Wo is des REPEAT Knepfl??
Seids eich amol bewusst, bei ollem wos ihr tuats, doss es vermutlich es ollaollaletzte Mol genauso woa, wie s grod is. Wenn eich des nit zum Blean bringt, was i a nit. Mir is es mol so gongen. Wegen so ana depatn Listn. Ana Listn, de mi fia imma on domols erinnert. Ana Listn, de wohl fia imma unobgearbeitet bleibt.
L& J. Dick und doof. Blond und blonder. Wild und wilder. Arbeiterin und Studentin. Zwei Seelen, a Herzl, a Hirn. Zwischen dem Singleleben feiern und dem Wunsch, in festen Händen zu sein. seima Hond in Hond durch de Weltgschichte ghupft. Hom gschmust, hom glocht, hom great, hom jede Nocht zum Tog gmocht. Oft seins zomm ham, selten zommgekrocht. Der Herzschmerz woa groß, wie sich a Teil des Bandes entschieden hot. ins Auslond zu gehn. Donn is a Listn entstondn. Auf der olle de geiln Sochn stehn, de se zomm amol erlebt hom. Und wieder erleben wollen. Bis heit is de Listn fost unberührt. Steht im oltn Kindazimma, na sorry, vastabt im oltn Kindazimma. Warum? Weil de zwa vagessn hom, doss man gonz tolle Momente nur amol alebn werd.
Du schmust nit zwingend 2-3 Mol mit den siasn Kerl. Und wenn, donn is es zweite Mol nerma so magisch, wie es erste Mol. Ihr stehts vielleicht wieda draußn, oba ohne Bienenkostüm und ohne Sternenhimmel. Nerma es gleiche.
Du isst amol Frigga mit den Jungs daham. glab ma, beim nächsten Mol sein nerma genau de Leit banond und wenn doch, wern de Gespräche nit zwingend genauso tiaf sein. So bewegend, so wichtig.
Du stehst lei amol im Leben auf so an beschissenen Higel mit Freind und schaugst auf eicha beschissenes Örtchen oba. Joare später merkst. doss des Örtchen goa nit so schlecht is und doss des domols kane Freinde woan. Oba do obn stehst nie mehr mitn gleichn Gfühl.
Jeda Rausch, jede Party, jede Umoamung, jede feine klane Runde. Olles hot sein eigenen Stempel. Mit an Oblaufdatum. Wenn du ham gehst ins Bett liegn, is de geile Nocht vorbei. A wenn in dein Bauch des verliebte Kribbeln bleibt, vermutlich werd da Typ bei dir a One Hit Wunda bleiben. Irgendwonn werst a auf da jährlichen Xmasparty nerma glücklich sein, obwohl de sunst dafia gebronnt host.
I bin jo schon so geschädigt und verängstig, doss i auf Veranstaltungen, de amol a richtig wertvolle Situation fia mei Herzl woan, ka zweits Mol hingeh. Weil i was, doss i auf den Partlumzug kane Sternlan mehr in seine Augn find. Weil mi was, doss am Gschnas niemand mehr meine Öhrchen und a mei Herzl fladdan werd. Weil i was, doss i nerma mit an Erdbeerklopfa die Aufmerksamkeit von DEN Typen greg, der sich 3 Tog später nie mehr meldet. Es gibt Sochn, de sein guat oba aus. Amol wos schens erlebt, gib i mi zfrieden. Aka: Wenn es am schensten is, is Zeit zum Gehn. Oda so.
Richtig schiach woa de Berufsschulzeit. Do hon i schon in da 6. Wochn Herzlweh ghobt, weil i gwusst hob, unsa Zeit is sowos von begrenzt. Nit dronn gwehnen, sunst tuats lei no mehr weh. Vadammt.
Kana konn uns Zeit hintagebn. Kloa konnst wieda de gleiche Runde organisieren oda aufs gleiche Festl gehn. Oba es konn da kana vasprechn, doss des wieda so a Gaude werd. Nit amol da Wein werd mehr da gleiche sein. Olles is doch lei temporär. Gewisse Begegnungen sein Einwegprodukte.
Bevua des jetzt zu depressiv wert, bitte durchotmen. I weck eich jo lei auf. Ihr sollts eia Zeit genießen. Wie an guat gmochtn Cappu. Nit in an Zug obeexn, sundan geniiiiießen.
Zeit verschwenden mit Leit, de man nit so mog, is sinnlos. Zeit vergeidn mit ana Situation, in der man unglücklich is, hot kaum Sinn.
J& L gibt es immer noch. Die Erwachsenenversion, quasi Staffel 8-9. Die Treffen finden untertags statt, aus Bacardi Cola is Tee woan. Jetzt sein die Zukunftspläne, Wohnungsideen und Hobbies Themen. Über de Listn wird ka Wort valoan. Es Bandl is immer noch fest, oba sie verbringen weniga Zeit mitanond. Soll nit hasn, doss se nit genauso schen und wertvoll is. Freinde fias Leben seins trotzdem. ❤️
Behondelts eicha Zeit guat, verbrings de mit de Leit, de es verdient hom und bitte schreibs eich de Momente auf. Oda fongs se auf. Damit man i oba nit in eira Snapchatgalerie, sundan mit Polaroids, Tagebucheinträgen oder wos was i. Seids kreativ.
Am Sunntog gibs es erste Gewinnspiel juhu. Schenen Adventsbeginn. ❤️