mei ende, mei onfong

A Mädel hot ma vor kurzem a story dazelt und i hon ma gedocht „Moment, des klingt wie mei story“. Endlich hon i gmerkt,doss mei story eigentlich die story von vielen is. Lei viele dazelen nix.  Es geht um de Trennung. Und genauere infos gibs do nit driba, wer, was,wie. Drum geht’s nit, es geht um so vü mehr.

Warum i nit genauer auf de trennung eingeh? Weil es nerma was. Is irgendwie wie bei ana geburt (glab i holt). Weil i was echt nerma welche worte gfolln sein. Wie long des gedauat hot. Wos mei erste reaktion woa (vermutlich losblean?). Wos de argumente woan. Wonn er gongen is. Wonn i es erste mol aufghert hon zu blean (i glab 2 Wochn später). I was a nerma den wirklich fixen Zeitpunkt, wo i gwusst hon: ok olles vorbei. Weil es anfoch nit so schnell vorbei woa.

I hon riverdale durchgsuchtet. 2 oda 3 staffeln. I hob kaum wen von da trennung dazelt. I hab auf insta olle fotos gelöscht und mi im bett vakrochn (urlaub sei dank). Es gibt leit, de hom erst zu weihnachten afoan, doss i alan bin. Alan und 10 kilo leichter. Und ondre frisur (klischee.) mir woa es so peinlich. I hon mi gschomt valossn woan zu sein, weil i gwusst hon, i hätt es verhindan kennen. Meine güte, woa i a wrack. I tua ma heit imma no selba lad, doss i so a hormonbombnweibl woa. Wos I gebleat hon. Wos I gschriebn hon. Wos I ghofft hon.
Mei umfeld woa suppa. Hom mi in ruah glossn und donn doch wieda aufgweckt. Lei woa de erste fuatgeh partie ohne ihn holt a tränen meer. Wie oft bin I neben freindinnen blerentiga gsessn? Wie oft homa fria ham miasn. Amol hon i in an restaurant iba mei (unberührtes) essn so gebleat, doss da kellna gmant hot, es essn woa so grausig. I hob mi nerma gspiat. I hob nix mehr gfühlt, weil i so la woa. Zwischn meine liebsten woa i anfoch einsam. do hon i a glernt, wos alan und einsam unterscheidet: da schmerz.

Egal, wos de leit sogn: doss a trennung lei 2-3 monat dauan darf. Doss es da donn bessa gehen muas. AN SCHEIS MUAS ES!! Wincent Weiss hot a gmant, a Joa reicht, um se zu vagessn. Bullshit. Wer 4 joa braucht, braucht des holt. I hon noch 4-5 Monat wieda gedatet. Vermutlich woa i nit bereit, oba mei date woa a sowos von erbärmlich. A typ, der extra laut über seine witze locht, damit man nit hert, doss er alan locht. Donn hob i natürlich IHN wieda vamissn miasn, weil seine witze jo wenigstens lustig woan. I hab dann erst 10 monat später an bua näher kemen lossn, lei um wieda zvü einezuinterpretian und den donn erst recht stehn zu lossn. Donn woa eigentlich nix. Am ende woa i (mit kurzer peinlicher phase) eigentlich 2 joa alan. Über 2 joa. Und donn sowos von bereit. Und des hon i gspiat. I bin onkemen. I hon mi selba gfeiat und megn. I hob des alan sein genossen und es leben woa guat. Donn is a vadommt guata kerl vorbei kemen und i woa bereit.
Gonz ehrlich wer noch 2 monat single sein glei wieda in a beziehung hupft und nit selba zrechtkimmt, wird wieda a trennung gspian. Gonz wichtig: Er/ sie konn eich nit richtn und rettn. Des wird so oda so in de hosn gehen. Liaba obwortn und de wundn so heiln lossn, doss man lei mehr gooonz a zoate noabn sig. Nit de eitrige wundn glei aufkrotzn und wundan, warum des nit schena wert.

Leit sogn a an, wos man noch ana trennung nit tuan deaf. Zum beispiel nerma sex hom (Nie wieder sex mit der ex lol). Oba wos is, wenn man den sex anfoch braucht? A letztes mol, um zu wissen, des woas jetzt? Des letzte mol schmusn und de lippn gspian, weil man se echt nie mehr spian wird. In den bussl liegen donn 2 joa beziehung (oda 4 monat oda 32 joa wer was).
weil sei endgültiges „pass auf di auf“ hot mi donn vermutlich echt grettet.
und mi gehen lossn. Und i hon mi dronn gholtn. I hob auf mi aufgepasst. So guat es geht. Ok. Frankreich wo ka glanzleistung meinerseits. Oba des pass auf di auf hon i noch im hintakepfl. Bisi so wie opa sei „tua da a tiachl uma“.

