Gsichtl woschn nit vagessn
Schon a bisi länger steckt der blogpost, de idee davon, in mein kepfln fest. weil im kepfln mocht er so vü sinn. oba sobold i vasuacht hon, de idee mein freind zu aklean, hon i gmerkt: es is noch nit gonz rund. monate später sitz i do, voller elan und bereit eich zu aklean, doss gsichtl woschn nit lei mit da körperhygiene zu tuan hot.
vorollem mädels kennen den struggle des nit obschminken wollens. später in da nocht, nochn fuatgehn, is es olls ondre als problemlos, de spachtlmasse wieda oba zu schmian. Paul pizzera vamutet sogoa, doss monche weiblichen gestoltn sich mit CILLIT BANG obschminkn miasn. ken zwoa kan, oba i was, bei de meistn bedarf es on a bisi vü obschminkoabeit. oba des is nebensoche.
Zerst amol am obnd kemen de linsn ausa, wer ane hot. donn muas mol de groboabeit geton wern- makeup grob entfernen. die ungeschminkten beautis überhupfn den schritt, oba mitdenken diafn se derwegen:
Dawal du grob mol Mascara schwoaz über de augn reibst und hoffentlich ka einwegwattepad verwendest, sundan ans fia den mehrwegzweck, reibst du da mol den grob tog oba. Wos woa schwa? Wos hot di belostet? Wos wüst du heit loswerden? a de guatn sochn lossest obafolln, erinnerungen speichern wir, oba des kimmt erst. erst amol schen mit obschminköl, wossa, gel, speck i dont know, obschminken.
Donn gehts bisi tiafa und cleaner. Wir verwenden a woschgel- öl- schaum, wos du holt vawendest. des produkt wird einmassiat, mit zwa finger, kreisend. daweil gönnst dein gsichtl bisi belohnung, hots den gonzn tog mit dir goabeitet. gonzn tog ondre leit onglocht, gonzn tog do gwesn. beim massian merkst, deine muskeln, de fias lochn do sein oda fias augn zommkneifn. jo guat, donn muss des meistens wieda oba. meistens mit wossa oda an tuach, wie du tuast. erfrischungskick am abend, loss a bisi wossa zuabe, wenn de tuast. so wie de menschen zu dia zuabelosst. des gonze lebn long. du fühlst di schon saubara.
a tona oda gsichtswossale is dafia do, doss deine poren wieda zuagehn und a sauba sein. fia menschn mit schlechtara haut gibs reinigende wossalen, fia ondre beruhigende. des gönnst du dir, so wie du dein körper essen gibst. lebenswichtig sowos. du host di heit selba geöffnet, challenges besiegt und dinge erreicht, du host mut gezagt und goabeitet und verloan und vü mitgmoch und vü geben und hjo, jetzt mochst wieda olles zua, kimmst zua ruah. gönnst da an schlof und a saubares gsichtl.
Amol de wochn gönnst da peeling. Weil es gibt sochn, de sein nit an an tog erledigt, du muast olle gewohnheitn folln lossn, streits vergeben und a weitergehen. mit zvü lost am buckl geht des schwa, also reinigst du a dei haut und befreist se vua oltn hautschichten. geh oba vuasichtig um damit, danoch. vü sonnenschutz brauchst am nächsten tog. versprochn wochest du am nächstn tog frischa auf.
Maskentime. Me-Time. Bedürfnisse sein von jedn ondas. feuchtigkeit, pickelfrei, gemildate rötungen.. wos man so braucht. amol brauchst jo a an liebesfilm, donn wos lustiges und donn doch wieda a freindin zum redn. wir erleben so viel im leben, do brauch ma oft amol an stop und an moment ruhe. neben lackiatn nägeln, wo man mol null komma goanix tuan konn, is es gleiche spiel mit maske. 10-30 minuten hinpflanzen und gönnen. es beste dronn? es ergebnis is a gönnung pua. so schnell werd aus ana 2 euro maskn a klana urlaub fia de seele. wer was, vielleicht bist genau in de poa minuten wieder besser drauf, voller kreativer ideen oder entspannter.
Danach muss man cremen, ölen, spray, rollen. Mit so an geiln stanrolla gönnt man sich so a guate massage, de de haut belebt. unbedingt mochn. unbedingt guat einschmian, a de augnpartie. stichwort falten. massia da des produkt so guat ein, wie lei geht. sanft, mit kreisenden bewegungen. HE VERGISS NIT DEI DEKOLLETE. do oabeitest a noch deine wünsche und ziele fia nächstn tog ein. Du werst des schoffn, du werst des hingregn, des wiad a guata tog, de notn werd passn, de person meldet sich.. ima lei de guatn sochn einmasian.. donn konn da nix mehr passian!
Wos ma nit tuan? Einwegabschminktiacha. De reizn de haut, gebn ka pflege und meine güte, donn schmink di fost bessa nit ob, is bades anfoch nit guat.
Wos ma eigentlich noch tuan solltn? Gonzn körper eincremen und den körper den ma hom wertschätzn. danke fiaslen, fias gonze trogn heit. danke oame, fias gonze hebn heit, danke händ, ohne eich tat i nit oabeitn kennen, danke popo fias imma hinta mir stehn..
Fazit: wosch dei gsichtl, friend.
