Wos i gern ghert hätt von dir

Wir sein Meister im Geschichten im Kepfln ausmoln. Gonz oft denk ma uns Happy Ends aus, wo es anfoch kane gibt.
Heit a bisi Herzlpoesie, weil wir grod de Kepfln e volla ondra Sochn hom und Oblenkung nit schodn tuat. 

F und E sitzen zamm im Auto. Sie zittert ziemlich und versteckt ihr Nervosität hinter ihre Hoa, an denen sie durchgehend umazupft. Sie is vergeben, unglücklich. Er is Single. De zwa hätten es eigentlich wern solln im Summa. Seins oba nit. Warum? Des was kana so genau. Do woa holt auf amol a ondra, der woa mutiger, schneller und irgendwie netter zur E. Oba de E is e unglücklich. Und wär gern glücklich. Unausgesprochen wissen olle, doss se mitn F glücklicher wär. Oba es fallt da Mut. Und es fallen F seine Worte, de die E so dringend hern wollt. Lei desholb sitzn se zomm im Auto. Weil sie, naiv wie sie is, ghofft hot, doss er des sogn werd, wos sie hern will.

Du bist mit ihm nit so glücklich, wie du es verdient hättest. Du hättest es Glück von da gonzn Welt verdient. Du host es verdient, aufrichtig und ehrlich gliebt zu wern. So fest es nur geht. I tat da jo olles geben, wos du brauchst. I wa der, den du jedn Obend neben dir hom wüst. I tat fia di olles geben, oba lei, weil i genau was, du tatest genauso vü fia mi geben. Du bist a richtiger Schotz, den nit jeder vadient hot. Am ollawenigsten hot des Zapfl di vadient. Bitte sei dir selba so wichtig und geh anfoch. Am bestn heit noch. Schaug auf di. I tat gern auf di schaugn, weil du onscheinend derzeit nit fähig bist, des selba zu übernehmen. Oba des greg ma WIR schon wieda hin. 

Oba er is anfoch wieda ausgstiegen, nochdem sie umagedruckt hot. Natürlich konn sie nit sogn, doss er der richtige wäre. Oba sie denkt sich es und er a. Oba er steig anfoch wieda aus. Setzt sich in sei Auto und foat. Jo meine Kinder, es gibt nit imma Happy Ends.

Lei wos wa, wenn de zwa sich nia mehr segn. Wenn er losfoat und nerma daham onkimmt. Wenn sie ihre Sachlen pockt und ins Auslond geht. Fia imma. Wenn er zu ana Maus foat, de ob sofort sei Leben fia imma zur Hölle mocht.

Ka Happy End hon i gsog. Oba es konn a ondas Happy End kemen.

In a poa Monat lafn se sich über Weg. Drunk. Beim Fuatgehn am Weg aufs Klo. Sein Hahndrong hot da Lotta vagessn, sie ihr Jackn. Derwegn starten se ause. Ongschwipsta Schmusn. Herrlich. Noch 20 Min sein de Lippen rot vom Bussln und gleichzeitig blau zwecks kolt. Wangelen knollrot. Herzelen pochn wüld.

Oda bade valieben sich ondas. Schliasn mitnond ob, wirklich und ehrlich. Gonz aufrichtig. Jetzt sig se in seine Augn kane Sterndlan mehr. Jetzt ruaft er se nerma on, wenn er spiat, doss se ihn braucht. Jetzt is aus. Schlissl fia de Herzlen wieda retour geben, frei fian nächsten.

Genau des konn a a Happy End sein. Lei a ondas. Wast wie i man?

Nur weils ka guats Ende mit der anen Person, mit dem Traumjob oder mit der Situation geben hot, schliast des noch kane ondan guatn Enden aus. Lei weil a Kapitel semigeil endet, is de Gschicht noch long nit fian Oasch.

Also merkts eich des, solong a Gschicht ka Ende hot, des eich guat tuat, is es nit des Ende. Damit man i oba nit, doss ihr dem Teggalen de 38. Chance geben miasts, obwohl ma schon beim 5. Mol „na“ sogn hätten sollen. Oba wir verstehen des olle. GUAT.
Eher is damit gmant, doss ihr de Hoffnung nit so schnell aufgeben diafts. Eicha Happy Happy Ende (Doppelt weil wichtig) woatet noch auf eich. Ihr seids lei noch nit gonz bereit dafia. Es Universum will eich lei a bisi testen, eich a bisi wos beibringen. Donn kennts nämlich nochan eicha persönliches Glück selber mehr schätzen.

Mia hom olle schon amol an perfekten Menschen im Leben kobt, oba wir woan anfoch noch nit bereit dafür und hom nit gwusst, wie tuan. Durch den Verlust dieser Person homa aniges glernt und schätzen jetzt solche Wunderkerzenmenschen vü mehr.
Und i sog es amol so, ohne wie a komplett verwirrte Esotante zu wirken (wos i insgeheim oba bin und es mitn Olta sia noch brutal mehr werd!!):

Es konn eich a Person im Leben in verschiedenen Körpern begegnen.

I hon gonz oft Freindinnen in Frankreich, St. Pölten oder woanders kennengelernt, dessen Seele i schon davua gekonnt hob. De Seelen davua hon i valoan und jetzt wieda gfunden. Und des sein meine Lieblingsmenschen. Des is im Thema Lieben genauso. Bisi irre? Eindeutig. Oba irgendwonn werds mi vastehen..

olta i kling wie a reife 84 Jährige Puppe.

Gestern hot mi a Mädel fia a Interview angerufen und mi durchgehend gesiezt. Mei inneres altes Weibl hat sich beleidigt gefühlt.

Bis Sonntag. ❤️