![sei bitte ka zeitverschwendung](https://laxobu.at/wp-content/uploads/2022/04/img_3943-1140x641.jpg)
sei bitte ka zeitverschwendung
irgendwie ständig des bedürfnis, wenn i neiche leit kennen lern, senen glei zu sogn „bitte, verschwend nit mei zeit. sunst geh bitte anfoch glei, ok?“. und na es is bestimmt nit zu 100 prozent gsund, so zu denken und bei jedem anzeichen von „de person könnte mei zeit verschwenden“ glei zu lafn. oba seima uns ehrlich: wir sein lei zu gost auf dera welt und warum de e so kurze zeit mit drama, theater, fake friends und sinnlosen dingen vabringen?
am liabstn tat i donn jo jeda neichn person an zettl in de hond druckn: (is jetzt vielleicht komplett übertrieben, oba i glab des konn man sich erlauben ba an blogpost. i tats jo nit in echt tuan hahaha schwitzts nit):
vasprich ma, wenn du ma wirklich persönliche frogn stellst, doss se di a wirklich zahn.
doss du wirklich wissen willst, wie alt meine gschwista sein und warum i oft mit badn händ a glasl einholt beim ausgehen.
i moch ma de mühe gern, mi dir zu aklean und di a bisi in mei lebn zu lossn. oba du wast, de getippen worte sein zeit und a de telefonate, de wir in naher zukunft führen, sein reine zeit meinerseits. a wenn du des nit so sigst, i sig es so und deafs jo a. weil in der zeit kennt i so vü ondre dinge mochn. i kennt an blogpost schreiben, meine rechnungen kontrollian, mei abend-routine ordentlich durchführen, a buach lesn, meina bestn freindin vom tog dazelen oda a runde trainian gehn. i bin ka mensch, der 8 stund vorm tv hängt und nit produktiv sein will. i nimm mir wohl bewusst pausen im leben, oba holt doss i jetht olles stehn und liegen los, um mit ana fremden person zu chillen? schwierig. ajo: solltest du generell mein blog & co belächeln, brauch ma goa nit weiter redn, weil hinta meinen traum zu stehn, wenigstens des solltest kennen.
spiel mit mir kane spiele, des konnst donn im single-modus spielen. mi juckt es nit, doss du montog bis donnerstog interesse in mir host und donn bis sunntog obnd kimt nix mehr. erst voll auf kontakt und schneller ontwoatn wie i datipp und donn kimst ma mit drei tog ghostn und an „heeeey wie woa dei wochenende so?“ ums eck? na danke. tua des generell ba kan menschn, des is ka oat nit.
i stell nur noch ungern menschen über mi selbst. vor allem, wenn i se no nit kenn. wenn i am mittwoch obnd mit dir essn geh, schätz es bessa, weil vermutlich sog i donn a ondres treffn fia di ob. i sitz nit daham und woat, bis wer wos mit mir mocht. i sitz daham und wäg ob, mit wem i jetzt wos mochen will und wer mei zeit nit vadient hot. sollte des fia di arrogant klingen, ok is ma egal. denkst da des holt, i sig des eher als a privileg, doss man so weit is, doss man nit jedn sei zeit gibt. i zu mein teil find es volle selbstlos und fost dämlich mit menschen, de da ka energie schenken, zeit zu verbringen. wie wenig is man sich do bitte wert? i glab des kert zu an guatn, schenen lebn dazua, doss man lei sochn mocht, de man echt tuan wü.
oft tätig i bei neichn menschn schon mit obsicht de aussog (respektvoll oba ehrlich gsogt)“du, des thema geht di nix on. mit dir mecht i nit driba redn. i hob freind mit de i des bered.“ weil i segn will, wie se reagian. weil jemand der ma kimmt mit „olta tua nit so. dazel!“ intressian mi nit. i brauch de grenzen, de i selber setz. i brauch den abstand, den i selbst bestimm. weil du deafst deine a setzn und i wer de grenzn nit amol berühren, weil respektobstond kert. i stell mi zwoa nit bei unsra beziehung, egal welcher form, über di. oba in mein leben stell i mi über di. punkt aus.
i bin kane 17 joa mehr, wo leit mir sogn kennen, wos i brauch und will. wo i ma wos einredn loss. heit is des eher a grund fia mi, wieda drei schritt hinta zu gehn. wenn i sog, i mog des so tuan, tua i des so. punkt aus.
im leben hot jeda gewisse menschen. und diese menschen, lieblingsmenschen von mir betitelt, sein prioritäten. de leit stehn on den ersten stellen bei mir. wenn a freindin mit liebeskumma onruaft und mi WIRKLICH braucht, moch i mi aufn weg. oba warum? weil i a bei meinen lieblingsmenschen priorität bin. und des hom ondre zu akzeptian: doss nit jeda mensch a prio sein konn. wenn i di zur priorität moch, freind*in, donn awoat i ma des a von dir. und ka ongst, i tat des schon a onredn. lei awoat da nit, doss i fia di ondan leit obsog und spontan zu dir foa oda mit dir telefonia, daweil i eigentlich ba wem ondan daham sitz: und donn bin i fia di lei a option. a option, de wohl de beste priorität wa, oba es beste fia mi is donn imma zu gehn.
warum i des so moch? du findest es eventuell übertrieben, theatralisch und sinnlos:
i hab schon so vü zeit investiat in menschen, de ma nix geben hom. de irgendwonn gongen sein oda mi ausgnutzt ham.
i hon gern mein friedn in mir. und den hon i holt nit, wenn i ana wildfremdn person mei leben aklea und nit was, ob des jetzt wirklich wert is. i
sei bitte ka zeitverschwendung fia mi. und generell fia kan. und nimm da vielleicht a beispiel on mir. weil es schodet nit. es schodet nit, amol de leit um di uma auszusotian und donn werst segn, wer fia di olles gebn werd und wer nit.