imma no i
happy birthday, laxobu! 5 joa homa schon am buggln und aufs aufhern denk ma nit. wobei.. liest man blogs ibahaupt no? is lei mehr tiktokn und instagrammen im trend? onscheinend schon, weil von 2 blogposts de woche (!!!!) seima auf 5 im joa kemen. oag, oba so is es leben. a noch 5 joa bin i imma no i. lei a ondre version. sowie de taylor swift imma neue äras hom, hob des a i. des hot a de laxobu und a du. enjoy the little blogpost und schen, doss du do bist <3
i bin imma no i.
weil gewisse werte und charakterzüge verlern i nie.
i bleib fia imma neigrig, fia imma ehrlich & wohl a mutig.
geht nit, gibs nit.
neid meg ma nit.
unehrlichkeit a & jedn trend nochlafn? na, na.
imma no ins schreiben verliebt und verliebt übers verliebt sein zu schreibn.
du, mogst du nit bleibn?
fia imma vielleicht?
mit dir hert sich lebenslong holt so vadommt richtig on.
zwischen vielen zeilen voller „i was nit“ und „wos soll des werdn“
merkn, doss ma vü zjung sein fias sterbn.
& doss de welt oft so schiach is, wie es verderbn.
zwischen der unendlichkeit de endlichkeit verstehn,
und wissn: wir hom lei a lebn.
imma no oft de gonze nocht woch, um sochn zu schreibn.
will wos erschoffn, wos fia de generationen noch uns soll bleibn.
so vü tabuthemen gibs auf dera welt und i sog ans:
do kert vü mehr gredet driba!
vor 5 joa nit gwisst, wos des soll wern.
heite gonz stolz, wie vü zur laxobu community kern.
wie vü des do lesn, liebn und teiln.
dabei woan dazwischn so vü phasen, de woan olles ondre wia fein.
sex, frauengesundheit und streit-
na so wos kert nit in de öffentlichkeit.
sogt wer eigentlich?
weil, am ende kert jedes tabuthema aufn tisch.
i hob ongst, oba weniga wie davua.
i woa imma schon mutig, heit is es mei zweita vuanome.
i woa ok mit mir, heit is es vollste akzeptanz.
i hob long gmant, i bin onkemen. i hätt mit 20 de welt vastondn.
heit was i ans: komplettes onkemen is nit da sinn.
da sinn vom lebn, is zu lebn.
i bin imma no i.
a poa joa älter, bisi gscheida, oba wohl a imma no bisi naiv.
imma no richtig begeistert von den klanen sochn,
de es leben so lebenswert mochn.
lieblingsmenschn wern imma no geschätzt, weil
wos tat i tuan wenn i de nit hätt?
wos sein schon 5 joa zur ewigkeit?
a klanigkeit.
oba a schene.
GEWINNSPIEL IS ONLINE