olles nur im kepfln

i was, i bin nit alan mit meinen irrationalen ängsten. overthinking werd volle gern als trend gsegn und „is holt amol so“ und „yeah team overthinking“, doch wer wirklich damit zu kämpfen hat, findet des nit cool & tuat a wos dagegn. mit wos dagegn tuan man i zur therapie zu gehn oda mit an oazt zu sprechen und so weiter. weil overthinking is ka phase, de du fia drei wochn host, des begleitet di ständig und des kann so miad mochn.alan driba zu redn hilft ma schon sehr. mit eich do, mit freindinnen und natürlich in meiner therapie. wos gonz wichtig is, doss man selber einsig, doss des nit fia imma so sein sollt und man wos dagegen tuan soll. und hjo, i teil jetzt mol poa dinge, de mir oda ondan helfn, wenn man olles überdenkt.

und fia olle, de sich so glücklich schätzen diafn und kane irrationalen ängste hom: hobs a bisi mehr respekt& empathie fia de leit. sie is nit zwingend total a eifersüchtige bitch, de beim fuatgehn ihrn freind drei mol onruaft, um zu kontrollian wos er tuat. vielleicht hot se anfoch ongst, doss ihm wos bam ham gehn passiat is. doss er sich so bei ana prüfung einesteigert, konn fia di ruhig komplett unverständlich sein. oba wenn er daron fost zerbricht, braucht er ka „werd schon!“ schultaklopferei. wenn fia sie a telefonat des schlimmste auf da welt is, bringt sich dei „stell di nit so on“ wenig. mit overthinkern zamm zu sein oda freindschaften zu führen, kann genauso miad machn, wie unta den irrationalen ängsten zu leidn. des muas man kommunizian. und mei therapeutin hats amal gsag und i fühl es sehr:
a person mit irrationalen ängsten braucht an partner, der vadommt guat in kommunizian is. 

hob zwoa long gmant, des is lei so a tumblr fancy sprichl, oba am ende is es de woaheit. weil der partner/de freinde/lieblingsmenschn miasn anfoch gewisse sochn eftas sogn, wia se wolln. jo de beziehung laft guat und fia di is olles ok, oba du host dein freind vua drei tog amol nit i lieb di gsog und des tuatn hoat. sog deina freindin vier tog long nit, doss se guat ausschaut und sie fühlt sich glei 20 prozent schlechta. mit wortn (und tatn sowieso) konn man overthinkern so a guats gefühl geben und a wenn man donn holt viel eftas sochn, de fia an kloa sein sogn, hilft des der person. und na, des is a gonz wichtig: niemand is fia des wohlbefinden vom ondan zuständig. bei ana person mit irrationalen ängsten is es lei sehr hilfreich, wenn man se so guat es geht unterstützt OBA ihr a oft amol de hond bewusst nit reicht. oba nit zbosn, sundan damit de person anfoch mol alan wos probiat und on olle overthinker, ihr miasts on eich oabeitn. es is so, i bin do selba mitten drinn und fühl es oft a nit so und hätt a gern, doss olle meine lieblingsmenschn sich so benehmen, doss i kane ängste hob. oba des geht nit: se gehn fuat, se mochn sochn, wo i ongst hob, se melden sich nit imma, wenn se daham sein. (wobei des letzte sig i vua ollem in beziehungen als bare minimum und des hob i a so abgeklärt.) also wissts wos i man? de person mit den fiesen gedanken muas on sich oabeitn und sich mit dem thema ausanonda setzn und de lieblingsmenschen sollen & dürfen helfen, aber sein nit verantwortlich für gewisse phasen. wobei i bin ehrlich: manchmal hab i so phasen, wo i donn was, wie ma a mensch guat helfen kann und dann bitt i a um de hilfe. i man sobald es onfongt mit „du konnst nerma fuat gehn ohne mi, i mach ma zu viel sorgen!“ oder „Bitte loss dein standort 24/7 ein, damit i immer genau was wo du bist“: doss i nerma gsund und diese toxische oat bringt ka paarle/kane freind zomm, sundan eher ausanond.

