Zeit fia a date mit mir selba

Schene ostern, ihr tollen wesen! I mach ma a eigenes ostergeschenk und bin mal bis Dienstag offline. Aber davor versorg i euch noch mit an tollen, wichtigen blogpost und auf instagram gibt es a a klanes gewinnspiel, wo ihr liebesbriefe von mir gregn kennts. Weil es san de klanen dinge.

I predig eich sooft, doss es de klanen dinge sein. Doss ihr eich selba mehr lieben lernen solltets und niemand eicha glick is, sundan ihr dafia selba zuaständig seids. Und des gonze post i seit über 3 joan fost tagtäglich. I glab de längste insta-pause, de i ghabt hab, woa wohl nach luna ihrn unfall im februar 2021. Und jetzt gönn i ma de pause, weil es bitter not is. Wos i daweil tua? I hon a date mit mir selba! Und i geh heit abend aus hahaha.

Wissts ihr, social media werd eich a nit zwingend glücklich mochen. Sollte eich instagram mehr bauchzwicken wie a guats gefühl geben: weg damit. Aussteigen. De notifications ghern sowieso ausgscholtn. Bewusst in apps einegehen, wenn man des will, verändert SO VIEL.

Mi macht der austausch online mit eich happy und doss i dinge teilen deaf. Oba i kann a guat ohne insta und so a von mir selbstauferlegte pause tuat anfoch guat. privat verwend i social media echt so wenig und sig es manchmal eher als „job.“ Und viele sogn vielleicht „wos is jetzt so sponnend on 2 tog offline?“ naja, es gibt leit, de kenntn sowos nit mal schaffen und ab dem zeitpunkt is es wohl eher sehr bedenklich. generell mecht i in naher zukunft mal wos zum thema kritik online äußern postn.

Zruck zu mein date mit mir. I hob vor aniga zeit a gonz a bsundas biachl in mein postkastln gfundn „Das Date mit dir selbst“. (transparenz: hab es biachl gratis greg, oba bin nit gezwungen, do wos zu schreibn. lei bin i so begeistert u know) Und es is so wie i: klan, oba oho. Auf 148 seiten, de du selber ausfüllst, verlierst du di a bisi, findest di oba wirklich wieder. I bin da gsessn ba da ersten übung und wie i aufgstondn bin, woa i ungefähr 20 kilo leichter im herzln, weil es sich SO GUAT ongfühlt hab. Nach a poa übungen hab i dann de idee mitn freindebuach ghabt. Auf 22+1 übungen legst du den fokus auf di selba und erinnerst di, wer du bist und wos de willst. Es fühlt sich a bisi wie a reise on, wo du dei oltes und neies ich on da hond nimmst und ihr gehts zommen. Dieses bewusste zeit nehmen und wos guates fia sich selba zu tuan: I LIEBS. bevua man am handy sinnlos scrollt oda so, setzt man sich 15 min zu dem biachln und hot wos fia sich geton. 

Kloa bin i a wirklicher herzlmensch (toller blogpost HIER) und bin schon bei mir selba onkemen. Oba grode des buach hot ma wieder gezagt: longsoma tuan, erinner di on de gonzn sochn, de du schon gschofft host und a wenn du glabst, es geht da guat, nimm da trotzdem gnuag zeit fia di. weil wir sollten nit lei auf uns schaugn, wenns uns schlecht geht, sundan a schon präventiv bisi aufpassn. 

Jetzt hama schon april und i hab des joa schon SO vü erreicht, wo ma glott a bisi übel werd. Oabeitsstunden will i ma nit mal ungefähr ausrechnen, weil es viel zu viel sein. redaktionsleitung zu sein, nebenbei an blog zu schupfen und als werbetexterin kunden mit schreiberein zu versorgen und noch an social media kurs zu mochn: stressig. oba i liebs. Und jetzt mei buachprojekt steht a on und do brauch i anfoch viel nerven und zeit. Und do gesteh i ma schon selba ein: i selba als larissa bleib oft auf da streckn. Do is de kooperation zu drahn, der kunde braucht noch X texte, i wü gern des noch umsetzen und friends hob i jo a noch. und jo wer was, ob nit gach mol a monn a ins leben schnein werd- woatn tat i longsom schon drauf 💫Und mit dem buach hob i ma selba de zeit FIA MI ausagnommen und des taug ma sehr. und vielleicht is des a klana reminder fia eich, doss ihr eich a amal zeit fia EICH nehmen sollts. und vor ollem wenn wer sog „I konn/mog nit mit mir alan sein“, sollte man es probian. schodet goa nix, weil mit dir selba gehst am ende vom tog imma liegn. 

Also wenn du da mol selba a klane freid mochn willst oda bei wem ondan merkst, de person sollt unbedingt en fokus auf sich selba legn: „Das Date mit dir selbst“ is ka zeitverschwendung, sunda a zeitschenker.

Passts ma auf eichre herzln auf. Genießts de feiertage und wir hern/lesn uns.