Erinner di dronn
Hey ihr siasn. i hätt 3924234 blogposts zum veröffentlichen. oba aus respekt eich und a mir gegenüber hob i beschlossn, in nächster zeit ka „schware“ kost zu veröffentlichen, sundan eher positiv gstimmte dinge. heit gehts um sochn, an de man denken soll, wenns an nit soooo supi geht. :))
deine gedonkn san nit de woaheit
stells eich des mol vua: olls wos ma glabn, tat stimmen. is oba ZUM GLICK nit so. deshalb erinner di immer wieder, vorollem wennst im gedonknstrudl bist: des is lei in dein kepfln und nit in echt so. de person schreibt da nit hinta? dei kepfl: sie is ba wem ondan. de person mog di nerma. de person scheißt auf di. fakt: de person schreibt nit hinta. punkt. imma wieda di selba zu den punkt hintaholn, der anfoch a objektiver fakt is. do is da sia vü gholfn.
jeder mocht fehler
jo i was, es klingt so banal und obgedroschn. i sog so gern, wenn sich wer fia sein fehler entschuldigt „du, holb so wild, es is kana dronn gstoabn.“ klingt hoat? naja: i finds eher hoat, mit jemanden zu schimpfn, weil er vagessn hot en müll ausezutrogn oda wenn er de mappn in de folsche lod geton hot. man muas nit übertreibn. deshalb: deine fehler definian di nit. de sein menschlich. lei, weil de wos vahaut host, is dei charakter weniger wert. also bei an fehler: vazeih ihn da schnella wie ihn da de ondan leit vazeihn.
DU BIST NIT ALAN
eventuell kennts ihr es schon goa nerma hern, wenn i mei sterndl gschicht dazel. oba amol konn i se noch dazeln: wenn des heit am abend in himml schaugs und an stern segs, sig i den a. und de person x und y und z a. wir olle sein untam gleichen himml und auf dasselben erde. ma klingt des nit irgendwie magisch? beim tippen der zeilen muas i schon a bisi grinsn. weil es sich sufuat a bisi leichta onfühlt. du bist nit da anzige mensch, der so fühlt wie du grod fühlst. glab ma: viele spian den groll im bauch, de angst im kepfln oda den stich im herzln den du spiast.
es is okay
es is okay, ongst zu hom. es is okay, a date abzusagn. es is okay, etwas nit glei zu schaffn. es is okay, an schlecht tag zu ham. erlaub da, des wort okay zu verwenden. und sei damit im reinen.
du> de welt
warum solltest du auf des girl hern, des di nit mog? und a nit kennt? wos hot dir de fremde person im internet zu sogn, de nit in di eineschaugn konn? du bist anfoch so vü mehr wie de meinung von menschn. bitte, wer da über des kloa. do kennen de fremdn wesn schrein, hupfn oda kuttan wos se wolln: des sog lei über sie anigs aus, nit über di!
und jetzt no wos gonz bsundas, wos mi so stoak gmocht hot:
du host bis heit 100% deiner schlechtn toge überlebt. wos soll dir passian?