A herzl text tuat olln guat. jap jedn monat zwa blogposts wirkt doch schwieriga wie gedocht. oba DANKE fias onklickn und lesn. i hoff, es tuat da guat. dir bisi a zeit zu nehmen, des zu lesn und bisi wos zu fühlen. fühl di gedruckt und bussi!

schnell glab ma, doss wenn wer zwenig gibt, des nie reichn werd. doss zwenig fost schlechta is wie zvü. weil liaba man hot no a essn fian tog drauf, wia man hot zwenig und no hunga. oba eigentlich is zwenig genauso zvü. also monchmol

zwenig liebe konn zvü obstond hasn. 

weil wenn de zwenig liebe gregst, zwenig gspiast, doss du da ondan person wichtig bist, baust du da do glei so a unsichtbare maua auf zwischn der person und dir. Und du gehst auf obstond. weil du eben zwenig liebe gregst und onstott danoch zu bettln oda zu frogn und gach a obweisung zu gregn, ziagst di zruck. quasi in die schnecknhaus und woatest, bis de person über de maua kraxxlt. oda du gewöhnst di on zwenig liebe, genießt den obstond und ihr valiats eich. longsom. imma mehr.

zwenig zeit konn zvü vamissn aufazauban

wieda letztens bei an vuatrog kert: wenn da wos wichtig is, host du zeit dafia. egal ob du se host oda a nit. fia de sochn, de da wichtig sein, nimmst du da de zeit. und generell gilt de ausred „i hob ka zeit“ nit, weil des a ausred is. oba jo: zwenig zeit mocht doss man mehr vamisst. und vamissn konn bisi schen sein oba auf daua is vamissn a aua-zuastond. oda nit? oba vamissn fördert schon bisi liebeskumma.

zwenig gespräche sorgn fia zvü gedonkn und ängste. 

leidiges thema, is ma kloa. lei wo kommunikation fallt, wern ängste greßa, zweifel vafünffochn sich und irgendwie mocht man sich um dinge gedonkn, wo man sich fria nie a kepfle drum gmocht hot. desholb sog i es a imma wieda: redets mitanonda. wenn ihr des nit auf de reih gregs, donn zwings eich dazua, mochts eich a „wir redn jetzt 30 minuten über olles“ date aus. I was es klingt so lächerlich und so sinnlos, oba is es nit. I daschreck mi a oft selba, wenn ma leit dazeln, se wohnen zomm und redn nit jedn tog noch da oabeit mitanond. Dabei is es jo so wichtig, kurz upzudaten und zu sogn, wie da tog so woa. Und wenn ma jedn tog es gleiche zum dazeln hot, is jo komplett egal: de frog konn ruhig routine wern. Regelmäßig mit lieblingsmenschen telefonian tuatn herzln guat und da seele a. noch gewissen gesprächen fühlt man sich holt 10 kilo leichta, deswegn schodet redn nit. Und bitte i was es is oft onstrengend, wenn leit volle viel redn und man selba nit so gern redet: oba vabietets niemanden, eich zu sogn wie es der person geht. Weil genau damit wochsn ängste, probleme und de wichtigstn sochn wern oft nie oda zspot gsog. 

zwenig selbstliebe losstn an zvü neid gspian.

Sie hot nit genau des, wos du nit host. Sie is nit depat, weil se schmusend in da eckn von da disko steht und du nit. Sie konn nix dafia, doss du deine hoa nit mogst. Es is olles in dir drinn und dei mangelnde selbstliebe is es problem. wer davon zwenig hot, trog zvü neid und eifersucht mit sich. de konnst lei loswerdn, wenn de endlich checkst wie vadommt guat du bist und doss de a gnuag bist. weil donn fongst di on zu frein, wenn a Mädel ihr glück in an liabn typn findet, a wenn du ihn guat findest. du werst da nerma denkn „poa warum schaug de so guat aus? richtig depat! de meg ma nit“, weil du da denkn wirst „sie is a fesche. i konns sogn, weil i mi selba a mog.“

zwenig zweisomkeit, do spiast schnell zvü einsomkeit.

menschn vawechsln gern einsomkeit mit alan sein. alan sein is guat, einsamkeit tuat weh. oba es liegn gnuag leit im oam vom partner und fühlen sich alan oda einsom. weil de kommunikation fehlt. weil de zweisomkeit so gezwungen is oda weil de person lei obweisung greg. und jede beziehung, egal welche sprache der liebe man so redet, braucht zweisomkeit. i gregs nit in mein kopf eine, wie a paarle ständig zamm unterwegs is und es unangenehm findet, am abend zammhuckn oda sich halt lei zum schlafn trifft. hoooooow? zweisamkeit macht a beziehung aus und werd de einsomkeit anfoch lei mehr pushen, wenn man zamm einsam is. und wenn du di bei dein partner di ansom fühlst: red es on. und wenn do unverständnis kimmt: überleg da de soche nochmol. des sollte und deaf ka dauerzustond in ana beziehung sein!

 zwenig wertschätzung ergibt imma zvü unzufriedenheit.

wir gestehen es uns holt echt ungern, richtig ungern ein: oba monchmol brauch ma anfoch wertschätzung. monchmol brauch ma a „des host so guat gmoch! i bin stolz auf di!“ monchmol brauch ma anfoch so a unkompliziates „is de hosn nei? de steht da so guat“ oda „heit gfollst ma bsundas“. es geht nit drum, doss des de fehlende selbstliebe ausgleichn soll. sunda weil es anfoch menschlich is, bisi a bewunderung, schene worte und wertschätzung zu erlebn. des buach „wunder der wertschätzun“ konn i eich ons herzl legn“ wo ka wertschätzung is, kimt de unzufriedenheit. weil warum sog er nix, doss i heit sei lieblingskleidl onhob? warum is da mama aufamol mei ansa in da schul egal und sunst hot se sich imma mit mir gfreit? warum greg i vom chef ka lob, wo i doch so guate oabeit gleistet hob und de kollegin, de de hälfte moch, greg glei a netts mail? und um wertschätzung zu gregn, muas man se holt a gebn. sogs den leit, wenn des stolz auf se seids, wenn ihr se bewundats oda wos a imma. liabe woate kostn anfoch nix!

zwenig konn eindeitig zvü sein

 

ps: zwenig (blogpost) schreibn konn eindeutig zvü unausgeglichenheit bei mir sorgn. hot grod vadommt guat geton, des do zu tippsln. werd i wieda eftas mochn. weil des muas wieda a priorität wern, wenns ma mehr taugt wie ondre sochn. ane der sochn de i mit da zeit lernen muas/deaf! Bussi und danke fias lesn <3