du bist nit sei girlfriend

hi ihr schenen seelen 🌞 i hoff, es geht eich guat, ihr hobs eich de toge brav eingschmiat und kane herzln gebrochn. heit gehts um a thema, wos irgendwie so logisch is, oba donn decht nit.

in meine augen gibs lei zwa verschiedene, na ok drei, formen von romantisch-sexuellen beziehungen zwischn zwa leit. wobei de dritte holt nix fia mi is, oba aufgezählt kert se a:

1. man is in ana beziehung (kamot)
2. man mocht sich aus, doss des olles lei sexuell is und freindschoftlich, oba kane romantischen grenzen übertreten wern (a kamot)
3. man sog, doss es lei sex und freindschoft is und dabei will man mehr und traut sich nix sogn, liagt sich und des gegenüber on und man hot drama (weniger kamot)

und donn hob i letztens a video gsegn (wenn i es find, hau i es do e wieda eine), wo a girl genau des ongredet hot, wos i ma schon sooooo oft gedocht hob. wenn ihr eich entscheidets lei gspusi zu sein: fiats eich nit wie de freindin auf :)) (oda freind)

weil es gibt donn doch eha an großn untaschied zwischn partner und gspusi. da partner entscheidet sich fia di, dei gspusi nit. beim gpusi bist a option und du bist schiach gsog es nit wert, sich zu binden. da partner hot sich fia di entschieden und du bist priorität. du bist hoffentlich nit sei erste, sundan de anzige wahl. da partner geht ause in de welt und sogt stolz, doss du zu ihm kerst. es gspusi muas es nit amol wo erwähnen und is da ka rechenschoft schuldig.

also THEORETISCH gibs wohl gewaltige untaschiede, de man in da praxis oft bisi verwischn losst.

oft is des gspusi, wo man zviel energie einesteckt, donn a enttäuschung. oba nit weil es da zwenig gibt, sundan du zvü. sorry, oba wenn mir a typ mei wohnung komplett herrichtet, mir mei auto volltankt und donn eventuell no auf an urlaub mitnimmt: warum sollt i sei freindin sein und aktiv wos fia de beziehung tuan, wenn i a so olles greg? kems ma jetzt nit mit ausnutzn, weil kana zwingt eich sowos zu tuan. i fänds a nit ok und i würd ba an gspusi de grenzn imma hecha ziagn als mei körpergröße. wenn i schon wieda her, doss a mädi für ihr on-off gspusi, des imma lei um 1 in da fria schreibt wenn zum vorbei kemen is, an kuchn zum geburtstog bockt.. ernsthaft? maus, jemand, der in da öffentlichkeit dei hond nit nehmen will, hot kan geburtstagskuchn vadient.

weil donn, wenn es sich onfühlt wie in ana beziehung, obwohl man nit zomm is: kert amol gscheid gredet und wenn de person sog, na also fix werd do nix.. IS OBHAUN ONGSOG. de zelte obbaun und dahin seima. und wenn ihr donn beim gspusi no de sochn pockn miasts, er oba nix ba eich daham hot: schon wieda so a zeichn.

jetzt werds eventuell tamisch philosophisch, oba fühl i grod: olles im leben hot seine vua- und nochteile. a beziehung zu führn hot viele vorteile, oba donn a nochteile, wie zum beispiel de ganze arbeit, de man leisten muss damit de beziehung funktioniert. du konnst nit, weil dei partner grode zipfig is, sogn, na do stehst jetzt kurz alan durch und wennst wieda normal bist kim i. beim partner bleibst normalerweise a donn, wenns mol schwierig is. wer jetzt hoat drauf woatet, doss i erwähn, doss man in ana beziehung nit frei is, konn gern woatn, des werd i nit schreiben, weil es bullshit is. in ana richtign, gsundn beziehung kennts nämlich a olles mochn, wos eicha herzl begehert. und wenn eicha herzl ondre menschen begehert: hobs de beziehung sowieso nit verdient/brauchts de nit.

a gspusi hot a vua- sowie nochteile. ka froge. großer vuateil is holt de ungebundenheit, großa nochteil is holt de ungebundenheit. es gspusi schuldet eich nix und ihr dem gspusi a nit. du konnst da in so an freindschofts-gspusi-sex-ding nit anfoch lei de vuateile ausanehmen und sogn „i leb wie in ana beziehung, loss mi vom partner ausholtn, greg geschenke, liebe und co. oba wenn ma wer ondas taug, gönn i ma den, weil i bin jo e single und frei!“ des funktoniat nit. konnst da zwoa gern einredn, oba fia wie longe?

du bist nit sei girlfriend, donn fia di a nit so auf. des gspusi muass sich nit aklean, wo er/sie de letzn vier nächte woa. de person muas da nit schreibn, wenn se daham ankemen is. de person muas nit auf di denkn. des gspusi muas nit mit bluamen vua da tia stehn oda dir mol a briafl schreibn, a wenn du es da so sehr wünschn tatest. dei partner muas des übrigens a nit, oba er/sie tuat des von alan.

erwoat da nit, doss, wenn jemand sog er will lei wos lockeres, auf amol a beziehung mit gemeinsamer wohnung und hund vuastelln konn. wie soll denn des funktionian? alan mit so anen erwartungen, wen ondan so zu verändern, tuast da selba mehr weh wie not. a mit dein girlfriend (oda a boyfriend) benehmen fia a person, de di anfoch nit vadient hot, tuast da zvü weh.

i sogs imma wieda: wer eich nit zu 120% schätzt und wü, hot eich goa nit verdient. bevua ihr wen überzeign miasts, wie cool ihr seids, verbrings de zeit sinnvoller. gebs eich nit fia weniger her, lei damit ihr nit alan seids. liaba alan als mit de folschn leit uma, de eicha energie/zeit/liebe nit vadient hom. ❤️ bevua des eich so fia wen einesteigats, kennts de zeit a easy fia eich selba verwenden, weil selbstliebe tuat weltn bessa wie sowos.