit ka zeit, sundan mit dem reinen nit wollen zu tuan. just sayin‘. liebesbriaflen schreibn sich a in guat 15 minuten, do is a nix dahinta.
schenen adventsunntog, kiddos 🙂