warum i a herzlmensch bin
bin gestern nochn ausgehen auf a insta-posting gstossn, des ma anfoch nerma ausn kepfln geht. imma wieda begegnen mir a menschn, de mir sogn „so oag, wie reflektiat du bist. so oag, wie einfühlsam du bist. wahnsinn, wos fa empathie du aufdabringst.“ und hjo, es hot donn schon de eigene lebensgschicht damit zu tuan.
wissts ihr, richtige herzlmenschen, de a herzl aus gold hobn, wirklich in sich onkemen sein, wissn wos se wolln und ondan menschen mit so vü respekt und empathie entgegentretn: de leit sein nit so auf de welt kemen. monche wern lochn & denkn „is ma kloa!“ oba monchn is des eben nit klia.
i bin jetzt so weit, noch echt vielen joan voller lernen, heilen und erleben, doss i sog, i bin a so a herzlmensch woan. oba i bin des nit woan, weil i dauern neidisch woa auf ondre leit und „a so toll sein wollt“. & mit bisi manifestian& guat zuaredn is des donn woan. sundan hab i mir andere herzlmenschen als vorbild gnommen und gschaut, wos se tuan und mi inspirian lossn. und i hab halt anfoch so vü erlebt, so vü gspiat und so vü gsegn. so vü sochn, de eventuell nit des prädikat „schen“ vadient hom. i bin verletzt woan jo. i trau mi zu sogn, vielleicht mehr ols ondre, obwohl des a nix zur soche tuat. auf olle fälle:
i hab mi da selba ausagezogen. mit hilfe von büchern, zeit, fremden begegnungen und quasi der ein oder anderen lehre. so zach es a klingt, bin i oft irgendwo gsessn, hab mi gfragt „und jetzt?“ und es universum hot ma a deitliches signal gschickt. und manche signale hob i tausend mol ignoriat und nochn 1001. mol auf de pappn fliagn, hob i ma gedocht „ok jetzt geh i mol den ondan weg“ und zack, hot es funktioniert. oba i kennt nit behaupten, doss mi do a ondre person ausagholt hot aus dem loch. do woa ka beziehung, de mi gerettet hot, ka freindschoft, de ma den holt geben hot. des woa i, gonz alan.
und dann hab i kurz a phase ghabt, 2018, de i nie mehr haben will, oba in der bin i wohl kurz stecken geblieben: i bin so woan wie de leit, de ma weh geton hom. du willst mei telefonnummer? hon da mit obsicht de folsche gebn. mein nomen? hon i ma grod ausgedocht. dei bezahlter drink? werd mit an „danke“ und bussi links winkend angenommen& den obend hob i nerma gredet mit dir. du bist liab zu mir? auf vadocht, doss du mi vaoaschn werst, hob i da glei mol dreizehn gründe gebn, zum gehn. bist du nit selba gongen, hob i mi vazupft. is ma a girl mit neid begegnet, hob i ihr schiach gebn und ihr des a no einedruckn miasn, doss sie jo schwächer is. i hon do grod dein ex on da hond& dia tuats schiach? a snapchat storie woas wert. es hot ma kurzfristig getaugt, so vü bessa wie ondre zu sein. anfoch WEITER im thema selbstliebe zu sein.heit bereu i es zwoa nit, oba denk ma so: NIE MEHR.
heite hob i do a gooooonz ondres mindset: erstens, vagleich i mi mol mit kan mehr. sorry, oba sobald mi a mann mit ana andan frau vergleicht und den fehler noch mocht und mir des sog: bitte bua nimm des ondre girl, weil fia mi is des schon wieda unintressant 🙂 wenn i merk, a girl sig mi als konkurrenz tuat se ma eher lad, als doss i ma denk „ma geil!“ und i wünsch ihr anfoch lei, doss se sich mol selba lieben werd. i hob mi ENTSCHIEDEN, einfühlsamer und liebevoller zu sein, als de leit, de ma weh geton hom. i hob mi entschieden, menschen, de in situationen stecken, de ma vadommt ähnlich vuakemen, zu helfen und meine tipps senen zu gebn. des is a reine entscheidung von mir und natürlich miast i des nit machen, aber hey: nur geheilte menschen kennen ondan menschen bei da heilung helfen. mitgefühl is sowos wichtiges! und a mensch, der selber mit sich kämpft, konn fia ondre ka mitgefühl aufbringen! es gleiche mit da liebe. und i merk jo selba, doss i lei freind*innen mehr haben kann, de ma mitgefühl entgegenbringen, a wenn se de situation nit verstehen/kennen.
