warum i iba sex schreib
hi meine schenen wesn. heit wieda mal a blogpost über sex, anfoch weils wichtig is und i imma no oft schräg ongschaut werd, wenn leit draufkemen, doss i über DES schreib haha.
vuasichtsholber: TW: sex/ sexualisierte gewalt.
alles blogpost aus der reihe findets übrigens do. es geht um olls eigentlich: sex mitanonda oda alan, pornos, köperwahrnehmung, respekt.. letztens hot a mädl gfrogt, warum i mi trau, driba zu schreibn. mei erste ontwoat woa „najo, weil sich viele nit mol traun drüber zu redn. donn schreib des olles auf, donn hom de, de sich nit traun zu frogn, wenigstens so a poa ontwoatn.“ oba de ontwoat is eigentlich viel länger und schockiat mi teilweise imma no.
a storie aus mein privatleben hot mi so oag geprägt, doss i ma gedocht hob, i muas anfoch mehr driba redn onfongen, wenn es sunst kana tuat:
i mit meine zoatn 21-22 joa sitz zwischen mehreren frauen. müttern. fünf bis 30 joa älter als i. a lustige runde, passt holt so von den lebenssituationen nit zomm, oba i mog des. weil, achtung, kurzer abschweifer: i hab eich sia schon mal dazelt, doss i durchs arbeiten in da buchhandlung verstanden hab, doss a 55 jährige geschiedene frau genauso blerentiga in da mittagspause sitzt, weil da bäcker ihr lieblingscroissant nerma hat sowie du selba a in so ana situation manchmal den tränen nah bist. doss a fia a zehn joa ältere kollegin es imma no schwa is, vua ondre leit zu redn: wir sein nie alan. auf alle fälle sitz ma da trinken aperoli und leben des leben und donn seima wie viele frauenrunden aufs thema sex kemen. und i kenn ka blattl vuam mund und red los und donn frogt mi ane von den frauen wie s so mit orgasmen ausschaug. und i woa so „hääääää wieso frogt sie mi des?“ und i dazel holt so wie i es jedn dazelen tat: in da jugend woa des thema holt goa nit vorhanden, a nit bei freindinnen. mit da zeit und donn den passenderen partnern konn man sich des eher einredn lossn. und doss es holt „erlernbar“ is. und donn woa mei moment do: sitzn mir diese frauen gegenüber und erklären mir, doss ka anzige noch beim sex mit an mann kemen sein. kane von senen, niemals.
verstehts mi nit folsch, i hob nit den gedanken ghabt „omg oam!“ oda irgendwos abwertendes. lossts mi aklean: fia mi, als frau ohne kinder, is des thema geburt des IRRSTE wunder da welt, wos a frau so erleben deaf. a kind wochst IN DIR DRINNEN (i bin do so fasziniat ahhaha) und viele hom de möglichkeit, des selba no ausazudrucken. (perfekte wortwahl i know) i man doss a frauenkörper des schofft is SO WAHNSINN. und donn schoffens de männer nit amal, den frauen an orgasmus zu schenken??? also verstehts ihr mi? wie irre kurios i des gonze find? doss a frau do a baby in händen holtet, wos sie quasi gmocht hot, oba beim akt hot se nit den genuss von an orgasmus hoben kennen, weil sie no nit so weit woa und eben da partner a nit? und orgasmen und geburten zu vergleichen wäre komisch, tua i a nit. oba mir zu sogn, du host a geburt erleben diafn oba no nie an vaginalen orgasmus oda vielleicht sogoa a kan klitoralen.. is schon a stickl der sexualität wos fallt. und de frauen sein liebenswerte wesen und se kennen nix dafia und do is jetzt ka shaming oda so do. oba i tat mir schon wünschen, doss olle frauen senan körper so fühlen diafn und kennen und wollen, so guat es lei geht. und dazua ghert da weibliche orgasmus a dazua.
