reine woaheitn teil 2
wal da erste teil schon so guat onkemen is (hier zum nochlesn) folgt a zweiter teil. mit dingen, de anfoch stimmen und mit denen man sich obfinden muas. oda man sig es als AHA-moment. enjoy :))
übrigens bin i ma beim tippen wie so de große schwester vuakemen, de so lebensweisheiten gibt. TAUGT MA.
se nehmen da den status, nit dei freiheit
i hab grode (I WAS NERMA WELCHES) a buach glesn und bin donn mit offenen mund do gsessn, weil es SO LOGISCH IS. oba irgendwie was i, doss gonz vü leit nit so denken. es is jo so, doss viele sich nit in ana beziehung segn, weil se ongst hom, nerma frei zu sein. doss se nerma so leben kennen wie als single und doss es am ende holt quasi a qual is, a bürde. oba gonz ehrlich: wenn du mit wem zam kimmst, der de richtige person fia di is, donn nimmt er da zwoa dein single-status, oba nit dei freiheit. du bleibst a eigenständiger menschn, mit zielen/wünschen/visionen. du konnst imma no dei business aufbauen, de studium durchziagn oda whatever. du muast nit glei olles wegwerfen und tausend kompromisse eingehen. du muast nit mit der person zamm ziagn, du muast nit glei olles, wos du geton host, folln lossn (außa des schmusn mit 32359 mausis eventuell). oba wissts wos i man? der sinn ana beziehung is jo, doss sich zwa leit, de sich vadommt gern ham, gern zeit vabringen und sich guat tuan. oba doss jeda no sei eigenes leben hot. dieses plural-wir is sowieso nit gonz gsund, wenn man olles zamm macht. deshalb versteh i oft nit, warum leit sich nit in a beziehung trauen, weil des „jo olles ändert.“ donn wa es fix nit de richtige beziehung. und gonz ehrlich: wenn ihr wen megs oba es gibt 40 sochn, de de person davua ändern miast.. is es donn de richtige person?
du wast nie, wos los is
so wichtig und des is wirklich a empathisches werkzeig dieser ane gedanke: Du wast nie wos los is. du kannst in an menschen nit eineschaugn und daher is es a so wichtig, nicht schnell zu urteilen. vielleicht is se so grantig, weil se eben grod richtig schiach gstrittn hot mit ihrn freind. vielleicht sauft er heit sich so nieda, weil er sein job valoan hot. wos wenn er daham de greste ehekrise überhaupt hot und deswegen nit mit dir fuatgehen will. imma liab zu leit sein, werd nie a fehler sein. wenn se des nit annehmen kennen oda bled wern, hot des a irgendan grund. oba des hot donn nit mit dir zu tuan. solong du liab bist und mit reinen gewissen sogn konnst „i hob mei bestes geben“ reicht des. ok?
hate
i mogs goa nit, wenn wer schlecht iba bekannte von mir redet. na generell mog i es nit, wenn wer echt schlecht über ondre redet, egal wer de person is. seids eich bewusst: schlecht iba ondre zu redn, sog mehr iba eich aus als über de person. und a wenn de person „so wos schlimmes geton hot“. des is übrigens eicha meinung, nit zwingend a fakt. ja beispiel betrügen: in deinen augen des schlimmste der welt und des geht ja GOA NIT. oba in anderen augen (eventuell a in meinen) is nit nur der betrüger*in zwingend schuld. was wenn es in der beziehung davor andere treuebrüche geben hat? was wenn da gewalt im spiel woa oda emotionale erpressung? es gibt nit imma lei schwoaz und weiß. und i halt nix davon, hass wirklich auszuleben. in dera welt, wo e mehr schiach wie schen is, is es gholfn, auf alltäglichen hate, der sinnloser nit sein kennt, zu vazichtn. na es geht di nix on, doss se den vierten typen in 2 monat hamzaht. na es is nit lächerlich, doss er von ana fuaßbollkarriere tramt. es is von eich selba oamselig, so schiach zu redn.
veränderung deaf imma sein
habs e vua ewigkeiten in meiner instastorie angredet: i hab mi in de letzten 10 joa gewaltig verändert und a von 2020 auf jetzt sehr. und des is guat so. und du deafst di a in den nächsten joan verändern, es is jo guat so. du deafst auf amal sport lieben, lesen onfongen oda a de oltn freindschoftn beenden. da mensch is a gewohnheitstier und wir feiern veränderungen prinzipiell nit so, oba dabei kert genau des zum leben dazua. also wenn du dein job wechseln willst, tua es. egal wie olt du bist. überlegst da de hoa zu färben? TUA ES, se wochsn e noch und umfärben geht a (fost) imma. leit, de wolln, doss de bleibst wie de bist: wollen nie es beste fia di.
wenn des no eigene lebensweisheiten hobs, gern her damit. kennt ma wieder mal a follower*innen-posting a vuabereitn 🙂
wenn ihr a generell lebensweisheiten, datingtipps und funny stories aus mein leben HEAN (wortwörtlich) wollts: donn tat i gonz fest den podcast Hart im Geben vom Raphael und mir a chance geben. hjo tat mi frein ❤️
https://open.spotify.com/show/4y1yapyfwD0c5xQyBZ6KTg?si=SmyO09ItTnqmf11kQqDBjg