des minimalste
he i werd definitiv olt. wollt diesen blogpost mit „nit mal es mindeste?“ betiteln, dabei hob i schon an blogpost mit dem namen. es geht ungefähr um es gleiche, lei dezidiata und bessa. da olte blogpost is derwegn lesenswert (sowie holt anfoch jeda von mir) und deshalb gern do lesn.
greg jo glott wieda ganslhaut, wenn i irgendwo zuahea und sätze folln wie „er hat ma heit sogoa gschriebn, viel glück ba da prüfung! volle oag oda??“ oda „sie schreibt ma olle poa stund mol hinta, sie is a 10/10“. und i sitz do dazwischn und beiß ma wieda mol auf de lippn weil i gern sogn tat „najo, wa wohl recht oda?“
verstehts mi nit folsch, i oabeit selba über 40 stund und hob selba nit ständig daweil olls und jedn hintazuschreibn. oba dieses „i loss de person zappln, damit i intressanta bleib“- spiel is SO DERMASSEN UNINTRESSANT! wenn i wen cute find und der ma donn drei tog später auf vier nochrichten ontwoatet, is er zwoa imma no cute oba mein interesse hob i so schnell valoan wie mei geduld beim kochn. (schon wenn i se betritt nämlich ahah). und wenn des jetzt donn es gspusi, f+-mausi oda sogoa partner is: donn is jo sowieso aus mit mein verständnis. wenn i mit wem banonda bin oda holt irgenda obgekappte form davon: werd i wohl der person zruckdaschreiben oda mi dementsprechend mol meldn kennen. do gehts nit um 24/7 kitschige emojis hin und her schiasn, sundan anfoch des kommunizian. „du maus bin jetzt bei freinde, meld mi später“ und donn meldet sich de person später kurz mit an „bin daham. olls guat“ und nit erst am tog danoch und gach mocht man sich suagn. dieses „i meld mi nit, damit de person sich extra gedanken/suagn um mi mocht“ find i übrigens ausa toxisch lei noch scheiße und problematisch, weil de holt nie wast, wie triggernd des fia a person sein konn. und warum will i doss sich wer extra suagn um mi mocht? is des donn a liebesbeweis oda wie?
kema bitte aufhean, normale sochn, de in ana gsundn beziehung oda a freindschoft sich anfoch kern, nit zu romantisian, sundan zu wissn, des hot mit anstand zu tuan??? natürlich soll man imma no dankbar sein, des will i nit sogn. es is und bleibt nit selbstverständlich, doss a beziehung funktoniat, wie se funktioniat und wenn bade a oabeit einesteckn, is des zum wertschätzen. generell kert da partner wertgeschätzt und wer des nit tuat, braucht nit jamman, doss sich des gegenüber jemanden suacht, der diese gwünschte wertschätzung aufbringt! es is nit imma des ondre depate mädel schuld, des gern ins gsichtl von dein freind schaug, sundan des monsta wos ihn daham zommlosst, weil ondre ihn onredn. olta blogpost dazua do.
keine ahnung ob ihr des gscheid dalests, aber a followerin hat ma des mal gschickt, wie i über dieses bare minimum gredet hab. des buach dazua is Lina Mallon. Zweit.nah und werd i ma jetzt a endlich mal kafn.
i bin wie imma ehrlich: i bin a manchmal sehr überroscht, wenn sich jemand korrekt vaholtet und olles so unkompliziat und anfoch funktioniat. i schätz des schon sehr. oba i sig des donn nit als grund, warum i den menschen date oda wos a imma. wenn da grund-onstond nit do is, bin i a nerma do, gonz anfoch. i hob ka daweil an typen zu erziagn und zu zagn, wos sich kert und wos nit. und de daweil sollt kana hobn.
wenn mi wer zu an date einlodet und wirklich nit obsogt, werd i nit freind*innen dazeln „wow er is sogoa zum date erschienen und woa pünktlich!“ des is ka wow, des is anfoch des minimalste, wos er tuan konn. wenn er den aufwand nit betreibt, wern wir zamm a nix weiter mochn. doss er vielleicht komplett obaliab woa, wir lei glocht hom und auf ana wellenlänge sein- des konn i donn dazeln und mi driba gfrein.