und des hot mi schon fest geprägt, doss i ma gedocht hob i will mehr schreiben iba des gonze thema. doss sex nit grausig is, doss sex ka zwang is, doss kommunikation zum sex ghert und am ende fongt sex 24 stund fria on (kurz version: behandl dei freindin nit den gonzen tog scheiße und wunda di donn, warum es im bett nit funktioniert!!!!!). i hab e anige posts schon driba gschrieben und werd a nit aufhern.
wos mi no dazua bewegt: eichre frogn teilweise auf insta. verstehts mi nit folsch, es gibt kane bledn oda folschn frogn. oba es gibt onscheinend tamisch zwenig aufklärung ba uns. und i versteh, doss nit jeda seine eltern bei gewissn sochn frogn will oda a bei freind*innen oft respekt hot, wos nachzufrogn. wichtig is oba, doss man frogt und redet. erst donn merkt man „ah ok bin nit alan damit“ „des is ok so!“ „des is nit ok so.“ i sog wie es is: wenn i von ana 25 jährigen a nochricht greg, wie se endlich nerma vuam pimpi vom freind graust, is des ka anfoche froge, de mit „olta stell di nit so on“ beanwortet werd, werd ma schon kurz ondas. oda wie oft kimt de froge, wie man dem freind eintrichtert, doss man kane bjs mochn will. oda was man gegen den druck vom partner, sex haben zu miasn tuan kann. kan „normalen“/positiven zugang zu sex haben, oba so tuan als ob is mehr als problematisch und schwierig. und es is so wichtig, es anfoch a zu sogn. ihr miasts nit mit wem schlofn, damit ihr de person beeindruckts. und doss man nie feicht wird, is a nit anfoch donn zum durchdruckn, sundan a an besuch beim FA wert. generell bei jeglichen weiblichen problemen, egal wie „peinlich“ se in eichan kepfln erscheinen. de FAs glab i sein do schon a bisi ausholtig 😉
a froge mit ganslhautcharakter aus meinen dms: wie holt i an blowjob aus? gonz anfoch: du muastn nit ausholtn. is a ding des muas eich badn a gaude mochn und jo schwöre, a wenns wer nit glabt, a bj is grundsätzlich fia de ausführende person nit unangenehm/ ekelhaft. und wenn es so fia eich is: redets drüber, des konn doch nit a reins gwiags fia eich sein! und (schlechte) erfohrungen aus da vagongenheit kennen an schon ziemlich long begleiten und spoiler: ihr miasts a do nit alan durch. und do red i a wieda gonz ehrlich on: es gibt dafia profis, de eich helfen kennen. in therapie zu gehen is nix zan schomen und sollte so normal sein wie de mci dates am sunntog obend mit da bestn freindin. warum gehma bei zohnweh ohne irgendwos zum zohnoazt, oba wenns herzl sticht und des kepfl de gonze nocht rottat und mehr weh tuat als olles ondre auf da welt- warum konn man do nit zu an psychologen gehen? warum is des donn auf amol wos ondares? lei weil driba weniga gredet werd? versteh i sowos von goa nit.
a nochricht von ana frau de älter woa als i: spiat man an weiblichen orgasmus als frau selba? HOLY JO. oba wie. trottl bleda des nit zu spian, dos wa wild. und des doss man no nie an ghabt hat- es is a ka easy 1. level bei super mario land!! egal ob alan oda mit partner, wenns so weit is, gspiast des. tamisch wild. und jo mog nit jeda lesn: oba wennst a instrument lernst, tuast a fest übn. warum nit orgasmen üben? wos i mi so on mei großartige harfen-karriere rückerinner, bin i beim etüden üben blerentiga dabei gsessn und hobs gschofft. donn schoffens frauen a mit freid sena orgasmen-game zu verbessern. und a mitn partner is des wohl eher a feste gaude. do a buach empfehlung dafia hihi.
Und a wenn des no nie an orgasmus ghabt habs oda no nie sex oda irgendwos: do seids a nit alan. und bevua de sex host lei um sex ghobt zu hoben, host liaba kan. i glab des kennen vü so unterschreiben.
passts ma auf eichre herzln auf& schmiats eichre schultan und gsichtlen brav ein. viel spaß beim turtln, vagessts ma de verhütung nit und den onstond bitte a nit daham liegen lossn! bussis.