bisi ehrlichkeit: viele probleme sein ma SCHEISSEGAL. wirklich. wenn a mädel in ana gsundn beziehung steckt und ma heite schreibt, sie is so eifersüchtig, weil er mit seiner besten freindin essen geht. donn greg se ka „i vasteh di maus, es is nit anfoch, oba er macht nix falsch!“ nachricht mehr. sie greg a „oabeit an dir selba und sei nit so unfair ihm gegenüber!“ nachricht. weil i bin in dem fall liebevoll genug, doss i ihr antwort und dann a noch an ehrlichen rat gib. doss der rat nit so schmusig und schen is, wie se sich des erhofft hat.. naja man darf schon erwarten, dass i nit applaudian wer, wenn man sich selber in de opferrolle steckt oder? warum mir so viele dinge egal woan sein: wenn i mi in jede storie von jeder followerin oda freindin einefühlen tat, wa i hin. bin schon an dem punkt gwesn und da hat mi da mister damals 2021 angschaut und gsag „mach nie mehr a problem von ondan zu dein. weil i daschau ma des nit an!“ seine woate woan nit schen, oba ehrlich. und i bin so dankbar. bis heite ruaf i ma imma wieda ins gedächtnis „es is sena kaffee, es DARF dir so egal sein“. und des darfs eich a: wenn eia freindin imma es selbe theater mit an boy hot und ihr anfoch kane worte mehr findets. ihr diafts des a sogn. weil wer gibt da freindin es recht, eich ständig olles einezudruckn wos eich nit juckt?
daweil i de zeilen tipp, follt ma wieda ein, doss vor anigen monaten a männliches wesen (sehr aufdringlich und daher seelisch unattraktiv) mir an meterlangen text verfasst hat, wie oag es eigentlich is, was i da fa oabeit leist. und wie unfair es dann aber auch meinen leser*innen gegenüber is, doss i nit mei eigene geschichte dazelt. but.. why?
es tuat nix zu sache, wer mi wie wann verletzt hat. es bringen eich de namen und hintergrundstories nix, ausa doss eicha vermeintliche neigier gestillt werd. grad gestern is wieda a mädel, des mi zwar in echt kennt, aber dennoch nit guat kennt, in meine dms geslidet „he wo isn dei freind?? olls guat bei eich?? is do nix mehr? warum redest nit driba“ und naja.. muss i mi aklean? na muss i nit. und i liebs wenn auf mei antwort, doss i mi dazu nit äußer a „i wollt nit unhöflich sein!“ naja, höflich wolltest holt a nit sein? 😀 (info: i bin single. glücklicher single) und es is jede geschichte, wie i sie dazel, fia olle menschen verständlich und spürboa.. wenn man des will. leit solln meine zeilen lesen und sich verstanden fühlen oda irgendwos draus mitnehmen. und daraus mitnehmen man i nit, doss man infos aus mein privatleben mitnimmt 😉
vergessts nit: ihr kennts nit wissen, wie es ana person im moment geht. wos wenn man gach voll liebeskumma hot& ihr neigrigen wesn slidets eina mit „HE WOS IS MIT DEIN EX?“ Oda jemand macht grad wos schlimmes durch und du „dei foto letztens.. host zuagnommen? wos los?“ äääääh wir tuan sowos nit ok! und deshalb: wenn ihr nix liabs zum sogn/ schreibn hobs, des eher lei neigierde is, spoats es eich liaba glei. und kritik& unnötig gemeinsein is a a untaschied 🙂
anbei noch da post: lests ihn, teilts ihn und hjo. vagessts anfoch nit: jeda hot sei packl zu trogn und man kennt oft de gschicht dahinta nit. daher sollte man jedn noch mehr verständnis/respekt entgegn bringen, weil man echt nit was, wos de person grod durchmocht!
i hoff, ihr seids schon herzlmenschen oda seids am weg dohin. bei mir hots a long gebraucht. und wenn ihr grod in der „i lieb mi selba und finds geil, auf olle zu scheißen!“ phase seids, willkommen“! De phase is genauso wichtig und guat. tuats ma do lei nit ondan leit weh, de karma watschn is echt grausig. kennt i a a liadl davon singen. oba wie gsogt, de storie is guat on sich, ohne gewisse infos.