wollen, nit gwollt wern

383 blogposts. 383 fuckin blogposts und es passiat ma heit es erste mol, doss i ma nit zu 100 prozent sia bin, ob i des thema nit schon mol ongsprochn hob ahahahah. oba i findn blogpost nit, also werd schon nix sein. sunst tuats ma echt lad!! in mein kepfln sein de texte oba so guat, doss i des niedaschreibn MUAS.

i lieb meine freind über olles, wirklich. oba es hot schon unglogn poa situationen gebn, wo se wen daher gezaht hom und i hob mi so gfrogt „äh und wos find ma on dem jetzt so guat?“ und na ok woa glogn. nit i hob mi des gfrogt, i hob des meine leit ins gsichtl gfrogt. weil de ontwoatn oft schon de endgültigen erklärungen woan, warum des jetzt nix ausa zeitvatreib oda decht vaschwendung is. (do a blogpost über zeitverschwendung) 

„jo na er/sie is nett!“
sorry, oba sobold jemanden mit nett betitelt, is des so schwierig. i find a nett, wenn a 30-jährige Yu-Gi-Oh! koatn no sommelt, oba des woas holt a schon wieda. deshalb sein solche aussogn eher neutral zu segn und sprechn weniger aus überzeugung.

„er/sie hot onstond“
kema mol aufhern des minimun nit zu loben sundan als selbstverständlichkeit zu segn??? es is nit onständig, wenn er eich bam ersten date NIT bittet an zu blosn. des is anfoch selbverständlich, doss er eich NIE dazua zum drängen hot. es is ka onstond, doss de person eich normal hintaschreibt und nit imma 3 werktog vergehen losst: des nennt man normale kommunikation. wir miasn echt aufhern sochn zu lobn, de anfoch selberverständlich sein solltn, nur weil anige hampalen sich nit zu benehmen wissen (urolta blogpost über mütter& doss se senre jungs erziagn solltn). des is quasi es basic paket, doss de leit, wenn se interesse hom, mit offenen koatn spielen, ehrlich und höflich san. olls ondre is glei ka interesse mehr wert.

„er/sie mog mi wie i bin!“
UND DES IS DA FUCKIN FEHLER! also um des gehts jetzt beim blogpost (nochdem i e schon wieda ausschweif): warum mog i wen, lei weil er mi mog???? is es nit wichtiga, doss i ihn mog? doss i von dem mensch überzeugt bin? olta dapock i holt so goa nit. schen, wenn mi wer attraktiv findet, oba wenn i ba dem gsichtl kane wallungen vualauta maus greg, is es schwierig. es freit mi, wenn mi a typ intressant findet, oba wenn mei gsichtl holt einschloft, weil er so fad is, bringt sich des nix. es deaf so holt anfoch nit sein. es braucht doch de gewisse beidseitigkeit.

ohne witz, wenn des an partner hobs oda an crush: überlegs eich kurz, wos ihr on der person so findets. und i hoff, eich folln senre schenen augn, de aufgeschlossene oat, sena mindset oda der kontostond ein (letzteres woa bitte a spaß!!!!!!! muas man jo heitzutoge imma kennzeichnen den humor). und nit sochn wie „bin gern mit dem zomm weil er mi mog, mir olles kaft oder meine eltern findn ihn nett.“ wos i schon oft fane erklärungen ghert hob, warum man mit wem banond is, werd ma gonz kolt/haß.

es is a riesenuntaschied zwischen gmegt/gliebt werden und megn/lieben. und des zweitare is imma wichtiga. weil es bringt nix, wenn du ihm taugst, oba du da eher einreden muast, doss de ihn a willst. lei weil er an taycan turbo s foat. wenn er dei herzl nit fladdat und millionen schmetterlinge in dein bauch hupfn losst, is es auto a lei egal.

es is es gleiche beim daten und so: wie oft denkt man sich „wos werd de person von mir holtn? werd der person des gfolln wos i onhob? i ziag ma des lieblingskleidl on, darin mog mi de person.“ jo schen und guat, doss man jemanden gefallen will. OBA es is jo tausendmol wichtiga, zu schauen, ob man de person a mog! weil nur mit wen a gspusi zu ham/zamm zu sein, weil de person dir aufmerksamkeit schenkt oda bluamen, di umwirbt und den hof mocht: reicht holt nit.

es passiat vielen von uns oft, doss se sich suagn mochn, wenn a person sich „komisch“ vaholtet. warum schreibt sie ma nit hinta, wenn se fuat is? warum snapt er ab ana gewissen uhrzeit nerma? hot er den sotz ernst gmant oda woa des lei gaude? hot er des lei gsogt, um mi ins bett zu gregn? blablabla. wir spucken in de kepfln von den ondan uma und suagn uns drum, gmecht zu wern onstott sich gedanken zu mochn, ob de person uns passn tat. trifft de person meine erwortungen? konn mi de person glücklichER mochn wie i es jetzt schon bin? des sein frogn über de man sich mehr gedanken machen kennt.

gonz salopp ausgedruckt: wenn da dei hesl nit oberutscht, wenn di de person onlocht, oba de person di schoaf findet: werd da sex lei semigeil!! lei dieses gewollt werden werd nie so angenehm sein wie des selba wollen. is schon eher a großa untaschied.

weil am ende, wie oft werd i des no sogn: du > de welt. wenn er sog er tat di ungschminkta schena findn, brauchst nit dei makeup obawischn, sundan den pfostn konnst schickn. wenn a mädel will, doss du ausn fuaßbollvarein aussteigst, bevua ihr überhaupt es 3. date ghabt habs, zeugt des nit von ana schenen zukunft mitanonda. wenn du lei drauf schaugst, ob du jemanden taugst und donn vagissest, ob dir de person überhaupt taugt.. erinner di dronn, doss du am ende irgendwonn wieda alan sein kenntest, mit dir selba. also. vagiss des echt nit.