1. frog di, ob des jetzt in dein kepfln is oda ob des tatsächlich passiat!
   des moch i gefühlt täglich. bild i ma des ein? hob i de soche schon komplett zadocht oda is es wirklich so? und wissts ihr wie man des löst? genau: kommunizian. und i glab, es gibt nix dümmeres, wie jemanden zu frogn „he mogst du mi eigentlich noch?“ aus dem nix mitten am tog, oba alan wenn i de zeilen tipp (schick i meistens nit mal ab), merk i schon: ok, des is soooo weit hergeholt aus meinen tiafstn ängsten, i glab des is wirklich ka thema grod. gonz wichtig is do dabei a de vergangenheit, weil nur weil eicha freind vua 8 joa mit an mädl gebusslt hot und er se wieda mol sig, bussln se nit glei wieda. is de ongst in dein kepfln oda berechtigt? berechtigt is de ongst nit, lei weil se in dein kepfln is! berechtigt wa, wenn er de zu dir oda ihr gsogt hot oda es gschriebn woan is. wenn des nit der fall is: alles gut.
2. wahrheits-liste
   i hab vua poa monaten mit ana liste voller wahrheiten gstartet, de i imma durchlies, wenn ma de welt wieda zviel werd. wos do oben steht? des is eigentlich egal, weil es lei darum geht, doss do sochn obn sein, de di beruhigen. de dir in deiner phase voller ängste & wos wäre wenn, obaholt aufn bodn der tatsache: du bist gsund. dei freindin liebt di. du host jedn deiner schlechtn toge schon überlebt. alan de zeilen donn durchlesn und durchatmen, beruhigt di schon glei amal. und nachdem i amal 3 szenarien aus mein kopf mit meiner therapeutin kleinlichst durchgearbeitet und analysiert hab und ungelogen woa des ane der unbequemsten sitzungen überhaupt, greif i liebend gern zu meiner wahrheitsliste und lenk mi damit ob, bevua i wieder a thema so aufbausch und des wieder fast a stund bearbeiten deaf um zu merken „des is in mein kepfln und i verschwend zeit mit ängsten und situationen, de nie so kemen werden
3. kommunikation
   der wohl wichtigste, oba a härteste tipp. kommunizia, wenn du anfoch grod so a phase host. beispiel woa 2019 bei an konzert mit freindinnen, wo de menschenmasse mir zviel woan is. und i hab laut gsagt „ok passt i hob glei a panikattacke“ weil des gedränge mi wirklich fertig gmacht hat. und donn hot a freindin gsog „na fix nit. i hab da jetzt kan bock drauf. in 10 minuten stehen wir bei der bühne und hean endlich den artist. wie hast noch amol dei lieblingsliad von ihm?“ und i hab ihr geantwortet. und hab quasi nach der verbalen watschn, doss sie jo jetzt kan bock auf mei phase hot, a ablenkung gspiat. und so hab i de panikattacke übertaucht. und therapeuten haben für solche attacken mehrere lösungen, wobei de jetzt wirklich ane is, de oft hilft. es is da erste schritt, um in de realität zruckzukehrn. sich auf ondre sochn zu fokusian, sowie auf den gedanken, wie des liad hast. du konnst immer nur an gedanken denken & wenn du es selba nit schaffst, di abzulenken, schaffen es andere. wobei i lieb den tipp vom felix lobrecht aus gemischtes hack: wenn du voll in der spirale bist, denk on an rosa elefanten der grod einkafn geht. und donn sei bitte realistisch: geht des überhaupt? wie seltsam wa es echt, wenn du einkafn gehst udn so a baby elefant in pink steht nebn dir? und schon sein deine gedanken umgelenkt.

wichtig: man muas vastehn, doss overthinker sich probleme oft aus da nosn ziagn oda se größer mochn wie se sein. des hot nix mit verdrängung ect zu tuan, wenn man sich ablenkt oda de ängste folln losst. natürlich, bei echten problemen soll und deaf man darüber nachdenken. oba a overthinker mocht aus ollem a so a großes thema, des nit not is und realistisch gedacht, echt doof is. wenns ma guat geht, merk i selba, wie dumm oft meine ängste sein. oba in den schlechten momenten bin des nit i sundan mei ongst. und des aklea i donn a meinen lieblingsmenschen, doss nit i des gsog hob, sundan eben mei ongst. und do kimm i donn nit ausa und i erlaub mir donn poa minuten de phase& loss es donn los. manchmal gehts nit und donn muas i es a akzeptian.

sooooo i hoff, es woa a bisi informativ, i hoff ihr hobs bisi wos mitnehmen kennen und wenn des mehr davon lesn wollts oda wos a imma. meldets eich. bussi danke!!!!!!