leben lebt sich intensiv
hiiiii- i bin momentan, also seit mindestens 6 monat relativ schleisig beim thema bloggn. oba es kemen lei blogposts online, de i wirklich fühl. und momentan fühl i es echte leben mehr wie de online-welt. wos a logisch is irgendwie.
ihr wissts, i mog nit, wenn ihr eich durchgehend gedonkn mochts, iba wen i den text schreib. und seitdem vua a poa wochn a mädel ma mol gsogt hot, sie folgt ma nerma, weil i jo nit sog, wie der mensch von ana insta storie (mit an emoji verdeckt) hast: mog i es nochmol kurz sogn. nit olles kert ins internet und i deaf gott sei donk mei insta/blog/online auftretn persönlich, oba privat gestoltn.
es is egal, mit wem oda ohne wem i bin. wenn i zu 200% glücklich bin (wos i in dem moment bin), sollte des fremdn menschn im internet reichn. und wenn di es lebn von ondan mehr intressiat, solltest deins intressanta gestoltn und on dir oabeitn. und na, niemand, nit mal menschen, de ihr leben im internet „zagn“, schulden eich wos. i deaf bilder postn, wie i se will und zensian wenn i se will und na nachrichten wie „warum postest du des, wenn du de person e nit zagn willst?“ haben ka berechtigung. weil des mei eigene entscheidung is. a no nie zu wen gsag „warum postest du des? juckt jo kan“. des is jo nit mei entscheidung, schaug i ma holt nit on, wenns ma nit taugt. und wennst di fia leit nit mitfrein konnst, ohne genau zu wissn, wos los is: is des a a soch, de mit dir selba gekleat kert.
damit des olles no hond und fuas hot, gonz an guatn tipp: redets sochn on, de eich nit passn. bei freindn, beim partner, immer glei. a bei fremde leit. nix einefressn, so wirds niemals bessa. mia hot vor kurzem a mädel ECHT a wilde storie ongedraht über mi, de NIT gstimmt hat. i woa so grantig, doss i ihr am tag danach (an tag quasi überlegung dazwischn) gschriebn hab, sie soll mit mir redn, wenn se a festes problem hot. weil i nit ok damit bin, wenn man gerüchte über mi straht und jo i hob mittlerweile decht a dezente reichweite (de ma vua ollem am mädels klo imma wieda bewusst wird), doss i nit will, doss leit sowos redn. generell: wenn du merkst, jemand redet schlecht ima di: konfrontia den menschn. des verwirrt se am meistn und oft merkst, doss do lei großes gerede woa, oba nix dahinta. und generell: heats auf iba ondre so schlecht zu redn.
und a wenn viele imma glabn se kennen de larissa, tuats ma lad: du kennst laxobu, mei auftretn im internet und darfst bitte nit davon ausgehen, doss i in echt genauso bin. du wast nämlich donn nix, ausa entteischt. und genau diese entteischung gspian monche und des is anfoch nit mei aufgob, do wos zu „klean“. weil i nit so bin, wie online. wobei menschn, de mi in echt kennen, donkboa sein. weil se mi megn wie i bin. also: du deafst laxobu megn, wie i es gestolt, oda eben nit. mehr gibs do eigentlich nit entscheiden. schen wennst do bist, wenn de nit do sein willst, schena wennst gehst. i moch des olles fia de leit, de des lesn wolln, nit fia de, de sich driba des maul zreißn wolln. de juckn mi nit. genauso nit wie de menschn, de ma in echt ins gsichtl sogn, wenn se mi von insta kennen“he warum dazelst ma nix privates?“. weil i nit muss. lei wenn i will 🙂
10 prozent de meine insta stories konsumian, lesn den blogpost im durchschnitt. also 3k und 300. zohln mit denen i definitiv nit imma gleich guat umgeh. oba i hob gmerkt: es geht lei um de, de an supportn, nit de ondan. und zwischn kritik und kritik, gibs a an untaschied. so gnuag, bussis und danke fia olle schenen seelen, de do sein!