die bestie vom schatzi

hiiiiii. es muas endlich mol der blogpost der blogposts überhaupt auseghaut wern. i bin donkboa, selba NIE des thema erlebt zu habn, obaaaaaa i kenn anfoch zu vü gschichtn/dramen, de onfongen oda a aufhern weil wegen „seina bestn freindin“. grode letztens a tiktok video gsegn mit „red flag.. wenn er a beste freindin hat!“ und i denk ma so: IM ERNST??? DES IS BULLSHIT. 

also wos echte red flags sein, kennts da nachlesn. und a de green flags meinerseits haha. wos i glei zu beginn los werden muas, menschen sein vaschieden. es kann natürlich sein, doss de beste freindin von dem typen richtig a klane snitch is, oba in den meisten fällen is des theater rund um sie a aufgeblasene sache, de man sich selba im kepfln ausmolt. also i wer bade seitn belichten und hjo. am ende seima eventuell gscheida oda nit.

zruck zum tiktok video. i hab des gsegn und de kommentare darunta glesn: „De beste freindin is imma der grund für die trennung!“ „TRUUUUUE!“ „so wahr!“. ok erste frage: wenn andere menschen grund für streit/trennungen sein, ist dann de beziehung sowieso nit de richtige? gonz pragmatisch gsegn is es für mi echt a wunder, warum i in ana beziehung aus zwa leit überhaupt platz schaffe für andere personen, de nit wir zwa san. a beziehung is oabeit, des wiss ma bereits (blogpost hier.)und wenn da max und de lisa an ihrer beziehung arbeiten und sich auf sich gegenseitig konzentrian, is jo ka plotz fia de marie, sei beste freindin oda? weil wenn da max sich da lisa gegenüber korrekt vaholtet, ehrlich sog wos er macht, welche gefühle er fia sie hat und was seine ängste sein und de lisa seine ängste ernst nimmt, diskussionen nit am handy sondern in echt führen will und se sich wirklich aufrichtig zeit fiaranond nehmen: wos soll donn de marie dazwischn funkn kennen? natürlich, wenn da max da lisa sogt, er is fuaßboll zuaschaugn und lieg eigentlich mit seiner bestie im bett: ondres thema. oda wenn de lisa imma drüber locht, doss da max ihr dazelt hot, doss er in da oabeit gmobbt werd. und sie macht sich lächerlich und de marie nimmt sich zeit fia ihn und hert ihn zua. warum is donn de marie a klane hu…?

wissts ihr, wenn man dem partner a korrekter partner gegenüber is und de person eich gegenüber a: braucht man nit de angst haben ersetzt zu werden. da is de beste freindin nix als de beste freindin.

jemanden NIT zu daten, lei weil er a beste freindin hot, wa schon a heftiga bledsinn oda???? weil wer was, vielleicht gehts anfoch guat? warum nit mal so denken. ODA ES IS DA ANFOCH EGAL? de freinde vom partner miasn nit deine sein & se diafn da a egal sein. also so nit negativ gmant sundan neutral. er hot se, du host ka meinung dazua aussa doss se ihm guat tuan und punkt aus. und wenn se ihm nit guat tuan merkt er des e a irgendwonn.

wos i a no a bisi witzig find is imma de angst, dass sich de beste freindin zuabehaun werd. weil sorry oba wenn man den typ schon seit 8 joa kennt und imma wieder haben hätte können, warum donn genau, wenn er valiebt is und glücklich? warum sollte man donn onfongen wen onzusteign? ja, eventuell gibt es diese fälle, oba bitte der fall tritt erst ein, wenns TATSÄCHLICH passiat und nit lei, weil ihr es eich im kepfln einbildets.

jo ihr seids supa schen valiebt in eichan partner und fia eich is er da schenste monn da welt, oba bitte des hast nit, doss ihn jetzt jeda onsteign werd und donn sich einzubilden, de beste freindin steigt ihn on.. natürlich, wenn es tatsächlich passiert und es dafür beweise gibt und erinnerung: meinungen sein kane fakten/beweise, is es a andre sache. dann muss man e mit allen beteiligten quatschen.

