driba hinweg kemen
hi. ewig oft is so a beitrag schon gwünscht woan und i druck mi so gern vua themen, de so groß sein, doss i nit genau was, wie i se schreibn sollt. oba hjo. es werd schon gehn. es soll ums los lossn gehn von an menschen. dieses driba hinwegkemen, wenn man merkt, de zeit zu zweit is jetzt vorbei und so. und na es is nit anfoch, na es reich nit lei an blogpost driba zu lesn und es is a untaschied, ob man wen nüchtern nerma vamisst und ob man wen vamisst, wenn man doch betrunkena ham torkelt.
erstens amol: ihr seids nit de erstn, de jemanden los lossn miasn. ihr werdets iba de person hinwegkemen, a wenn ihr ma des heit no nit glabs, oba es stimmt. und es muas nit morgn passian und a nit in zwa monat, es konn holt a länger dauern und des is ok. gfährlich is sowieso imma des, wenn man noch wenigen wochen sog „i bin driba hinweg!“ hahahahahaha dazel des bitte deina oma, nit mal de guate seele glabt da des. und im enddeffekt is es mir jo recht herzlich wuascht, wenn ma wer sog „i blea der person nerma noch“ und sie liagt mi on. weil de person sich selba onliagt und sie muas jo selba mit sich alan liegn gehn und damit kloa kemen. wissts wos i man?
punkt ans: nit de zeit werd de wundn alan heilen (blogpost DO) und a nit de ondre person is dafia zuaständig. dieses abschließen konnst lei du selba mochn/erledigen. awoat da nit, doss de person da an grund gibt, doss de endgültig driba hinweg kimst. so quasi dieses „wenn er jetzt echt a ondre küsst, gib i auf“ NA TUA DA NIT SELBA WEH, SCHAUG LIABA WEG WENN ER SOWOS TUAT. gib da selba millionen gründe, warums bessa so is und doss es a ohne de person geht. es is am ende, a wenns a trennung zwischn zwa leit woa, DEI kaffee und du bist dafia zuaständig.
punkt zwa: es is a schon mol ohne de person gongen. und olta des is so a gedonkn-watschn eigentlich. oba es stimmt anfoch. es werd schon wieda wern und es werd ohne de person gehn, weils davua a ohne sie gongen is. du host vua senen a leben ohne se ghobt und donn host holt jetzt wieda es leben ohne se. es klingt echt depat, wenn i des so obatipp, oba stimmen tuats anfoch. und du woast glücklich und a gonzes ohne se, also warum solltest danoch des nerma sein? kloa is es herzl grode ongeknackst, oba des heilt schon wieda zamm. mit bisi erdbeer-shots, bisi dancen, bisi eis essn, bisi liebesfilme schaugn, bisi leben leben. i sogs imma wieda: a partner is jo nit dei zweite hälfte, sundan nur a PLUS in dein leben. du solltest imma vollkommen ohne an ondan menschen sein, weil erst donn bist bereit fia a beziehung.
punkt drei: es lieben di ondre menschen. isso. und schwöre eich, darüber schreib i e bold, noch ana trennung is es eigentlich anfoch lei schen, zu segn, wer do is. i hobs glab i schon dazelt, oda a nit. i bin jo eher still und heimlich hamgezogn und kaum hob i es den engsten dazelt: is jedn tog wer bei mein kuchltisch/bettrond gsessn. freindinnen hom mi zum SPAZIAN GEHN einglodn, wir hom mädelsabende gmocht, freind hom mit mir gefacetimed und a so a moment, wo i echt tränen in de augn ghobt hob, drei paarlen hom mi mitgezaht zum essen und hom ma KEINE SEKUNDE LONG es gefühl geben, i bin da einsame single der runde, sundan anfoch a teil der gääääng. ma wissts ihr: es geht nit um de vollidioten, de eich nit im leben haben wollen, sundan um de lieblingsmenschen, de mit offenen oamen woatn und eicha handl erst donn los lossn, wenns wieda geht. wir sein olle anfoch zum lieben (mehr oda weniger, wir reden uns eher ein, doss ma nit leicht zum lieben sein. SCHON WIEDA A WEITERE BLOGPOST IDEE OLTA). wir sein olle anfoch zum lieben und leit de uns lieben, sein anfoch zum wertschätzen ok? und de, de uns diese wertschätzung nit bringen.. de diafn nit wichtiger sein ok?
punkt vier: bleib realistisch. fong nit on zu sogn „sogoa de streits hab i geliebt“ weil des is BULLSHIT. tua nit sochn, de du davua nit dapockt host, „romantisian“ und dazel olles bessa als es woa. sei ehrlich zu dir und ollen. steig auf de rosarote brilln aufe und setz da dei geile saint laurent rich bitch brille auf, steht da viel bessa!!!! de person woa nit de richtige, wenn se da weh geton hot. wenn des lei gstrittn hobs, gibs nix zum schen redn und de vergangenheit umzumoln, mocht se nit schena. ok?
punkt fünf: wos willst du? noch jeda trennung merkt man jo no mehr, wos man will und wos man nit will. i zum beispiel was holt so genau wos i nit will. do stell i es ma doch schwierig vua, den richtigen mensch zu finden, des werd eha so a lebensaufgob haha. oba nutz de phase jetzt, onstott der person nochzublean, fia di. wer bist du. wos willst du. und bitte bitte bitte tua da selba an gfolln: loss erst wieda an mensch in dei leben oda in dei bett, wenn du da sicher bist. sicher bist, wos de willst, sicher bist, wos de nit willst und di selba anfoch mogst. weil olta goooooooa kan bock neben wen zu liegen der auf amol voll los bleat wegn da expartnerin oda so ahahha. ma des is jo mega unangenehm. deshalb: stress di nit. und i bin da meinung, es fühlt sich schon welten besser on, wennst wieda mol wo zuabeliegst, wo de gern liegst. & nit lei, weil de nit alan sein willst oda holt a trostpflastale brauchst.
letzter punkt: änder de storie über de person. erlaub es dir, sei es dir wert und verwend bitte de vergongenheitsfoam. es bringt da frieden. wenn de nerma sogst, es is de richtige person. is se onscheinend nit. sog liaba, es woa fian moment schen jo. punkt aus. es woa a lebensabschnitt. de person hot da zu an zeitpunkt guat geton, oba wie oben ongredet, sog a ehrlich, doss des und des und des nit gepasst hot.
Bussis und danke fias lesn