Du werst erwochsn. I werd olt.
Mei Schwester is de Woche 19 Joa olt woan. Bestimmt nit de geilste Zeit um Bday zu feiern. Dennoch hon i des zum Onloss gnommen, um über des Erwachsen/ Älter wern zu schreiben. Klingt vielleicht bisi fad, i vasprich, es wird nit fad!! Eigentlich gehts a um de Beziehung zwischen Geschwister mit der Zeit. Se reift irgendwie.
Wissts ihr, wenn mei Schwester bereits 19 Joa olt werd.. doss i rein theoretisch NERMA 19 bin? Also, doss i eigentlich wirklich richtig erwochsn bin. Am Papier und in reallife holt. Fühlen tua i mi oft wie 14, benehmen ob und zua bestimmt a. Oba objektiv betrachtet bin i mit meine 22 anfoch a Erwachsene.
Obwohl i jo eigentlich dafia bin, doss Menschen an Führerschein fürs Erwochsensein und a fias Elternsein bräuchten. Bist du fähig, an Wohnbeihilfeantrag richtig auszufüllen? Konnst du ungefähr einschätzen, wie vü Geld im Monat du für Essen und nit lei Alkohol ausgeben konnst? Wast du circa wos zu tuan is, wenn de Sirene 3 Minuten durchgehend den selben Ton von sich gibt? Du musst do an Radio einscholtn oda an TV. Und i konn aus Erfahrung sprechen, doss i anige Leit kenn, de bades nit hom und nit wüssten. wos se tuan miasn. OBA I SCHWEIF OB.
Für des richtige Feeling de richtige Musik:
DU NERVST
Huch, de Phase woa ima recht onstrengend. Fia de Eltern und fia olle Beteiligten anfoch. Diese Phase, wo sich de Gschwista mehr „hossn“ und irgendwie lei onzicken und nerven. Zwischen Schwestern konn des schnell amol ausarten. In de irrsten Zickenkriege.
Do fladdast.. na du LEICHST da a Jackele von da Schwester aus und daham erwoatet di a Drama á la Heidi Klum.
Bist amol so frech und schnappst da de letzte Müchschnittn ausn Kühlschrank. BUM sie bleat.
Vorollem in da Pubertät sein diese nervigen Zettereien am Tagesprogramm. Obwohl a im Kindergartenalter hat man so a Phase, wo man nit den klanen Hosenscheißa beim Sondkostnbaun dabei hom wü und a nit mit ihr zomm bodn gehn wü. Außadem findet man Partnerlook doof, den man später komischerweise volle feiert.
HÜFST DU MA MOL?
De Froge herst du gefühlt 9 mal am Tog. Sie braucht Hilfe.. BEI OLLEM. Ihr Lockn mochen, welches Leibl se onziagn soll, wos sie dem Bua hintaschreiben soll, welches Getränk se bestellen sollte und welches Getränk eben nit noch Speibe schmeckt. Hier mein Tipp, sobald die Kleinen 16 sind- Hollerol oda Hugo. Maybe siasa Spritzer oder mei heißgeliebter V-Spritzer. Donn mit 18 am besten Malibu Orange. Zags eichan klanen Gschwistan nie den Genuss von Haxenspreitza, auf des miasn se selber kemen. hihihi. Sie brauchen Hilfe bei da Hausübung, beim Projektausoabeitn, beim Streit mit da BF oda a beim ersten Mol Onlinebestellen. Wie man online Geld einzohlt, zag man senen. Wie se a Auto datanken, zag man senen. Wie man sei Makeup auftrogt, ohne wie Donald Trumpi auszuschaugn, zag ma senen. Welcher BH bequem is und wie des mit Tampons hinhaut, aklea ma.
Du bist a vadomt wichtige Stütze in der Zeit. Ohne di hätts de Klane nie so guat ghobt. Weil wer will schon von alan draufkemen miasn, doss a weiße Hose in den Erbeerwochen KA guate idee is? Wer will schon von alan draufkemen miasn, doss selbstgefärbtes Blond nit wirkliches Blond is? So du bist a keeper.
NIE MEHR OHNE.
Du bist a keeper. Aus Schwestern wern Freindinnen. Richtig guate, Maybe beste. Obwohl se di vielleicht nerma „braucht“ in jeder Lebenslage und so guat wie erwachsen schon is, bleibst du. Bleibt sie. Bleibs ihr ihr. Ihr foats weiterhin zum Mci, wo du weiterhin zohlst (schwör des werd sich nie mehr ähndern), wo sie sich wie immer 2 Cheesis eineklescht und noch ungefähr 3200 Kalorien und du nippst on dein Coffee. Sie werd weiterhin beim Fuatgehn kurz zu dir schaugn, bevua se e wieda a Malibu oda maybe gonz wüld an Frosch bestellen werd. Se werd da weiterhin jede klane mittelgroße Fetzerei mit Freindinnen dazelen, de in zwa Tog wieder gessn, vadaut und ausgsch.. sein. Weil des anfoch es normale Leben is. Du bist in ian Leben, sie in dein. Du freist di jo jedes mol, wenn se di frog, ob ihr wos machts. Oda wenn se di um Stylingberatung frogt. Weiße oder hellblaue Schuach? Maus, du saust JEDEN Schuach, egal welche Foab sowos von ein.
Und noch kurz: es kommt amal a Phase, wo de Klane groß is und di auffongt. Wenn dei Welt sich auf amal nerma draht, sei es a Trennung oder irgenda schlimm einschneidendes Erlebnis, holtet sie di. Solong und so fest bis es wieda geht. Bis du wieda daotmest und dastehst. Am Ende von jeder schweren Phase merkt man erst wie wichtig die Menschen um uns uma sein. ❤️
Wir wern olle älter, erwochsener. Wir olle verändern uns. Somit a de Beziehungen, de wir führen. Oba irgendwie bleibt immer a Stickl Kindheit in dem Lochn von da klanen Schwester. Oda etwa nit?
Und jetzt herts nochmal des Liadl an und denkts gonz fest on de Person von fria. Egal. ob Schwester, Cousin, Abf, Nachbar.. Bisi Liebe im Herzln und schreibs der Person. Wir vamissn uns jo olle volle fest. Bald diaf ma uns wieda olle im Oam hom. ❤️
Is a eigener Blogpost wert, oba des sog i trotzdem jetzt noch: Segs ihr jetzt endlich, wie wenig selbstverständlich der tägliche Kontakt mit unsern Lieblingsmenschen is? Wie donkboa wir sein sollten? Und wie schen des olles zomm eigentlich woa und bold a wieda is. A Zeit des Lernens is des, des sog i eich.
