Anfoch so
Oft verlieben wir uns& merken erst vü später, doss des Gefühl do im Bauch mit Liebe zu tuan hot. Es dauert anige Zeit, bis ma checken, wos unsa Herzl wü. Manchmal Liebe aufn 1. Blick, manchmal Verliebt nachn 5. sight. Liebe is kompliziert, Liebe is anfoch so.
Es konn da leida kana sogn „Des is jetz de Person, dei Person.“ Des konn anfoch kana wissen. Oba dei Herzl werd da do schon weitahelfen. Mia kumt a fua, du konnst es donn a in seinen* Augen oblesn. Sigst du do drinnen Sternlan? Donn konnst fost davon ausgehen, doss sei Herzl es gleiche mant.
Eigentlich miasts ihr zwa eich des gonz anfoch ausreden, oba nur eigentlich.
Weil es gibt a so Situationen, do is es goa nit nötig, des Reden, also da Gebrauch von Worten. Manchmal reicht schon da Blick alan oda de Hond, de deine suacht oda konn a deine sein, de noch da ondan greift. Gonz gleich. De Momente sein so kurz, wirken so surreal und sein intim. Bold werst drauf hinta denken. Mit an schwaren Herzln vielleicht, weils nerma so is. Oba wennst ana von de Glücklichen bist, konnst mitn leichten, verliebten Herzln zruck schaun und im gleichen Moment de Hond suachn und in de Augen schaun. Donn findest imer noch de Sternlan und spiast des Kribbeln im Bauch, des amol ausnohmsweise nit da Hunga is.
Wie gsog, kana werd da aklean, doss des jetzt de Person is, mit der du für a Weil, a längere Zeit oda vielleicht a fia immer glücklick sein werst. Mit der Person teilst ob jetzt olles. Von schlechten Togen voller Unwetter und Dramen bis hin zu schenen Zeiten voller Lachen und Sonnenschein. Kana konn da des garantieren, oba her do mol auf dei Herzl und auf des vom ondan. Schlogt des nit a so laut und aufgeregt? Sein de Händ, de du suachst, nit bisi schwitzig vua lauta nerves (nervös)? Und streichelt sei Daumen nit ununterbrochen dei Handl?
Niemand außa ihr 2 werds des so guat wissen kennen. Weil des sich lei zwischen eich zwa Seelen obspielt. Jetzt muast echt amol ohne bestn Freind, Schwester oder wen a immer auskemen und auf di selba baun.
Bin ma oba gonz sia, du sigst des schon gonz richtig.
Bei Unsichaheiten konnst jo mol probian, Worte zu finden. Findest des schwer? Obwohl, wennst schon an potentiellen Partner gfunden host, is des wohl a lei mehr a Kindaspiel. Find amol bei de 7,6 Milliarden Menschen den richtigen fia di. Der a so an Klopfa hot wie du, der dein Humor hot und auf daselben Wellenlinie surft. Donn weast ihm wohl a noch dafrogn, ob er a so fühlt wie du.
Oll de Schmetterlinge, Feuerwerke und Sternschnuppen und des gonze Programm holt, wenn du des fühlst.. Wenn du dir deinen Gefühlen sia bist, wird do wohl wenigstens a klane Konfettischiasarei bei dein Gegenüber a sein.
Hob bisi Urvertraun in di und dein Gefühl. Genieß de Momente, fong se ein und befüll imaginäre Marmeladengläser damit.
Weil wie gsog, kana konn de Momente zruckholen oda wiedaholn. Vorbei is vorbei, de Erinnerung bleibt.
Oba hoffentlich bleibt da de Person a..
*i schreib holt generell in da männlichen Form, weil i auf Buamen steh. Du konnst da gern de weibliche Form mitdenken, wenn du auf Mädis stehst. Am Ende is Liebe Liebe, also bitte. Person is e für bade, oba i mog nit den Lesefluss mit Er/Sie zerstören, ok? <3 <3 <3
