Old school date 2.0

Kennts eich noch on mei Homemoviedate im Jänner erinnern? Wer geglabt hot, doss des bis jetzt mei anziges in dem Joa woa, hot sich getäuscht ha! ES WOAN SOGOA 2. Obwohl des Kinodate nit wirklich zählt, weil i mol ka Interesse in den Typen ghobt hob. #friendship auf den ersten Blick Zweitens woa er zu dem Zeitpunkt verliebt, da oame Teifl. Is er natürlich heit nerma, des woa lei so Phase.

Oh Gott, wie traurig isn des bitte? 21 Joa olt und innerhalb von 5 Monat 1,5 Dates ghobt. Grandios Larissa, bin stolz auf di.
Muss dazua gsog wern, doss i noch dem ersten Date e so überfordert woa, weil da Typ ma sei Liebe gestondn hot, ohne doss i überhaupt sein Nochnomen gekonnt hob. Ihr wissts genau, wenn da Nochnomen passt, kennen meine Schmetterlinge erst schlupfen! Just a joke..
Nur i hob ihn blockian miasn, weil seine „Je t’aime trop.. J’arrive pas oublier toi.“ Nochrichten sein ma dazent auf de Nerven gangen.

Trotzdem will i von dem Kinodate dazelen, weils anfoch schen woa. Es hot mi so on fria erinnert und i würd jo olles dafür geben, wenn mi a Bua wieda mol ins Kino einlodet. (Hey Jungs, eier Chance. I zohl mei Popcorn selber. Außerdem hob i Donnerstog a Freikarte.. Wer will also nit mit mir ins Kino??) 

Es woa amol on an Dienstagabend im März in Straßburg, wo i a Kinotreffen der alten Schule erleben hab dürfen..
Wir sein eigentlich nur ins Kino, weil wir unseren Abend kulturell verbringen wollten und de Tickets grod auf 4 Euro reduziert woan. Also sunst wär ma e auf a Bier gongen, des wär uns dieses Mol oba teira kemen wie ins Kino. Außerdem hätt er lei wieder 3 Stund sich über mei Bierallergie lustig mochen kennen.

Klassiker is jo Kino und donn noch wos essen gehen. Oba beim Bua woa da Hunga schon greßa, also seima in unser Stammpizzeria in Strass. Jo wir hom schon noch 8 Monat in so ana großn Stodt unsern Lieblingsitaliener gfunden, wir sein richtig guat. Nico, on t’aime trop.
Typischerweise hob i kan Hunger ghobt, so wie jedes nervöse Mädchen bei an ersten Date oder a Larissa holt irgendwie immer, wenns wos zum Essn geben tat. Dennoch hot er ma selbstlos sein Cookie ongeboten. JACKPOT.
Des is a guata Tipp für eich Jungs, anfoch unaufgefordert dem Mädel a Pizzastickl hinschmeißn oda holt ihr es Dessert überlossn. Kumt ima guat on.

Wir kennen uns seit August und sein seitn ersten Obend auf daselben Wellenlänge. Obwohl sei Idee, mi mit ana mir unbekannten Kaugummiwerbung anzureden echt schwoch gwesn is. Dadurch doss ma uns regelmäßig sehen, dafia fost nie schreiben, homa selbstverständlich an Haufen Themen zum Bereden kobt, wos bei an ersten Date oft schwer sein konn. Unsre Themen sein vielleicht nit gonz so zum adoptieren. Falsche Freunde, Zukunftspläne und verschiedene Frauentypen. Ihr solltets nit glei über sein depatn Freindeskreis obziagn oda ihm Ongst mochn, weil er noch nit was, wo er studieren soll oder a nit eire Bettgschichtln auspocken. Kumt olles nit so guat, wenn man sich noch nit so super kennt.
Bei Absichten auf a Schmusarei bitte vermeidets es, über eire vergangenen oder a aktuellen Bettpartner zu reden!!!

Pünktlich homa uns aufgmocht ins Kino. Zum Glick hots anfoch ka Streiterei geben, wer zohlen wird. Jeder seins, aus. Seima doch bade freiwillig do, kana schuldet den ondan wos und am Ende is jo egal, wer wie viel verdient. Kloa is es irgendwie liab, wenn er für di zohlt, oba wenn du 20 Euro Toschengeld gregst und er lei 15 is schon depat. Außer er winkt da schwoazn American Express uma, donn bitte loss ihn zohlen. Am besten losst ihn es gonze Kino aufkafn!

