wenns sich guat onfühlt, tuas
heit wieda mol a klana reminder, den meine patreon-girls schon vua über 7 monat glesn hom. der text is oba abgeändert. wer mi bisi supporten will & jeden montag an extra blogpost lesn will und an geburtstagsbriaf plus weihnachtspost: hier gerne anmelden fia 3 euro im monat 🌞. *eigenwerbung endeeeee
a bisi an realtalk, damit man jo nie den glauben greg ba mir laft imma olles: i fühl mi brutal oft so, als wären sochn, de i fühl/mach, nit normal. als wa des „folsch“ wos i tua.
oba i hab mit da zeit glernt, es gibt oft ka folsch und richtig, also a allgemeines. wenn es sich fia di guat anfühl, tuas.wenn es sich nit guat anfühlt, tuas nit. verstehst wos i man? i fühl mi ehrlich gsogt oft als sinnfluencerin a bisi sinnlos und nutzlos, wer braucht liebeskumma-blogposts, wenn es in der nähe an kriag gibt? wer braucht meine bledn schmeh auf insta, wenns do hochwertigen content gibt? oba i hob amol wos ghert, was so stimmt: i bin nit sinnlos und a alle anderen arten von unterhaltung/entertainment sein nit sinnlos sundan wichtig. viele von eich brauchn worte, de ihr lesen kennts und wissts „ihr seids nit alan.“ wenn sich 20 leit lächerlich über laxobu mochn, oba a person sich dadurch besser fühlt: wos is mir wohl wichtiga? und des gefühlt, wos ma so a person mit ana nochricht oda an sotz ins gsichtl gibt: unersetzboa.
grode letzte woche bam geburtstagsbriafl schreibn kurz emotional woan. warum? weil es so a fuckin‘ privileg anfoch is. i deaf menschn, de mi supporten, an briaf schreiben. klingt erst mol so „aha ok?“ OBA wenn i weiter überleg: wie vü muas i schon gschofft hom, doss i des mochn deaf und quasi a geld damit moch. i wer zwoa nie wissn, wie vü leit i schon helfn hob diafn, oba alan es wissn, doss es mehr wie a hondvoll sein wern: unbeschreiblich. und des tua i jo gern. desholb tua i es jo a. und wenns leit folsch oda depat findn, hast es nit, doss es folsch oda depat is. wenn wer sog, er braucht kane mausichecks von mir, schaug sich oba jedn anzelden on: bin donn i echt es problem? i glab eher nit so. na spaß: i was, doss es nit so is.
deshalb: bewert deine sochn, handlungen, gefühle goa nit imma so stoak. loss de sochn anfoch ok sein. normal sein.
es is so ok und normal, doss du an schlechten tag hast und anfoch nit ergründen kannst, warum. loss den tog anfoch donn so sein und zwing di nit, den tog bessa zu machen. es beste an an schlechtn tog: er geht vorbei. i bin, wenn mei tog richtig bled is, anfoch so a maus, doss i mi uma 21 uhr schon ins bett hau. weil im bett konn nerma de welt passian (außa ihr habs an hotten bettpartner, der eich bisi verwöhnt hihihi. tat i eich btw e gönnen!).
es is so ok und normal noch hilfe zu frogn. ehrlich!!! egal ob du mama bist und es kind mal wo abgeben willst, nur um alan zu sein und auf da couch zu sitzn. wenn du mal wen bittest, dei arbeit zu kontrollian oda di abzuprüfen. i lieb es, noch hilfe zu frogn, weil i was, es geht ma dann anfoch bessa, weil i a sicherheit greg.
es is so ok und normal, wenn de dei meinung über gewisse dinge änderst. sei froh, doss de nerma so denkst wie mit 16 ohaaa. donn hättest fix a oaschgehweih HAHA. sigs als kompliment, wenn wer sog „boah du hast di geändert!“ JO GOTT SEI DONK.
es is ok und normal, wenn du di heit in spiagl onschaugst und denkst, na heit taug i ma nit so. du mogst jo a nit jedn menschn um di uma jedn tog gleich viel, also muast di selba a nit imma megn. i holt mi jo oft a selba nit aus und ärger mi, wie i bin. und am nächsten tog lieb i es wieda. deine freind*innen diafn di onzipfn, also du di ruhig a!
also wos i sogn will: es is olles ok und normal. und du bist mit sicherheit nit alan bei den gewissen sochn. deshalb, stress di nit und ruaf da immer wieder ins gedächtnis „es is schon ok wie es grod is. so is es e nit fia imma.“
und no gonz wos wichtiges, wos i mol glesn hob: deine schlechten gedanken ab 9 Uhr abends zählen nerma. PUNKT AUS. wenn di abends imma wieda mal des feeling überkumt, alles is falsch, zu viel oda nit richtig.. loss es goa nit zuabekemen. loss es folln. nimm es nit für ganz und sog laut „morgen fühl i ondas.“ es is anfoch wirklich so. holt da des a amol vua deine zuckasiasn auglen.
danke fias lesn und wie imma fias do sein und do bleibn!!