a beispiel um es richtig guat zu aklean:

lenia und teo sein a paarle und sei bestie is de ana. und de lenia is eifersüchtig auf der verhältnis von teo und ana. und äußert de eifersucht. oba nit auf de feine englische oat sundan brutal: sie sog zum teo: i oda de ana! und gonz ehrlich, wenn mi des wer frogn tat, i entscheid mi imma gegn de person, de mi zur wahl stellt. weil wie soll des a leben long holtn, wenn man mir meine freinde obsprechn will?? sollte es echt a toxische freindschoft sein, donn werd i des fria oda später e merken, des muas ma nit mei partner aufedruckn. wissts wos i man? und mit der eifersucht druckt de lenia en teo enger zur ana, de ihm de weibliche sicht der lage akleat. mit lenias eifersucht stellt sie sich unta de ana und nit driba, sie gibt da ana mehr wichtigkeit als se in dieser beziehung zwischen lenia und teo vadient hätt und donn wundat se sich, warum da teo geht.

es is nit imma de beste freindin es problem. ehrlich. wenn ihr eich selba nit ausstehts und olle ondan als konkurrenz onsegs, klärts des thema mit eich selba. es is ihr und eichan partner nit fair gegenüber, ängste zu schüren, wo es kan nährboden gibt. und na es is ka grund, nur weil sie zu ihm sogt i hab di lieb, doss sie jetzt glei do dein plotz einnehmen will.

seids ihr nit depat gegenüber, lossts es auf eich zuakemen und tuats nit judgen. gebs ihr a chance. sie will am ende lei es beste fian bestn freind (wenn nit, donn is de freindschoft e nit fias leben, des red i no unten weiter on). es wär nit von ihr korrekt glei über eich zu schimpfen na. oba tuats es selba holt bitte a nit. und jetzt stell da des vua, se woan so long so eng und donn kimt a neie person, is a nit anfoch. des is a a form von liebeskumma, obwohl do des mitfrein gresa sein sollt als olls ondre.

und an alle menschen mit ana bestn freindin, de JEDE neue person in eichan leben schlecht redet, ohne sie zu kennen: vorsicht! des is potentiell schon möglich, doss de person sich selba imma wichtiger nehmen will. und donn is ma lei a froge no im kepfln: warum des als beste freinde bezeichnen? wenn de eich nix vagunnen? des hama am blog 2021 schon mal beredet: toxische freinde. 

was jetzt no zu sagen bleibt: kommunikation. mit der besten freindin und mitn partner. ihr kennts mit jedn über olles redn. und es is anfoch so vü mehr wert, amal gscheid sie auf de thematik anzusprechen.  „was hast du fa problem mit mir??“ um dreie in da fria via snapchat is jetzt nit soooo geil. und wenn ihrgendwer von der partie nit fähig is zum normal reden, is des schon wieda a zeichen, doss man de ganze konstellation überdenken soll. is da partner, der dir nit zuaheat, da richtige? is de beste freindin, de di auseekelt, wirklich a freindin fia ihn und musst du da des geben? und warum hast du als freindin es recht, über de freundschaften des partners zu bestimmen? i bin ma ganz sicher, sehr viele themen und dramen lossn sich bereden ba an kaffee. und ja man kann trotz ana beziehung a freindschaften pflegen. geht wirklich und is a nit so unwichtig. wenn wer sagt i brauch nur mein partner, schen und guat. oba vor allem weil i a optimistische realistin bin: wos wenns aus is? bei ollen klingln miasn „he du i bin des girl, des eich alle aufgeben hat fia den typen, der am ende mir nix geben hat ausa herzschmerz?“ muss man dann de freid*in mit offenen armen begrüßen?

i was, is a bisi viel und is a nit so a anfoches thema. lei will i damit sogn: nit lei de beste freindin is es problem. und a problem selba zu erschaffen is unfair und nochamal: seids offen und wertfrei. es konn a guat gehn. tat i ma wünschen. fia eich olle.