Noch ana trennung schreibt man gern amol an zwa texte, de man vielleicht wochen später nerma schreiben tat. Oba man schreibt se. Bis de ondre person an blockiat. Wos irgendwie a schutz is. Heit was i und empfiehl jedn: briaf schreiben und nie obschickn. Hoffentlich findet niemand de briaf und schickt se ob so wie von da Lara-Jean Covey von To all the boys i loved before. Obwohl mei ollaollaollaletza briaf on ihn a danke is.

Es tuat nerma weh. I vamiss di nerma. Heit mocht olles an sinn, wos domols sowos von goakan sinn ghobt hot. Sorry fia de gonzn umstände. I wollt da nie so weh tuan, wie I wohl geton hon.

Von da traua, vom grant und der fassungslosigkeit is nix übrig geblieben ausa dankbarkeit und an potzn nostalgie. Oba lei bei gewisse liada und frenchtoast mit duplo. Oba des is guat so. wir denkn jo a noch olle on unsa BFF ausn Kindagoatn und welchen Rucksock se ghobt hot. Wir erinnern uns a on unsan ersten schmuspartner. Nostalgie schadet nie.

I bin dankbar. Weil ohne de trennung tats den blog nit geben und omg der is schon mei baby. I hob mi so geändert. Jeda der mi in der beziehung gekonnt hot konn mi vermutlich heit immer noch nit megn, dabei bin i heit so a siase maus!!! I woa a grantnzipf. I woa a neidige kuah, i woa nix, ausa nit wirklich i.

Wos lei zach is: wenn da deine fehler bewusst wern. Irgendwonn sitzt bei an Caramel Latte auf da Terrasse und merkst, du hättest des nie sogn soll zu ihn.

Beim Bockn von apfl-zimt schneckn checkst du, doss du vü mehr zuahern hättest solln. Wenn de in Frankreich bist, verstehst du erst, doss du SEINE tränen trocknen hättest solln. Unta da dusch schiast da aufamol, doss er goa nix dafia hot kennen. Du merkst, doss du sei leben so schwa und schlecht gmocht host, oba du konnst di anfoch nit entschuldigen. Warum? Weil er des anfoch nit hern will. Oba doss de ihn sein frieden losst und ihn in ruah losst- des is entschuldigung gnuag. Doss er gehen hot kennen und sich jemanden suach hot diafn, der ihn a so richtig verdient, des is es anzige, wos du ihm geben konnst. Und a doss, du ihm echt lei es beste beste beste wünschest. Jede frau, de danoch kimmt is wos bessas als du. Du wüst, doss er niemehr so leidn muas, wie ba dir.
Dafia willst di entschuldigen, bis de gecheckt host, des tat ihm nix bringen. Und do geht’s nit um di. do geht’s lei um ihn oda sie.

Warum i des schreib? Weil i domols so gern wos über echte, rohe trennungen glesn hätt. I hätt gern gwusst, doss olles OKAY is. Mei blean, meine gedonkn, mei trauer. I hoff so, doss i a poa leit helfn konn. Gern hätt I echt so a fremde person im internet gfundn, de ma do an holt gibt, den ma grod kana gebn konn.
I kenn den ex-partner von dir nit. I judge nit. I verurteil nit. I bin lei fia di do, als leidendes wesn. Ok? Weil des kennen freinde/ eltern/ gschwista oft nit. Schnell sog wer „Maaa i hon de/n e nie megn.“ Oda „Du bist selba schuld!“ oda „Des wert schon“.
Na es wert nit schon wieda. Des is an haufn oabeit, mit vü tränen und so vüüüüü aua. Oba am ende zohlt es sich aus.

Jetzt fühl oba erst amol ordentlich. Aufmunterung braucht man de ersten 1-2 Wochen anfoch nit. Es muas da kana einreden, doss es ok is. Des wüst jo nit hern. Du wüst anfoch trauan als wär wer gstoabn. Und gonz ehrlich, a ordentliche trennung fühlt sich a genauso on. Es is so. de person wird aus dein leben grissn und dei olltog is nerma da gleiche.

Oba es wird bessa. Irgendwonn. Fia di. du werst irgendwonn wieda otmen kennen, wos du grod nit so wirklich konnst. I was. Glab lei bitte dronn.
Ohne witz, wenn i hinta denk, hon i diese phase von trennung und selbstfindung genossen. I woa so ruhig. I hob wieda gspiat, wos leben hast, wos atmen hast. I hob mi so oag mit mir selba beschäftigt. Es woa a zeit, de vielleicht nit freiwillig woa, oba sie hot wos gnutzt.

Es is vorbei. Es is obgschlossn. Es bleibt nix ausa dankbarkeit. I tat nie im leben bsoffn um 3e in da fria ihn onruafn. I tat nie mehr vua da tia stehn. Goa nix. I tat vermutlich obhebn, wenn er onruaft. Oba lei, weil de numma nerma eingspeichat is.

Ohne de trennung tats den blog nit gebn.
ohne de trennung tats de bessere version von mir nit gebn.
ohne de trennung tats ma heit nie so guat gehen.
Und genauso sollt jeda iba a trennung denkn.

Jede trennung is a a onfong.