kana werd di rettn

kana werd di rettn

22. Februar 2023 0 Von Laxobu

wieda mal im umfeld mitgreg, doss jemand drauf woatet, doss wer kimt und donn is olles guat. oba de woaheit is: kana werd di rettn.

es is nit unsa job, ondan mensch zu gfolln und senen olles recht zu mochn. natürlich homa sowos wie a soziale verontwoatung, doss wir vor ollem menschen de wir megn a guats gefühl gern mitgebn. des is oba nit lei so a ding der liebe sundan a der höflichkeit. oda gibt man ana fremden person gern a unguats gfühl? des wa a bisi komisch.

es is a nit unsa job, menschen zu rettn und a kana hot de pflicht, uns zu rettn. du bist aus ana schiach toxischen beziehung drausn und host vertrauensprobleme? warum soll dei künftiger partner jetzt schon vuaob olle girls auf insta blockian? weil in dein kopf er des tuan werd, wos der monn vua ihm geton hot?

du konnst di selba nit in spiagl onschaugn. soll dei partner jetzt dir ocht mol am tog sogn, wie schen du bist und du werst es jedes mol mit an „aba geh!“ ob tuan und fühlst di ka bisi bessa und dei partner natürlich irgendwonn a nerma, weil er oda sie gegn a wond redn?

dei beste freindin hot an partner und du bist holt alan. jetzt muas se sich vier mol de woche zeit fia di nehmen, weil du nit alan mit dir selba sein konnst? konnst du nit oda willst du nit? warum muas sie fia di de zeit einnehmen, de se vielleicht goa nit einnehmen will. is sie dir des „schuldig?“ warum bist du so pissed, wenn sie mol obsogt? is es echt, weil du nit wichtig genug bist oda weil du di zu wichtig nimmst?

i kenn des gefühl wenn man alan is und sich denkt „boah wenn i an partner hob, werd i mi automatisch bessa fühlen.“ oba es gibt holt decht leit, de glabn, doss se erst donn glücklich sein, wenn se wen hom. de kennen des nit so einteiln mit dem gedanken: i bin glücklich. du mochst mi glücklicha. sundan de sein: nur zu zweit bin i glücklich. und i hab mi selba schon mal dawischt bei dem gedanken und gott sei donk hob i gmerkt, doss du a alan lieben konnst und mit dir alan a „zamm sein“ kannst. generell der obgedroschene spruch: liaba glücklich alan, wia unglücklich vagebn. der is anfoch woah! und man muas sich anfoch bewusst sein, egal ob vergeben oda in ana freindschoft: niemand muas di rettn.

kana werd di rettn. kana werd kemen und dir deine gonzn suagn obnehmen und de wern sich a nit anfoch in luft auflösn.

kana werd dir deine ängste komplett nehmen. kloa werst se eher vagessn wenn de mit de richtigen leit zommen bist, oba sie wern di imma wieda einholn, wenn de mol alan bist. und deinen ängsten muast du di selba stellen.

kana wert dir selbstliebe aufdruckn kennen. du werst nit, lei weil di jemand mag, di selber mehr megn und schätzen. du werst imma no schwer komplimente annehmen kennen und a nit imma glabn, doss di der mensch mog. weil du mogst di jo selba nit, warum mog di donn der mensch? oba i sog da ans: wenn di jemand mog, deafst du di selba a megn! und du diaftest di a megn, wenn di sunst kana mog. dafia brauchts kane ondan leit.

kana is fia dei laune verantwortlich. du bist mies drauf, do konnst oba nit immer valongen, doss dei partner oda deine freind kemen und di aufpäppeln. du kannst a niemanden verbieten, ohne di a spaß zu haben und glücklich zu sein. kana werd dei emotionale lage ständig stabil halten wollen. und wer glabt, doss man in ana beziehung durchgängig happy is, hot a bisi zviel rosemunde pilcher gschaugt (obwohl do is a gnua drama hahaha). du solltest fria oda später anfoch lernen, wie du di selber glücklich machen kannst. was du tuan solltest, wenns da nit mega guat geht und wos du wirklich brauchst.

kana werd es dir imma bequem und anfoch mochn. du willst nit beim oazt onruafn, de person tuats. du willst de prüfung nit machen, de person redet da ein es is ok de zum 5. mal obsogn. du magst nit alan de strecke mitn auto foan, de person fiat di. des is manchmal wirklich a große hilfe, doch auf dauer is des nit guat fia di. de person, de dir wirklich a hilfe sein will, werd di a aus deina comfrot zone a bisi ausadruckn, wo de glabst des is unguat. eventuell bist donn grantig und denkst da, du bist nit wichtig gnuag fia de person. dabei is des a hilfe, eher a rettung. weil de person losst di mochn und zur not is se jo e do.

als a mensch voller anxiety und oft sinnlosen ängsten kenn i des. und i lieb meine lieblingsmenschn dafia, doss se ma zum beispiel beim fuatgehn oft de hond reichn oda mi nirgends alan stehn lossn. oba i schätz es genauso, wenn se sogn „ok du reservierst den tisch per telefon!“. a easy beispiel: liabe leit schickn mir a foto genau wo i hin muas mit sprachmemo und screenshot, wo i parken kann. meine lieblingsmenschen schickn ma de adress und lossn mi anfoch mit meiner „ongst“ kurz alan und sogn „du findest es e und sunst ruafst on“. und noch anigen monaten konn i stolz sogn, i foa jetzt sogoa schon los ohne drei mol zu checken wo i parken konn, weil spoiler: wir sein in kärnten. DO KONNST IBAROLL PARKEN HAHAHAH.

ihr kennts mein spruch: wir miasn oft unsere eigenen held*innen sein. also fong ruhig damit on. 🙂