Des is ka Selbstoptimierungsphase!
Heit will i eich de Lost obnehmen. De Lost, de anige von uns derzeit umatrogn miasn. Social Media sei Dank. Weil glabs ma ans, kana is gezwungen, bessa und glücklicher aus der Krise ausagehn wie er einegongen is.
Du muast ka Bananenbrot bockn.
Du muast ka daily homeworkout mochn.
Noch weniga muast du des Workout auf Instagram posten.
Du muast da nit a Jeans onziagn und di schminken fürs Homeoffice.
Du muast nit de komplette Bude ausgmistet und geputzt ham.
Du muast nit produktiv af sein.
Du muast nit, du kannst, wenn du willst. Oba dei durch Instagram hervorgerufenens schlechtes Gewissen, des deafst du anfoch nit ham. Des erlaub i dir nit.
Nochamal: Bitte verwend Instagram lei zur Inspo. Schau do eine, um glücklicher, gscheida und motivierter zu wern. Nit um a schlechtes Gewissen zu ham. Nit um zu denken, dei Leben is nit fancy genug.
Spoiler: Auf Instagram lossn vü senre schlechten Phasen aus. Se verschweigen de Streits in da Beziehung und filmen senre Instantnoodle nit.
Wenn i ehrlich sein darf, ajo des darf i jo, weil des MEI Blog is.. I versteh Menschen, de es manchen Instagramern nit obkafn. I glab a nit jeder Bloggerin, wenn se sog „ES IS OK NIT PRODUKTIV ZU SEIN.“ Oba de restlichen 3 Stund Story dazelt se lei, wos sie alles geschafft und erreicht hat. Authentizität, baby !!
Meine Fias sein derzeit nit perfekt rasiat. Meine Hoa wosch i grod, wenn ma danach is. Mei Bad und mei Kuchl sein geputzt, oba mei Bücherregal seit Ewigkeiten nerma obgstabt. I hab mein Kasten nit durchgmistet. I ziag ma fias Homeoffice ka Jeans an, i ziag ma goaka Hosn an. Ganz einfach. I zupf nit amal meine Augenbrauen, obwohl so vü sich des denken. I führ a nit perfektes Leben und des spiegelt a mei Instagramfeed wider. Hon i a durchgehend perfekt abgestimmtes Preset? Hom olle meine Fotos zamm Einklang und sein farblich passend? Na. Erklär i eich, doss es Zusammenleben mitn Partner easy is. Na, Na, Na.
Zwischen meinen klanen Hoffnungsmachern und Blogaufrufen, hau i wieda amol an Tegl Eis eine oda dazel eich, warum mi da Postla so ärgert. I probia eich, mei Leben so ehrlich es geht zu zagen. Natürlich zag i eich nit olles, weil i des nit will. Oba olles wos i eich zag, is echt und ka bisi perfekt.
Oba es gibt gonz vü Instagramer, denen man folgt, weil man des eben olles so perfekt segn will. Willst du goa nit? Donn entfolg der Person. Des grenzt glott an Selbstverletzung, wenn man sich dessen „Life“ eineziag und dann denkt, man hätt es gern selber so guat. Begib di anfoch goa nerma in de Gefahr.
Mi zipft es on, wenn i dieses REAL TALKS her von Mädels, de dennoch Perfektion in ihrem Feed großschreiben. Für mi passt Perfektion und Realität nit zamm. Gonz anfoch. Oba wos i verstanden hab und wos ihr a vielleicht verstehen miasts, es gibt Leit, de brauchen des. De hom so an Mitteilungszwang. Fia de is a Yogasession erst donn absolviert, wenn 1400 Leit de a wahrgenommen hab. De brauchen a poa „LECKER!“ Kommentare unter ihrem Bananenbrot. Und wissts wos? Des is a guat so. I brauch zum Beispiel des Schreiben. Vü meiner Beiträge sein dafua schon in an Notizbiachln entstanden. Manche Texte wern fia imma unter Verschluss bleiben. Ohne des fost tägliche Tippseln am Blog, auf Insta und in meine Notizbiachlen werd i jo irre. Und ihr lossts mi tippseln, ihr lests es und genießts es (teilweise). Genau des brauch i. I brauch a Leserschaft wie eich. De ma zuastimmt oda de ma Anregung gibt, de mi lehrt, de mi weiterbringt. Deshalb versteh i olle perfekten Influencer auf Insta, wenn se es brauchen, uns des schene Leben zu zagen.
BTW fost olle meine Biachlein sein schon voll gekritzelt, wo greg i liabe schene Biachlen her? Größe egal. Gonz klan, oder A4. Hauptsoch i greif gern dazua, weil es schen is. MERCI
Ob du jetzt mit 5 Kilo Plus oder Minus ausagehst, is komplett wuascht. Ehrlich. Her bitte a auf, darüber Witze zu machen. Dieses „I kim so fett aus da Krise ausaaaa.“ is nit so lustig. Weil es eigentlich egal is, des wast du, des was i. Liaba wir kemen olle GSUND ausa. Ausadem solltest du bereits wissen, doss es Gewicht egal is. Ob du mit 45 Kilo happy bist oder mit 79. Ob du jetzt 65 Kilo host und a Traumfigur, oba an Scheißcharakter is holt nit so geil. Host du 80 Kilo und damit a bisi mehr Kurven und bist so a glücklicher Sonennschein, is des schon emotional gsegn geiler. Gewicht definiert di nit. Dei Charakter und dei Mood mochen des. Ok? Also futter, wos du willst.
Wie oft i schon ghert hab: Während da Ausgangssperre konnst du ja locker a Buach schreiben? Du kannst ALLE deine Bücher lesen. Du kannst endlich dei Wohnung fertig einrichten!!
Na, na, na. Danke für den Support. Oba i leb mei Leben wie es mir gfollt. Egal, ob i jetzt ause darf oder nit. I nutz de Ausgangssperre nit als Selbstoptimierung oda so. I verwend se nur
E N T S C H L E U N I G U N G
Des is ka Selbstoptimierungsphase!
Des is ka Wettbewerb!
Des is ka Chance, de man nie wieder greg!
Des is anfoch a Zeit im Leben, de ma noch nie erlebt haben und de vorbei geht.
Also egal, wer hier struggelt. Durchatmen. Nach Corona musst du ka besseres Du sein. Du bist automatisch a onderes Du. Weil de Krise uns olle a bisi umformt, hoffentlich a bisi nachdenklicher und dankbarer macht.
Mir wärs wichtiger, du sigst, wie schen und guat es Leben eigentlich is.
Darüber schreib i am Donnerstag.
Vielleicht bleast du. Vielleicht blea i.
Kert a dazua.
Bussis.