Old school love

Old school love

12. Januar 2020 0 Von Laxobu

Long is her, mei Old school date Beitrag. Jetzt geh ma wieda zruck in de „guatn oltn Zeitn“. Wobei i mi jo imma no frog, wonn de woan und ob des nit lei a Erfindung von veränderungsphoben Menschen is.

Handl holten
Egal, ob vom Bus in de Schual oda zruck. Sobold do wer Hond in Hond gongen is, sein olle Blicke drauf grichtet woan. Manche hom glei Freudenschreie ausglossn, ondre Schreie woan mehr aus Schock. Wer Handl holtet is nämlich zomm. Fix zomm. Donn sein de ASK.fm Seitn der badn voller Frogn gwesn. Seit wonn, wie, wie long. Ach, junge Liebe is jo so schen, oba holt a so kompliziert. 

I hob di lieb
Domols hom Worte noch so a Gwicht ghobt. Druckts ewig uma, weil de nit genau wast, wie sogn. Hoche Stimm, lässig oda goanit? Am Ende hot de Stimm jo e anfoch gezittert und nochn „I hh-oob di ..“ is e schon es Bussl von da ondan Seitn kemen. Später host donn streitn kennen, ob de jetzt lieb oda gern sogn wolltest. Ajo mir hot amol wer erklärt. lieb und gern sein zwa gonz ondre Sochn. Findets ihr des a? I jo goanit!!

Abendliche Telefonate
Täglich um 20.10 klingelt es Telefon. Nur de letzen vier Tog des Monats muasst du onruafn, weil kane Freiminuten mehr. Und donn wird gratscht und Sochn dazelt. Als tat man sich seit Wochen nerma gsegn hom. Dabei woa zwischen dem letzten Bussi lei a holbe Stund Bus foat, a Mittagessen, a bisi Schulzeigs und a Dusch. Oba man muas sich olles dazelen. Ihn juckt es jo, ob du dein Aufsotz mit Füllfeder oder mit Kulli gschrieben hast. Du willst jo a wissen, doss er beim Jausnen an holbn Kilo Speck obegedruckt hot.

Liebesbriefe
I werd wohl nie miad wern, davon zu reden. Solong werd i davon reden, bis mei Briafkastl übergeht vualauta Briaflen. Und eichre a. Obwohl im Jugendolta is es Papier komplett noss zwegs Schmolz. 

Du bist mein, ich bin dein,
des sollt da wohl kloa sein.
Eingschlossn bist in mein
Herzalan,
des Schlisselein hon i 
valoan lei lei.
Muast holt fia imma drinnen bleim.

NUTZT NIX 
I LIEB DI ÜBA OLLES FIA IMMA UND EWIG UND NOCH 
VÜÜÜÜÜÜ LÄNGA

(Original is ausn Mittelalter, wenn wer des nit kennt,)

Wie schnulzig, wie romantisch und Lyricslastig de Briaf imma woan. Hobs des a imma mit Parfum eingedämpft? Extraschmusis hom mit Lippenstift an Kussmund aufegeton, des woa holt Highlevel.
Oba am Ende is de Idee, a Briafl voller Gefühle und schener Woate zu verfassen, anfoch zeitlos und schen. Wärmt es Herzl und mocht a Freid. Außadem is es manchmal leichta Worte zu findn und de niederzuschreiben, als se laut zu sogn..

Monatstag
„Schaaaaatzi, heit seima 2 Monat und 12 Tog zamm. FOREVER.“ Solche morgendliche Nachrichten erfreien es jugendliche Herzl. Rosen kafen, Briaf schreiben, FB Pinnwand vollspamen, tausend Instagramstories machen. A wenn man lei 3 Fotos zamm hat, mit genug Kreativität gehn sich damit 25 Collagen aus!!! Jeder, echt jeder soll wissen, wie long ihr schon banond seids UND WIE HAPPYPEPPY.
A ziemlich lange Zeit hob i donn en Kopf peitln miasn bei solche Facebookstatuse und Aussagen von Bekannten. Wos wichtig is, sein de Joarestoge. Eigentlich is lei wichtig, doss man überhaupt zomm is. Egal, wie long.
Oba derzeit und vermutlich fia imma denk i ma „Schen.“ Als Erwachsene passiast so schnell, doss man vualauta Freizeitsstress und Arbeitswut a poa Wochn long ka Zeit hot, alan wos mitn Partner zu tuan. Donn vagehn 2-3 Monat und donn kimt de Frog, wonn man es letzte Mol a Date ghobt hot. Des Kaffeetrinken mit de Schwiegereltern konnst do nit dazuazählen, des MciDate mit da BF a nit..
Und dieser Monatstag kann uns erinnern, doss man do probiat, sich Zeit freizuschaufeln. I man, am Ende findet sich ima Zeit, wenn man will.
Amal im Monat sich Zeit nehmen und maybe a Klanigkeit parat ham, de de ondan freit, is jo schen. Konn lei a Schokolade sein, oda doss man sich zamm Greys Anatomie anschaut, obwohl ihn des sowos von goanit ziagt.
Togezählerei is unnötig, des woa in da Jugend holt Zeitvertreibt. Oba im tristen Alltagstrott sein Monatstoge fost bisi rettend. Natürlich offline und nit online. 

