Herzlbrechen kostet Karmapunkte
Mindestens amol, wenn nit sogoa eftas de Wochen trudeln bei mir per Instagram oda Facebook Nachrichten von Mädels ein, de i nur vom Segn her kenn oda a bisi über ondre Freindinnen. Gonz oft mit richtig süßen Worten, wo i natürlich glei wieder zum blean onfongen muss. Wenn i wen mit meina Schreibarei berühr, is olles erreicht, wos i damit erreichen will.
Oba es kumen a immer wieder Mädels mit Liebesproblemen zu mir. Da blea i nit, do ärger i mi eher.
Und jetzt will i ollen Herzlbrechern mol wos dazua sogn:
Warum muss i mit eian Theater beschäftigen?
I versteh es ehrlich nit, warum ihr, während ihr eia Leben lebs, ständig ondan Menschen mit gewissen Worten/ Aussagen oder Aktionen weh tuan miasts.
Die Lena will schon ewig long wos vom Max. Oba da Max holt nit von ihr, weil er im Gspia hot, doss des Mädel mehr als nur Schmusn will. De will sia glei Haus und Hof errichten und sein Nochnomen klaun. Horrorvorstellung fürn Max. Wos tuat er, onstott ihr zu sogn, doss es nix wert? Er schmust beim Kirchtog VUA ihrer Nosn mit ana ondan uma, de nit mol holb so schen is wie sie. Obwohl am Ende find i, is jeder so schen, wie er is. Des tuat da Lena weh. Lena bleat, Lena schreibt ihm böse Worte, Lena will des ane Mädl in de Hölle schicken.
Do kert mol gonz kurz gsog, doss des ane oame Mädel NIX oba goa nix dafia konn. Warum redet die Lena jetzt sooooo schlecht über sie? Sie sei a „Hu*..hn“, sie is hässlich, sie is depat. Is sie des, Lena? Nur weil sie auf den Oasch getroffn is? Glabst, der Typ hot ihr dafua gsog, wos zwischen eich is? Na. Also bitte, dei Grant ghertn Max alan.
Sarah und Milena sein BFFIUE. Also so richtig, seit da Volksschul. Noch da 4. gehn se holt (schulisch) getrennte Wege. Sarah ins Borg, Milena geht Pitz. Trennung 100 Kiometer plus, Sehen tuan sie sich holt weniger. Sarah is positiv gestimmt, will imma wieder de Milena treffen. Milena, de sich schon a neies Leben aufgebaut hat und ihr Kinderfreundin nerma braucht, ignoriert sie anfoch. Anstatt ihr zu sogn, doss diese Freundschaft jetzt nerma bestehen kann, weil die Milena schon imma gfundn hot, doss de Sarah zu egoistisch is. Sie sog ihr des nit und die Sarah steht do verletzt do und kennt sich nerma aus.
4 Joa später treffen se sich auf an Maturaball und schauen sich an und gehen weiter.
I an Milena ihra Stelle hätt zwa Tequilas gholt und mit da Sarah den getrunken und mi entschuldigt für mei kindisches Verhalten, oba jo ok.
Da Sarah tuats bis heit weh, weil de Milena NIE gsog hot, doss des anfoch nerma wert.
In da Jugend 3 Joa in ana Beziehung zamm sein, is echt selten und schen. Oba da Paul mog nerma. Jetzt is er 18 und er hot es Gefühl, sei gonzes Leben verpasst zu hom. De Lisa losstn nämlich nie alan ausgehen. Er foat a nit mit de Jungs Urlaub, weil er sich denkt, sie spinnt donn lei wieda uma. Also verlosst er sie. Ohne Worte, ohne Erklärung. „Is holt amol so.“
Lisa fliagt von Wolke 7 aufn eiskoltn, hoatn Bodn der Realität und versteht de Welt nerma. WARUM? Woher soll sie wissen, doss ihr Bua mehr Freiraum braucht. Sog er doch immer, doss es schen is, bei ihr zu sein.
I was, doss für eich solche Aktionen logisch sein und doss de Leidenden es eigentlich verstehen hättn miasn. Von alan. Oba na, hom sie nit und meiner Meinung noch miasn se des jo a nit.
Ihr miasts schon mit Leit reden, damit sie eich verstehen. Aktionen und zwischen den Zeilen lesen is zu wenig. Klipp und kloa sogn wos los is und aus.
Egal, wie du oft du jemanden etwas sogst, wenn es Gegenüber des immer noch nit verstondn hot, donn is es so, als hättests nit gsog!!
Du willst sie nit daten, weil du grod ka Beziehung willst. Sog ihr des.
Dei Partner engt di zu sehr ein und du willst oba holt echt mol alan wos mochen. Sog es.
Du kündigst de Freindschoft, weil er oda sie di sowos von nit schätzt und es dir zu viel Aufwand is. Sog es.
Und bitte bitte bitte stehts dazua anfoch. Nit im Nochhinein sogn, doss es nit so gmant woa. Wos gsog is, is gsog. Meinung ändern bringt später lei noch mehr ärger.
Herzlbrechen is ka olympische Sportart, meine Lieben. I selber was gonz genau, wie scheiße man sich fühlt, wenn man was, man tuat wem weh. Is fost schlimma, also doss an weh geton wird.
Und wenn ihr es doch echt spielen wollts des Game, spielts es alan. Ramts donn selber den Schas zomm, den ihr hinterlossn hobs. De Tränen wisch i eich auf, de richtigen Worte loss i ma fia eich einfolln und de Entschuldigung wa a noch recht, wenn i de moch.
Sicher nit. Des is eia eigene Aufgob. Wer Herzen bricht, werd sich dafia a ordentlich entschuldigen. Egal ob mit an Getränk, an Strauß Bliamlen oda an Briaf. Des hot de Person verdient, des is es mindeste. Wenn nit sogoa mehr.
Olles kumt zruck, also Vorsicht. Sunst stehts ihr bold mol auf an Zeltfestl mit an Bier üba eian Kopf oder irgenda Psychotante fetzt eich her, Menschen kennen echt bes sein.
Seids bisi liaba zu einonda und tuats ma kane Herzln mehr brechn und wenn, donn klärts des selba und überlossts des nit mir!! DANKEEEEEEEEE.