Freindlichkeit is nit flirten
Es gibt Leit, de sein richtig klassische Sonnenscheine. Es Lochn brat übers gonze Gsichtl, nix nimmt senen des. Die gute Stiefschwester des Resting- Bitch- Faces.
So ane Leit wern leider echt gonz oft missvastondn. De sein vielleicht scheißefreindlich, oba bestimmt flirten se nit 24/7 mit olls und jedn!
Schaug ma uns kurz amol des on. Flirten is so a Sponnung zwischen zwa Leit, a guate, kitzlige, de vielleicht sogoa erregend wirkt. Knisternd. Es fongt mit Blicke on. So a seitlicha Zwinka reicht und oft geht donn schon wos. Donn kumen klane Aussogn dazua. Sowos wie „Puh, richtig fesch heit.“ Flirten konn holt mit gonz wenig Woatn a passian. Vergebene Menschen dürfen flirten. OH GOTT, WOS LARISSA, WOS REDEST DU DO FAN STUSS. Tjo, es is anfoch so. Marktwert wieda mol bestätigen lossn, sog i dazua. Wenn du a Frau onlächelst und de donn herkimt und di onredet, dabei hostn Ehering noch oben, is doch ka Schond. Dei Wifey daham werd einklatschen mit dia. Weil da perfekte Hubby sich onredn, oba nit onmochn losst. Amol a poa Komplimente von an feschn Kerl zu gregn, daweils Schatzi daham auf da Couch liegt, tuat a guat. Begehrt zu werden is wos, auf des steh ma holt olle. Erst wer auf des Spiel komplett eingeht, is donn a Luada. Oba olle, de bisi flirten, sollen des lei tuan. Also Flirten is amol gonz sia ans- imma badseitig gewollt. Nit wenn ana entscheidet „He wir flirten jetzan.“ So geht des Game nit!
De Kassiererin gibt da mit an Lächeln es Klangeld hinta, des du ihr donn noch überlosst. Ihr Lächeln kert jedn Kunden, is im Hondel so ongebrocht. Glab lei nit, doss de jetzt es Recht host, Ciao Schatzi zu sogn. Oda fest aufs Nomensschild zu spechtln, um se auf Facebook zu stalken. (Kumt oft echt goanit guat on.)
Da Kellna mitn geiln Oasch braucht nit hern, wie guat ihr Weibahaufn den findets. Herzupfeiffn und umazuflirten is irgendwie fremdschamwürdig. A wenn er mit eich mitlocht, greg er innerlich an Krompf. Wettn, doss er de Augn übadraht, wenn er sich von eich wegdraht? Lossts den oamen Kerl in Ruah, der nit mehr wia sein Job tuat. In da Gastro kerts Lochn a zum Mittogsmenü und a liabs Benehmen holt a.
Lei weilst da Freind von ian Bruada bist, steht sie nit auf di. Kloa gibs Bussi links und rechts beim Fuatgehn und dei bezahltes Getränk nimmt se strahlend on. Lei.. wer nit? Du kennst se ungschminkt und in Jogginghosn, oba nit weil se mit dir so close is. Sundan weil se schlicht und anfoch de Sis von dein Freind is. Do laft man sich im Haus übern Weg. Auf da Stroßn, wenn ihr eich spontan treffts. redets mitaond, kerts oba holt echt nit zomm. Dazel deinen Schulfreind in da Disko nit, doss de „geile Sau“ voll guat mit dir is. Sie öffnet zwoa deine Snaps, antwortet nit. Sie is zwoa liab zu dir, zu ondre Buamen oba liaba.
Klassische Aussogn, de anfoch nit gsog ghern:
Boah, hom se heit so a Katzl ausaglossn? Antwort: Hm, de Offn onscheinend wohl a ausn Zoo.
Loss di da Vati/ Freind so ausa Haus.
Du bist so liab, warum Single?
I tat di jo sufuat nehmen.
Du Single i Single, wia miasn auf an Kaffee.
Aha Jonas. Juckt mi oba nit, weil i di nit nehmen tat und echt gern mei Date selba aussuachn. I nimm nit olles, wos am Jausnservierbrettl obn is. I mog gfüllte Pepperoni nit. Iss dafia mehr Speck. Vastehst? Loss mi daten, wen i will. Loss mi selba mitentscheiden.
Es gibt sympathische Leit, de unbewusst Flirtsignale aussenden und nix wollen, ausa nett sein. Ondre vasuachn zuabezubrotn und man glabt, de wolle nix, wie sena Ruah. Schwierig olles zomm.
Lei weil i liab zu dir bin, will i no long nit mit dir schmusn. Lei weil i mit dir red, brauch ma auf kan Kaffee gehn. FREINDLICHKEIT IS KA FLIRTEN.
I mog sowos nit. Wenn Menschen glaben, ondre stehn auf sie und des is bei weitn nit so. I man, lei weil man nett is, steht man nit auf wen. Wenn i wen mog, donn moch i dem kane schenen Augn. I SCHENK DEM DE WELT. Und schoff es, doss er lei mehr Augn fia mi hot. Hihihihihihihihihihiihi
Dazelts ma nix von „Dei Bua is so liab zu mir. Echt fost zvü.“ Glabs ma, wenn dieser besagte ihr Bua echt ihra is, donn is er zu eich vielleicht liab, zu ihr vü liaba. Außadem brauch ma jo kan durchgehend liabn Bua daham. Is ma wohl liaba, ob und zua is er gonz und goa nit liab. 😉
Am Sunntog gehts um S-E-X. Ohne Witz.