a portion mut und motivation gefällig

zwa blogposts in ana woche: wer is denn sie??? i glab des is bis dato ana der bestn themen, de i aufgregriffn und bearbeitet hab und i wünsch ma, doss a poa von eich nochn lesn aufspringen, voll motiviat sein und wos tuan fia des, wos se lieben. 

wie mei therapeutin des thema onfongen tat, probia i des jetzt a. „moch ma a gedankenreise!“ haahhaha na spaß, imma wenn se mit sowos kimt, denk i ma „kumpl i mog echt ka geld dafia ausgebn, doss wir uns a soch ausmoln. des moch i jo daham den gonzn tog und desholb sitz i do“. oba wir mochn trotzdem sowos.

ajo: i bin ka motivationscoach und werd jetzt nit auf insta coole motivation-quotes postn. oba i gib weita, wie i mi selba motivian konn. weil mei insta/blog/patreon/selbstständigkeit/podcast-leben is nit von heit auf morgen „anfoch so gloffn“, sundan i hob mein zuckasiasn popo echt oft dafia bewegn miasn (und derwegn is er no so klan.)

stell da jetzt wos vua, wos du hobn/erreichn/schoffn willst. egal wos es is.

poa beispiele, weil des lieb ma olle fest: du willst a aufnahmeprüfung schoffn. du willst dei beziehung rettn. du willst selbstständig wern. stell da des vua. egal wie „unrealistisch“ es grod in dein kepfln is. 

i hoff du denkst jetzt fest dronn und i wer da jetzt schreibn, warum du wirklich damit onfongen solltest, wos dafia zu tuan, damit du des a gregn/erreichn/schoffn konnst.

und klana disclaimer: a wenns nit hinhaut und zb de beziehung beendet werd, du di doch fia dein sicheren 40-h-job entscheidest: es geht eigentlich nie darum, des ziel zu erreichen, sundan imma mehr darum, den weg bis zum ziel zu „genießen“ oda zu erleben. weil du host imma erst donn erfolg (egal in welcher form), wenn du aufn weg zum ziel wos mitnimmst. und i hob schon oft sochn vuaghobt und beim aktiven tun gmerkt „trottl brauch i jo goa nit! des will i jo goa nit!“ und a des is irgendwie a ziel: zu wissn wos man will und wos nit.

du willst an neichn job? schick de 20 bewerbungen ause. du willst de prüfung schoffn? donn lern und sog de nächsten parties liaba ob. du willst dei beziehung rettn, donn muast du anfoch dinge onsprechn und dronn oabeitn. und imma mit dabei: a portion mut. i sog da jetzt warum du dafia wos tuan sollst. damit du des gregst, wos du willst.

• ES LEBEN IS SO VADOMMT KURZ. oba so kurz. wos sein bitte 80 joa zu 2000 joa? wos sein 95 joa zu 2000 joa? wos. sein 30 joa dazu? nix. goa nix. a fitzele. in der zeit werd vermutlich nit mol a heilmittel gegen endometriose gfundn. also warum woatn. warum nit tuan. warum nit mutig sein? wenn du e nit fia imma gost auf dera welt bist und später werd kana sogn „boah de frau woa zmutig!“
• wenns nix wert, werds wos ondas. GONZ ANFOCH oft gregn wir sochn vom universum nit, weil wir bessares vadiant hom! und des denken is holt so schen. de beziehung geht zu ende, weil noch a bessara mensch in dein leben kemen soll. i man: auf sowos deafst di jowohl fest gfrein oda? also: du host decht NIX zu valian. also bitte tua anfoch.

• wenn du dafia brennst, werst es imma guat mochn. du werst immer erfolg hom bei sochn, wo de selba sogst: JO IS GEIL. weil du dahinta stehst. es is soooo egal wer vua dir steht, solong du hinta dir stehst und des zu 120 prozent! weil donn zweifelst du nit on dir und wenn des wer ondas tuat, is es da kackegal. schaugs eich laxobu on: tat des lafn, wenn i imma auf de meinungen ondara gezählt hätt und selba nit olles dafia gebn hätt? gonz sia nit!

• mutig sein zohlt sich imma aus. (hier a blogpost über mut aus 2019) do sein des universum und i ana meinung. wenn du mutig bist, werst belohnt. mit mut beginnt jedes guate abenteuer!

ok passt. i wünsch ma, doss eich jetzt bewusst is, doss ziele lei donn erreicht wern, wenn man wos dafia tuat und i hob donn doch poa guate punkte ongredet oda? i wünsch a jedn, doss er des greg, wos er will und jeda soll des erreichn, wos er hobn will. wichtig is lei, doss man do den neid liegn losst und a nie vergisst, wer man selba is und sich selba treu bleibt. erfolg schmeckt sia wenig geil, wenn man dafia echte freind valoan hot.

ajo und wegn erfolg und so: der blogpost is in voller länge auf patreon zu lesn. i hobs schon millionen mal erklärt, oba i finds so wichtig, doss content creator an plotz hom, wo se fia ihre inhalte a bezahlt werden. natürlich kann und will nit jeda was zahlen, oba in meine augen is des schon a wertschätzung. und meine patreon-mäuse wern natürlich super gefüttert mit besten blogposts und infos aus mein leben und manchmal gibs andre goodies wie sprachmemos, briefe oda date-stories de NIEMALS hier platzfinden wern. 52 blogposts pro jahr gibt es und im monat zahlt man 3 euro, kann auf alle bis jetzt veröffentlichten texte zugreifen. des hast, du kannst a nur amal 3 euro zahlen und liest halt vier wochen alles durch und meldest di wieder ab, was i a voll ok find! i post ja a kostenlos genug content, um sagen zu kennen, doss patreon wirklich berechtigt is bei mir. und jo. danke fia olle de do wos dazuasteian und a generell danke fias lesen do und folgen auf insta und des woa jetzt genug gequatsche fia an sunntog. BUSSI!