bin i s wert?

„bin i s wert?“ hat a mädel mi gfragt ba da fragerunde auf insta.

jo. bist du. punkt aus.

oba weils a blogpost is, führ i es bisi weiter aus:

du bist es wert, doss man auf di woatet. im auto, noch da oabeit, fia a poa monat dawal du in amerika de welt unsicha mochst oda wie a imma.

doss di jemand ham bringt, damit de sicher ham kimmst. doss da nix passiat& du ka ongst hom muast. & wenn de person di ins bett bringt, ausziagt& da hilft, de linsn ausa zu tuan: a des bist du wert. du bist es a wert, doss man nit über dein kota, der sich lächerlich heftig onfühlt, fia de poa drinks, locht, sundan da a wossa plus kopfwehtablettele bringt.

doss wer dei zitternde hond dawischt, wenn sich da kolte schweiß der panik breit mocht. doss di wer in da disko zu dir ziagt, weil menschnmassn nit dei ding sein. doss wer deine ängste ernst nimmt, nit klan redet& di dazua bringt, driba zu redn.

doss jemand dei leben vaziat und schen(a) mocht. doss jemand es liebt, wenn de lochst& du a sena lebn bessa mochst.

doss di jemand spinnen losst& noch poa minutn frogt, obs wieda geht. doss man di mit olle eckn& kantn nimmt& mog. 

doss di wer holtet& a trogt. bis zum auto, noch ana longen nocht. oda in schwan zeitn, wo du wast, doss de des jetzt alan nit dablost.

doss wer ringend worte suacht, um zu aklean, wie gern er di hot. doss oft de worte nit reichn, oba tatn a gnuag sogn. 

doss de wen host zum zuabelahnen, wenns gwicht auf deina schulta zschwa werd fia di alan. 

doss da wer de zweifel wegschupft& di imma wieda aufn bodn der totsochn ziagt.

doss da wer imma wieda kloa mocht, deine gedonkn san nit zwingend de woaheit und de aussogn von ondan a nit.

doss do wer is, der da sei jackele oda pulli gibt, wenn de sun sich vazupft& es kolt werd. oda wer dein ruckn einschmiat, bevua dei haut krebsrot werd oda doss wer dei varunnene wimpantuschn-situation rettet.

doss wer mehr in dir sig, wie du in dem moment, wos ok is. doss du kurzfristig dein wert nit dakennst: bold sigstn wieda. 

du bist es wert zu wissn, doss du guat bist, sowie de bist.

du bist es wert. des akenn i von da weitn. des werd no de richtige person dakennen& deine lieblingsmenschen a. lei am wichtigsten wa holt gach, doss du es a akennst.

du bist es wert. du host do an plotz auf dera welt. es is schen, doss de do bist. vagiss des nit.