Bin i bereit?

Bin i bereit?

28. Oktober 2020 0 Von Laxobu

De Froge sollte sich jeder stellen, der kurz vor der Entscheidung steht, sich zu binden. also a Beziehung einzugehn. Und gonz ehrlich? I hätt mi a liaba fria a poa mol gfrogt: Bin i bereit fia des olles zomm? Bitte fühlts eich nit zum Kepfl gstoßn, wenn ihr des gefühl hobs, ihr seids laut meinem text no nit bereit oba ihr seids schon in ana Beziehung oda ihr wollts trotzdem mit der Person zommsteigen. I schreibs trotzdem. Ätschpätsch.

Bin i bereit, in a Beziehung zu steign? Bin i bereit, des volle Programm zu mochn? Weil holbe Soch is a Beziehung niemols und wer des ondas sig, der sig Beziehungen folsch. Gonz oda goa nit.

Bin i bereit, mir ZEIT fia de ondre Person zu nehmen? Also neben meine Turnstunden und Musikproben und da Londjugend brauch i jetzt a noch Zeit fia a Person mehr. De konn i nit obspeckn mit amol de Wochn 30 Minuten treffen. Des hast eventuell muss i irgendwos aufgeben oda kiaza tretn. Bin i dafia nit bereit? Jo muss i a nit, zwingt mi kana. oba donn konn i grod ka Beziehung führen.

Bin i bereit, zu OABEITN fia a Beziehung? Also nit lei Schatzi, Sex und Bussi. I muas eventuell meine Onsichtn präsentieren, Argumente sommeln und Diskussionen führen. I muas wissen, doss nit jeder Monat so valiebt is, wie da erste. De rosarote Brülln sollte man schon vorab a bisi putzn. Bin i nit bereit, über mein eigenen Schottn zu springen und Dinge tuan, de i no nie geton hob und ob und zua nochgeben? Donn tuats ma fia mi selba lad, oba a Beziehung geht grod no nit.

Bin i bereit, mi zu 100% auf de Person einzulossn? Des geht lei, wenn i mi selba echt lieb lieb. Bin i mit mia zfrieden? Schaug i mi in Spiagln und kennt mi obschmusn? Find i meine Fehler voll ok und bin mit mia im reinen? Weil in da Beziehung hom Selbstwertkomplexe und Selbstzweifel kan Plotz. Nur wenn i was, wos i wert bin, konn i drum a in da Beziehung kämpfn/ schaugn. I muss mi voll auf de Person einlossn, auf sie baun. I konn lei wen vatraun und echt megn, wenn i mi selba holt a volle mog. Bin i noch mehr beim „Mei Partner soll ma a guats gefühl geben“ sollt i noch hintn tretn und erst den Selbstliebe-Weg gehn.

Bin i bereit, de ondre Familie kennenzulernen? Bin i bereit, meine Ängste und Sorgen zu teiln? Bin i bereit, ob und zua mehr zu gebn als gregn oba donn wieda mol mehr zu gregn als i geben konn? Bin i bereit, an Lebensverschönerer in mei Leben zu lossn?

Bin i echt bereit?