wo i a imma de augenvadrahn muas is „ba ihm deaf i sein wie i will!“ Du solltest imma so sein, wie de bist bitte. imma. ob dem ersten treffn oda bessa gsog no davua a beim schreiben: weil jede lüge, de du auftischt, werd fria oda später aufgedeckt. und do muas i wieda mol gegen diese girls schiasn, de sich auf insta SO inszenian, doss i se am see oda in da stodt nit dakenn, weil se erstens 5-20 kilo mehr hobn (wos in erster linie NIT schlimm is. oba so zu tuan als wast du komplett schlonk und du verwendest apps, um schmola zu wiakn versteh i nit, weil i sig jo in echt, doss du a maus bist ohne an loch zwischn de fias. du selba mochst da do wos vua und deafst donn di nit wundan, doss ondre sogn, du bist in echt „festa“). de leit kemen jo irgendwonn anfoch drauf, wie man in echt ausschaug und a wie da charakter ist. mei lieblingsbeispiel aus der netflixserie weihnachten zu hause: sie sog zum typ sie is sportlich und londet bam longlafn und donn im fitte& naja. wie soll denn des bitte gehn? ihr wissts jo e selba: de richtigen leit megn eich wie ihr seids und de bleibn a. do brauchts kane filter, kane großoatign lügn oda so an spaß!
„Er mog mi ungschminkta a!“ äh hallo? wos gehts den kerl überhaupt on in erster linie? ob du jetzt mit full-face-makeup aufschlogst oda ungschminkta sollte goa ka gwicht hobn. de person hot zum akzeptian, doss du so herrichtest, wie du di wohlfühlst. wenn mir ana sog „boah bin froh, doss de di nit so vü schminkst!“ greg er als antwort „i schmink mi bam ausgehn gern und vü und werd di deswegen nit frogn und wenns da nit gfollt, sogs ma holt nit und wenn de es ma sogst, is es ma a egal.“ bitte mädels: ihr seids schen wie ihr seids und wenn ana sog ungschminkta schaugs nit gleich, soll er bessa schaugn, dossa meta gwinnt, der kumpl.
gonz wildes thema: wenn ma wer aklean will, doss da typ es nit grausig findet, doss sie ihre toge hot. äh jo des is nit der jackpot der kerl, sundan des is anfoch so. a kerl, der di „grausig“ findet, weil du deine toge host is glab i nit gonz frisch im kepfln, weil er jo onscheinend auf frauen steht und kaum a frau finden werd, de nit ihre toge hot. und de periode is sowos natürliches, wie schwitzen oda hoawuchs a. und do gibs bitte ka diskussionslage ob des grausig is oda nit weil es es anfoch nit is. punkt aus.
klana reminder: dei partner hot deine sorgn/ängste zum ernstnehmen. dei partner hot da beim redn in de augn zu schaugn und nit aufs handy. dei partner hot amol kompromisse zu mochn, wenns dir wichtig is. no a wichtiga reminder: du selba muast de sochn holt a mochn. oba de sochn sein nit WOW, de sochn kern sich anfoch.
imma wieda sog i eich: a beziehung is vadommt vü oabeit. fia bade. und wer sich schon onstrengen muas „the bare minimum“ einzudaholtn sprich nochn fuatgehn zu schreibn, doss man daham is oda dem partner zu sogn mit wem man uma is: donn is man eindeutig nit fia a beziehung gmocht. (blogpost über jede beziehung is oabeit.)
es is nit zviel verlongt, wenn man den partner frog, wos er grode so tuat und mit wem er uma is. des is nix eifersüchtiges oda kontrollwahn, des kert sich anfoch. i sog donn holt anfoch glei selba „heit moch i wos mit freind*in X“.
puh über des kennt i no sooooo vü schreibn, doss i eventuell an part 2 mol auseklopfn werd oda a nit. was nit. oba lossts eich des mol durchs kepfl gehn, wir lesn uns bold und a gewinnspiel is a grode online gongen 🙂 BUSSIS!