Rosen beim Fuatgehn

Da Rosenverkäufer is nervig, fia junge verliebte Leit holt da beste Freind. Schnell a überteiertes Bliamle kafn und zack, dei Herzensdame mocht fia di Plotz im Herzln. Oda ihr Freind beißt da de Rosen ob und haut da eine ane. Checkts imma liaba ob, on wenn des Bliamle gehn sollt.
I find es echt sias, wie die Jugendlichen donn durch de Disko schweeeeeeeben und de Rosn nit loslossn. De Verliebtheit ins Gsichtl gschrieben.
Mei Tipp von alten Zeiten: De Rose kopfüber draußen mit vüüüüüüüüüüüü Haarspray einduften und trocknen lossn. Donn konn da Typ sich wieda zupfen, oba de schene Rosn host fia imma.

Freieinheiten

Wennst heit zu jungen Leit sogst, doss du domols 100 SMS und 100 Minuten zum Telefonieren ghobt host und überhaupt kan Internetzugang, lochn se. Wie bitte? Begrenzte Anzahl an Nachrichten? I muss auf de Uhr schaugn, wie long i so telefoniern konn? WHAT.
„Konnst du mi bitte zruckruafn? Hob nix mehr frei.“ „I ruaf di schnell mit Papa sein Handy an.“ „Host a Mailadresse? I schick da poa E-Mails vom Computer aus, weil SMS greg i erst am 1. wieda!“
Und wie oft woan de Handyrechnungen donn zhoch? Zu oft. Donn woa a Teil vom Geburtstags- oda Weihnachtsgeschenk de bezahlte Handyrechnung. Sunst hots Taschengeldabzüge geben. Seids ehrlich, wenn des eire Eltern nit geton hom, liagts ihr!!
Also i schätz meine unbegrenzten Minuten und SMS sowie meine 17 GB Internet SO OAG. Danke liebe moderne Welt fia de Erleichterung. Jetzt kennen de Jugendlichen Tog und Nocht texten und sich schnulzige Messages schicken und GIFs!!!

de fost peinlich oba siasn Geschenksideen von den Müttern

Zu Weihnachten als Schiala is es echt hoat. Wichtelgeschenke fia de Schul und donn noch fia de Freindin a wos. Lösung? MAMA.
Donn findet es Mädchen amol a seidenes Holstuach in beige, wos sie nie trogn tat, untam Christbam. Knallrote Lippenstifte von ana NoName Marke oda a Duschgel wo groß „HAB DICH LIEB“ obensteht und noch Erdbeertuttifrutti riacht. Amol sogoa an BH vom H&M mit Hello Kitty oben. Klassiker sein de BIPA Gutscheine oda Kinogutscheine. Dazu noch klane Schutzengelen und schen gschriebene Koatn, de komsichaweise gonz ondas ausschaugn, als de Schrift vom Freind.
Eingepockt sein de Sochn ima so perfetto. Mit Cellophanpapier eingepackt und mit kunstvollen Schleifelen verziert.
Irgendwie komplett liab, irgendwie schod, doss er sich null bemüht hot.
Sie sitzt dagegen stundenlang beim „52 reasons why i love you“ Kartenset und beim „Open when“ Briefstapel und strickt noch brav Sockn und legt noch an Jahreskalender, selbstgemacht, drauf.

So, wos hon i noch vagessn? Schreibs es ma gern, donn gibs an 2. Teil davon!!

Bussis.