wer i gern wa.

wer i gern wa.

10. Dezember 2021 1 Von Laxobu

imma wieda stell i ma de frog, wer i eigentlich gern wa. und wos soll i sogn; lests selba.

wer i gern wa? i wa gern a donkboares wesn, des de klanstn sochn schätzt und jedn mensch, der in ihrn leben is, wertschätzt. i tat gern ausn stehgreif ima glei drei-vier sochn wissn, fia de i donkboa bin. außerdem wär i gern a grundstimmung-glücklicher mensch. also ka perfektes wesn, des lei glick hot im leben. sundan, doss i durchaus optimischtisch-positiv, aber immer realistisch durch de welt steig. doss i es guate in den menschn sig und zu leit imma bisi mehr liab bin, als muss. weil zliab konnst kaum sein und du wast jo nie, wie es an menschn wirklich geht. wennst der person liab begegnest, konns ihr lei bessa gehn noch eichra begegnung. genau so a person tat i gern sein: wo man gern hingeht, weil se good vibes vasprüht. leit solln a guats gefühl neben mir hom, mit an grinsn ham foan von mir und wenn i se umoam, solln se spian, doss i se imma gern a sekunde zlang und zfest holt. weil i jo nie was, ob des unsa letzte umoamung woa. leit solln ham foan und a lächln im gsichtl trogn und zu ondan leit sogn „Ba ihr bin i gern. do fühl i mi wohl“. i wü de definition von daham sein. i wü, doss de leit mi gern auf senan beiforasitz hockn ham, weil i so a funny musikmaus bin, de carpoolkaraoke als olympische sportart sigt. i wü, doss wer auf mein beiforasitz slidet im wissn, doss i de person sicher hambring oda wenns lei fia an kurzn ratscha is: doss wir kurz de welt hinta uns lossn und uns lei auf uns konzentrian. doss de worte de do folln, nit weita getrogn wern, sundan lei im herzln londn. in mein herzln, des so groß is, auf des i so guat aufpass und wos anfoch gold wert is. i teil komplimente aus wie flyer, weil i was, se kostn nix. weil a „du strahlst richtig.“ „i find dei oat so toll „Danke doss du in mein leben bist“ anfoch NIE zvü sein konn. liabe worte kostn nix, a danke schon goa nit. deshalb sog i de sochn a gern und oft. i moch ondan gern komplimente, weil i leit gern lochn und strohln sig. wenn se so rot wern, weil ma aufgfolln is, doss sie fia ihrn eyeliner heit sia zwanzig minuten länger gebraucht hot. soll er ruhig wissen, doss ihm de foab rot supa steht. & doss seine sterndlan in de augn sia noch de richtige frau begeistern wern. i wü a person sein, de nit sich selba mit ondan menschen vergleicht. weil i was, i kann nit so a gebronzte haut haben, i werd nie so schene lockn haben oder mir passn nie im leben diese art von kleidern so wie ana frau mit 1,80. oba des is jo egal? i wü, doss es mir egal is, doss i etwas nit bin, weil es genug sochn gibt, de i bin. i will ka energie mehr verschwenden müssen, um mi zu vergleichen oder um gottes willen.. mit mir selber im unreinen zu sein. es leben is doch zu wertvoll als mir selber immer wieda zu sogn, i bin nit genug. i will a person sein, de ihr leben lebt und es liebt. und es leben so lebt, wie sie es will. und nit wie es ondre wollen oder fordern. wer konn mir wos? wer zohlt meine rechnungen? wer schaut, doss i glücklich bin? wer frogt mi, wie es ma geht? I SELBA ALSO DEAF A I ENTSCHEIDEN WOS I WILL. i will so glücklich und so zfrieden sein, doss, wenn mi leit onschaugn, se des a wollen. nit weil se neidig sein, sundan weil i inspirierend bin. quasi a wandelndes pinterest. i wü, wenn i loch, doss i de leit onsteck. doss se de wärme ums herzl spian, de i a spia. i will lernen zu akzeptian, doss nit olles im leben rund laft und des ok is. i will aus meinen fehlern lernen und aus schlechten situationen gestärkt ausa gehn. i wü mei ongst gegn neigirde austauschn. i wü durch meine fehler wochsn und i wü generell ständig weiterkemen, nit stehn bleibn. i wü so vü vom leben und vor allem ans: es genießen und lieben.

folls sich jetzt wer frog: larissa, wos willst du? du BIST de person. donn muas i fost mit a poa freidntränen grinsn und da recht gebn. i bin de person. und de bin i vadommt gern :)) bussis.