wer will, tuat

eventuell ana meina lieblingsblogposts kennt des wern, weil es anfoch lei woah is.

imma wieda hert man „wenn er/sie des will, tuat de person des a“ und es stimmt. und aus mir unerklärlichen gründen vergessen wir des gsatzl imma wieda, wern bitter entteischt (am ende oba von den eigenen erwartungen, nit von dem gegenüber) und hjo.

es is ka hexerei, es is olles so anfoch akleat und es leben is zwoa nit imma anfoch, oba monchmol schon.

du willst unbedingt mit ihm wos unternehmen. wenn er a wollen tat, tat er sich zeit nehmen. eventuell von de drei tog wochenenden lei zwa abende mit seinen freind wos mochn, irgendwo später hinfoan oda wos vaschiabn. natürlich funktioniat des nit imma, oba auf a woche oda so gsegn, geht es sich im normalfall imma aus, doss man sich sig, wenn man will. ausnahmen sein trainings, arzttermine, oabeit, bundesheer.. (do greg i echt an grant, wenn i wieda mol her, doss wer ongfuckt is weil da partner*in OABEITN muas, hallo? wir sein erwochsene, oabeitn kert dazua. und gonz wild, wenn schüler*innen grantig sein, weil da partner kan urlaub in de semesterferien greg. kim oba bitte.) di fünf mol vasetzn, vier mol de wochn bam gleichn kumpl sitzn oda so, zagt da doch, doss de person nit will. warum donn dahahm sitzn und woatn, bis de person doch aus heiteren himmel onruaf „i will di segn? i bin vua da tia.“ wenn di wer segn will, sogt des de person a.

e des 0815 thema, wo i anfoch NIT vasteh, wieso des nit funktionian sollte: wenn du bluamen willst, tat er se da schon kafn, wenn er will. weil bluamen greg er bei gefühlt jeder kasse, wenn er einkafn geht, wenns gonz dringend is tankstell und wenn er doch a geplanta kerl is, steht er im bluamengschäft. er kaft da de bluamen, wenn er was, wie gern du se host und wenn er da zagn will, doss er di gern hot. wenn er des nit tuat, oda schlimma: erst donn tuat wenn du sogst „ma du kafst ma niiiiie bluamen!“- vagiss es.

es gleiche spiel mit entschuldigungen: wenn sich jemand nit von alan fia an fehler entschuldigt, sundan donn erst, wenn du es kommuniziast, donn is es ka entschuldigung von herzen. und somit wertlos. wir san erwochsn: du wast, wonn du di zum entschuldigen host (nit dafia, doss du OABEITN host miasn ahahah).

wenn di wer segn will, ramt er zeit ein fia a treffn. und wenns lei 30 minuten am parkplotz ratschn is.
wenn wer dei stimm hern will, ruaft di de person on.
wenn sich wer mit dir treffen will, frogt de person noch an treffn.
wenn di wer unbedingt dabei haben will, lodet di di person schon ein.
wenn wer fia di do sein will, werds de person a sein.
wenn wer a beziehung mit dir will, werd de person bereit sein dronn zu oabeitn.  

gonz wichtig: i muas es sogn, weil es zwoa logisch is, oba doch nit fia olle. natürlich muas man holt a sogn, wos man will. wenn dei partner di eftas gfrogt hot, ob du bluamen mogst und du liagst mit den worten „na i bin nit so ane!“ UND DONN GREGST KANE UND BIST ENTTEISCHT.. so geht des nit!! i kann nit zu an menschn sogn „Na brauchst da heit ka zeit fia mi nehmen“ und donn daham sitzn und blean, weil i ma erwoatet hot, de person kimmt derwegen. erwoat da nix, wos du nit kommuniziast hallo!

hjo, des woas amol. schenen sunntog dir und i hoff, du tuast de toge wos, wos de wirklich willst. bussi