Präsent sein

ane der schwierigsten dinge auf der gonzen welt is wohl wirklich im HIER UND JETZT leben, denken und a sein. oba es is a so a wichtige soch. menschen lernen nie aus, egal welches olta. manche sein zwoa a bisi lernresistent und ändern sich ungern, oba so stur will i goa nit sein. imma, wenn i wos neichs glernt hab, bin i so stolz auf mi selba, doss es sich eh schon wieda glohnt hot. und wos i grod richtig brav lern: in da gegenwart sein.

wir lieben es, in da vagongenheit zu sein. wos wäre wenn is unsa lieblingsspiel und wie oft homa schon hintagfrogt, warum ma 2015 auf den anen somstog wirklich des uncoole shirt trogn hom miasn. jo de vagongenheit is jo recht cool, bis zu dem punkt wo man feststellt: ah fuck de konn i holt nerma ändern.

de zukunft is aufgregend, weil wir gefühlt OLLE möglichkeiten hom, se zu gestalten. wir kenntn ins auslond gehn, wir kenntn millionen am konto ham, wir kenntn a dritte ausbildung starten, wir kenntn eltern sein, wir kenntn 8 mol gschiedn sein.. wir kennen olles sein und tuan. und des tuat a unser hirn: wir moln uns olles im kepfln aus. zum beispiel der cute typ an der theke, der 3 sätze mit uns gredet hat (ana davon woa: du, mei ex steht do hintn, i geh mol ume.) und dennoch geh ma ham und malen uns aus, wie unsa hochzeit ausschaugn tat. de zukunft konn man sich so bunt ausmoln wie man will und wissts wos: de zukunft wird irgendwann zur gegenwart. und wenn ma so weiter tuan, wer ma a de zukünftige gegenwart mit gedanken an des, wos danoch kimmt, vascheissn. 

lebn tua ma nämlich nit in da vagongenheit oda in da zukunft, sundan im JETZT. und genau des is des ding. so vielen menschen follt es schwa, des JETZT zu genießen, weil se geistig schon beim nächsten wochenende sein oda glott dronn denkn, wie es noch dem bachelor in 3 joa weitergehn soll.. generell is es wichtig visionen und zukunftspläne zu haben JA. bin i voll ba eich. oba es is donn so folsch, wenn man wirklich worauf hinfiebert, des erreicht und glei weiter schaug. und wenn man sich mehr erdet und ons jetzt denkt: is es leben doch schena.

beispiel: dei ex hot an neien menschn on da seite. du zerbrichst da 24/7 den kopf. wie du di oblenkn kenntest? in dem du auf DI SELBA schaugst. nit, wie du in an holben joa drauf bist, sundan WOS DU JETZT TUAN KONNST.

meine tipps, um mehr im jetzt zu sein: (Eventuell klingen de sochn bisi sehr obglutscht, oba es hilft mir und hoffentlich a eich)

• schreib jedn tog 3 sochn auf, fia de du donkboa bist. es konn a da klane schmetterling sein, den du gsegn host: den host du jo HEIT gsegn und host HEIT de freid gspiat.
• mach da a vorfreudeliste für den tag/de woche. i lieb des so. weil jeds mol, wenn i do wos obstreich erleb i de freid a zweites mal. sei es a briaf, den i weggschickt hab, a treffen mit ana freindin. donn schätzt du des, wos du gemacht/erlebt hast, noch a stickl mehr und freist di holt doppelt. ausadem sigst du wos JETZT grod olles so passiert. und es wird di wundan, wie viel schene sochn du erlebst in an tog/ana woche: do muast nit auf de london reise in 4 monat fiaban, wenn du jo morgen dei bf sigst oda heit nachmittag a marmelade einkochst und kostn konnst.
• bewegung. i bleib dabei: um sich selber zu finden/zu erden, muast anfoch dein körper spian. deine muskeln, deine verspannungen, dein ganzen körper. daher beweg di. streck di. dehn di. pilates, yoga, kraftsport, joggen, spazian.. beweg di anfoch.
• pro tipp, den i selber nit soooo special mach, aber es könnte mal wieder so sein: befüll jeden tag a leere seite in an buach. i mach es mit worten, andere zeichnen, malen, basteln: kleben zettel eine, fotos und andere rechnungen/tickets. jeden tag erinnerst di, was du heute erlebt und gemacht hast.

all de dinge zagn da: es is schen, heite erlebt zu ham. und wenn amol a scheiß tag is, du host immer mindestens a soch, fia de du dankbar bist. und wenn dei leere seite a fuck u enthält: sie is befüllt und des a noch ehrlich.

erst wenn man in da gegenwart lebt, lebt man wirklich. du willst doch nit ernsthaft eines tages aufwachen und da denken „hob i olles irgendwie nit so mitgefühlt/erlebt. Hätt i ma lei mehr zeit glossn. hätt i des und des lei mehr genossen.“  lei glückliche leit sein glücklich, weil se des jetzt schätzen

i selba erwisch mi jo a sooft, doss i mein kopf schon wieda in 3-4 monat hob. mei nächster postkartendrop is in planung, welche wandlung werd mei insta noch so machen? ah wenn i ma da viele gedanken mach und de a aufs papier bring, bleib i trotzdem do, im hier und jetzt und gfrei mi. über jedn neuen follower*in, über jede liaba nachricht, über alles, was i bis jetzt gschafft hab. und hjo.

i wünsch eich no an schenen feiertog. genießts den abend IM HIER UND JETZT. bussis.