In Frankreich is holt cool, doss es kane fixen Sitzplätze gibt und man de sich anfoch suacht. I kinnt mi jo e nit entscheiden, also guat, doss er des übernimmt. Mitte Mitte is oba glab i derwegen mei Favorite, oder hinten Mitte. Hauptsoch nit am Rond. Er is vuagongen und hot ma donn mit so Nicken gezagt, doss ma uns do hinpflanzen wern. Kenns ihr des, wenn ihr im Kino neben ondan Paarlen huckts? I mogs irgendwie mehr, wenn mei Typ donn neben den ondan Typen sitztoder wenns a Mädi is, i dem Mädi. Weil i hob da a bisi die Sorge, er vertuat sich beim Popcorn, vertuat sich bei da Hond und donn bei de Lippen a noch. Wissts wos i man? Obwohl für mi wär des schon praktisch, wenn i merk, doss mei Date lei holb so fesch is, wie da ondre. Tat i mi wohl a versehentlich in de folschn Oame schmeißen. (Achtung, Sarkasmus, i bin a treue Seele!) Diesesmol seima neben Senioren glondet, de uns sogoa zwa drei Mol wos auf Deitsch übersetzt hom. Süß. Oba komisch. Als tat i kan französischen Humor verstehen.

Im Kino is relativ woam gwesn, daher hot mei Begleitung sein Pulli ausgezogen. Wollt den donn aufn Bodn schmeißn. Kane Maniern, da Monn! I hob ihn donn aus seine Händ grissn und auf mein Schoß gleg. Sowos tua i immer, brauch imma wos zum einehuckn. Weil i jo e gwusst hob, des werd ka Huckarei zwischen ihm und mir. Es hätt schon recht romantisch und schen sein kennen, den Pulli in meinen Händ zu hobn. Woas holt nit, oba mit viel Fantasie.. Dafia hob i ihn schen ongmault, doss er gfälltigst besser mit seine Sochn umgehen soll. Sympatisch konn i jo e.

Es folgen surreale Situationen, de natürlich bei uns nit passiert sein.

1. beide greifen gleichzeitig nochn Popcorn und so Blitze und Funke sprühn wie wild uma
2. er gähnt und streckt sich und HOPALA WIE KONN DEN DES LEI PASSIEREN legt er den Arm um mi
3. i daschreck mi bei der echt hoatn Komödie so zach und i hupf quasi in seine Arme
4. bei da wilden Schmusszene werd ma bade glustig und fongen selba on
5. i will in den Popcornbecher greifn und vatua mi und lond unter seiner Gürterllinie (WHAT?! Wem des bitte jemol im Kino passiert is, der liagt jo oda?)

Der Absponn laft  und i druck ihm den Pulli in de Hond. Danke fliagt über meine Lippen und er schüttelt lei den Kopf. Hob gonz vergessen, doss er resisteng gegenüber netten Mädels is. Für ihn bin i Welten zu vernünftig, Welten zu normal und Welten zu ehrlich. I sog, wenn ma wos nit passt und des kennt er nit. Er is ma übrigens Welten zu jung, er schaut ka Family Guy und hob i erwähnt, doss er ma zjung is?
Donn geh ma ham und reden über so viel Dinge. Gott sei donk is aufn Weg zwischen Kino und seina Wohnung genug Liacht, so brauch i nit aus Angst oda so sei Hond nehmen. Des is sunst bei an Date a guate Initiative.

Ach es is so schen, Zeit mit Menschen zu verbringen, de da guat tuan. Es hätt echt a verdammt schenes, romantisches und lockeres Date sein kennen. Woas am Ende jo a nur ohne Romantik, Handlholten und so. Passt jo a, homa holt trainiert fürs nächste echte Date. Do verkneif ma uns de Bettgschichten, verzichten auf en Knoblauch auf da Pizza und den Pulli tat i vielleicht a nit hintageben.

Sunntog kennts endlich lernen, wie man sich gscheid entschuldigt.
Ajo, Samstag is Vollmond, i werd donn endlich amol aklean, wos do so olles los is. ?
Bis Samstag, meine Lieben. <3