seids bitte liab

jap, darüber hob i so fix schon mal an blogpost gschriebn, oba es schodet holt wirklich ka bisi, des nochmal zu lesn und zu vastehn. und no wichtiga: a wirklich umzusetzn. seids bitte liab zu ondan menschn. oba natürlich a zu eich selba (dazua später mehr).

mochts kane witze über de figur von jemanden. nur weil wer in deinen augen dicka is oda „zu dünn“, host du nit es recht dazua, des zu äußern und quasi donn no zu sogn „is lei mei meinung“. danke drauf scheiß i genau gern. du definiast nit, wos dick und dünn is. und wos, wenn sie durch de pille zuagnommen hot? wos wenn dahinta a kronkheit steckt? du konnst es nit wissn, weil de nit in den menschn schaugn konnst. außadem wie stellst da denn des vua kumpl? doss de person in null komma fix 3 kilo weniga oda mehr hot? sochn de man innerhalb von 5 sekunden nit ändern konn, NIT ONREDN (zb spinat zwischn zahntlen imma sogn!!)

wenn wer unsicherheiten hot, erwähn de nit durchgehend. vua ollem nit vua ondaren. witze auf kostn ondara zu reißn, is nit ok, wenns de betroffene person nit guat findet. wos brings da, wenn du an locha von dein crush kassiast, oba de person, über de du bled redest, ham geht und no mehr leidet wie davua? i bin mei leben long imma schnell kleschrot ongloffn, wenn ma wos peinlich woa. sprich: in da schulzeit anfoch bei jedem mal ba da tafel stehn woa i rot wie a tomatn und wos woa? des unsichere mädel aus da letzn reihe hot IMMA wieda erwähnen miasn, wie rot i jo in da visage bin. cool. danke 🙂

redets probleme von ondan nit klan. nit du bewertest, wie groß des trauma/de anxiety/ de ongst von der person sein deaf. du werst nit mit dein „ma übertreib nit“ de situation bessa mochn. du werst nit entscheiden, wie jemand zu leiden hat. wenn se noch 5 monat trennungsphase imma no bleat- loss sie. wenn er ham gehen will, weil ihm olles zviel werd, sog nit spaßbremse, sundan sog de person soll sich melden wenn se daham is.

nit du werst sogn, ob a mädel mit tiktok starten deaf oda als influencerin oda wos was i. schick gern ihre videos weiter und schreib drunter „peinlich“. sie mocht des fix nit fia di. glab ma, i bin do bisi erfahren. es geht nit um de leit, de nit on di glabn, sundan de, de des brauchn, wos do gmocht werd und um de leit, de an supporten. donn joare später mol bsoffn ba an festln sogn „i vafolg di schon soooo long und find di so cool!“ bringt da holt a nerma viel, weil man vergisst nie. anfoch liaba auf de eigenen fias schaugn, maus. wenn du selba nit des interesse host, cool. wenn du selbst nit den mut host, oabeit dronn. oba moch ondre nit klana, lei damit du guat ausschaugst.

i finds echt geil, welch großes ego manche menschen hom und wo se glabn, se diafn do über de psyche/körper von ondan menschn entscheidn. oba daschaugn sich daham nit in spiagl on, weil se sich nit leidn kennen.

menschen, de solch verletztende worte finden und ondan ins gsichtl oda a hintan ruckn sogn, solln damit aufhean. bitte, wirklich. de welt is schon unschen gnuag und dadurch werds nit bessa. du wirst a übrigens nit schena, lei weil du sogst, sie is schiach. dia gfollt ihr weiße hosn nit, ok passt sei leise, is es nit dei ding. du findest von ihm de freindin so depat und peinlich, oba im endeffekt bist neidisch. dadurch wirst du fia ihn nit intressanta, im gegenteil eventuell findet er di on weniger attraktiv dadurch. seltn kert, doss es wer sexy findet, wenn a ondre person schlecht iba ondre redet. is jo vü attraktiver a mensch, der sogn konn „ma i find de person schen/ehrlich. bewunda de person fia ihr stärke/wos se mocht.“ mit schenen wortn konnst vü mehr erreichn und eventuell de ane oda ondre wundn (mit)heiln.

sog i imma wieda: wenn de nix liabs zum sogn host, holt dei pappn.

liab zu anonda sein zohlt sich aus.

oba a zu dir selba bitte!! wos brings, wenn du jedn mit liaben worten überhäufst, liabe geschenke mochst und wirklich do bist, oba selba auf di komplett vagissest? den job werd da kana obnehmen. in meine augn konnst a erst richtig a guata liaba mensch sein, wennst es a zu dir selba bist. weil sunst trogst imma a packl mit, wos a imma greßa wird. also sei liab zu dir selba. konnst a, weil du echt a liaba knopf bist!!!!

übrigens do no poa phrasen, de liab sein, de nix mitn ausschaugn zu tuan hom, wos man sein partner/friends/kollegen wem a imma sogn kennt:

• i bewunder di fia.. (dei stärke/dei kreativität/dei verständis..)
• i schätz on dir.. (wie gut du mi befriedigst. SPASS AHHAHA KONN MAN OBA A MANCHMAL SOGN. dei geduld/dei art, wie du ruhig bleibst/dei empathie..)
• danke, doss du.. (da zeit fia mi gnommen hast/des erledigt hast/mi bestärkt hast/ma a guates gefühl gibst)
• in deiner nähe fühl i mi wohl
• du bereicherst mei leben schon vü