wir sein nit alan

a blogpost, der schon gonz long gschriebn kert. von meina seele oba in eichre herzln. ma i sogs eich. i hab den blog jetzt vor über 3 joa gstartet. mit dem gedanken, meine träume, ideen, meinungen und so weiter zu teiln und obazutippen. dinge, de MI betreffen und wos ongehen, zu vaoabeitn. mir quasi olles von da seele zu schreiben und des mei literarische spielwiese zu nennen. doch wissts wos draus woan is? a gonz a große lehre. de wohl greßte lehre überhaupt. und zwoa de, doss i nit alan bin. niemols. und ihr a nit.

oft schreib i blogposts kreiz und quer. mittwoch gehts um liebeskumma, am sunntog ums selbstbewusstsein, donn wie man als single so lebt und donn beziehungstipps. also es is nit schwer zu erkennen, nit jeder blogpost berührt mi zu der zeit, wo er gepostet wird. dennoch passiat es eigentlich wöchentlich, doss ihr in meine dms slidets mit „olta i fühl es so!“ oda „warum beschreibst du grod 1:1 mei leben?“ und des is herrlich. nit herrlich, weil ihr so fühlts. sundan, doss wir uns olle verstehen und gleich fühlen. manchmal nennts ihr mi a hexe, weil i gspia wos ihr brauchts. und i werd des goa nit verneinen, weil eventuell bin i jo auf de welt dafia kemen, um eich de herzlen zu berühren& eich weiterzuhelfen? magie tat i auf olle fälle gspian. 🌝

letztens schreibt ma a girl, sie wa gern so selbstbewusst wie i. und i schau in ihr bio steht do 28. wie konn a 28-jährige auf mi „neidig“ sein oda mi als vorbild segn?? i man, de hot de lebenserfahrung oda? und i bin mal in ana meiner arbeitsstellen in de kuchl und a kollegin mitte 50 bleat am tisch. und i: wos is los? und sie: larissa, i hab liebeskummer. mit 57?? wie? i hab lang gmant, liebeskummer is für bis 30 reserviert und danach musst an ausnahme-bescheid ausfüllen. heit was i, bei liebeskumma sitz ma olle im gleichen boot und entscheiden lei, wonn und wie ma aussteigen. (klassiker: mit bauchfleck voll ins wossa und wir steigen ins rettungsboot „alk und party“.

richtig irre is es fia mi, wenn mädels, de fria meine vorbilder woan, mir heit schreiben, doss se mi beneiden/guat finden oda sich wos obgschaut hom. weil spoiler: kana von uns hot sei leben im griff. i was ba mir wirkts oft so oba donn blea i schon wieda, wenn ma wer schreibt, doss er findet, i nerv ahhahaha. na es gibt toge, do geht olles zu nah ahah.
oba echt, de girls aus da schulzeit de fia mi der inbegriff von coolness woan, sein am ende nur gonz normale frauen, de a oft strugglen. und i hab a gmerkt, viele leben des motto schein, nit sein richtig guat. weil wenn i sog i bin selbstbewusst, bin i des a bei an typen, der damit nit umgehen konn. des is ma holt echt a rätsel wie man sich fia wen vastelln konn. i konn nit mol so tuan, als tat i mi nit leiden, lei damit i wem mehr gfoll. und i bin holt a nit mega intressant fia an boy, weil i so mystisch und so bin. na bin eha a offenes buach, des glei mol olles dazelt (wenn i will) haha.

jetzt a paar heilende worte, de i fia uns alle hob:
durch mein blog und all de arbeit hier hob i ans glernt: wir sein nit alan. und es is irgendwie so schen, zu wissn, doss wir olle so verletzlich sein. doss wir olle a verletzt woan san und wirklich ehrlich mit den wunden und narben umgehen. wenn neben mir a mädel am klo bleat, weil da crush mit da ondan schmust, i ohne zu überlegen sie in meine oame ziag. doss mir wer aufhilft ausn da „mir werd olles zvü“-loch ohne doss i frogn muas. wenn du sigst, doss des pärchen grod vua deinen augen schluss mocht und du hingehst zu ihr mit den worten „olles werd guat. du glabst es ma nit heit, oba bold“. es sein unzählige solcher momente schon passiat, jede von uns konn mindestens ane dazelen.  irgendwie greg man do so a verbundenheit zomm, de da niemand nehmen konn. es is so schen, verständnis von fremden seelen zu bekommen, weil se wissn wie du di grod fühlst. wenn i wos obtipp zum thema „der richtige kerl hot mi stehn lossn“ und zwahundert girls ruafn „I FEEL U“. wenn du dein ex verlost, um stärker zu werden und di donn noch ondre girls pushen. des is so unglaublich geil wie a schen. wenn drei girls, de vom selben typen vaoascht woan sein, sich nit mit hass begegnen sundan hond in hond sich zur theke bewegen und drauf an zwa shots heben. es is schon mehr als beruhigend, zu wissen, doss wir olle unsre ängste und geschichten und erfahrungen mit uns trogn und de uns zu den menschen mochen wos ma sein. doss wir sochn glernt ham und ondan mitgeben und a ondan unser mitgefühl aussprechen, ohne doss es gezwungen is.

den greßtn fehler, den i mei gonze jugend begongen hob: imma geglabt, i muas do alan durch. lei mir passiat des. diese opferrolle hot ma so guat gepasst, olta grod doss des nit verfilmt woan is. und diesen fehler hab i nit alan gmacht, des woan ja unzählige wesen so eingestellt. warum sog uns des irgendwie niemand? warum is selbstliebe und reflektion ka unterrichtsgegestand? fia des tat i sogoa studian gehn! weil i würd gern mein alten 16-jährigen ich sogn: nit lei du fühlst di so mies, wenn jemand über di lästert. des sog oba nix über di aus, sundan über de person selber. i schaug auf de zeit hinta und tat ma echt wünschn, gewisse sochn fria gwusst zu hom. eventuell will i deshalb den generationen noch uns bisi wos aufn weg mitgeben.

wir ham an buchclub gestartet. was für mi immer schon a klana wunsch woa! war a der auslöser für den blogpost irgendwie. mit dem buach wahrheit oder pflicht von da wunderbaren lena. und nachn 1. kapitel is unsa chat voller „i fühl mi weniga alan“. und des is schen. generell is es unbeschreiblich, dass frauen in verschiedenen lebensformen und mit altersunterschieden sich verbunden fühlen. und wir haben in unsren zoom-calls a gemerkt. Du musst gar nit mama sein, um a mama zu verstehen. ohne selbst des durchgemacht zu haben, darfst du verständnis zeigen. und i bin wirklich dankbar für diese runde voller toller frauen, de ihre ängste und sorgen von damals und heite so selbstverständlich geteilt haben. dass du da wirklich gesessen bist und da denkst: hätt i des lei früher gelesen und gspiat. egal, ob es der schmerzhafte liebeskummer woa oda die bis heute ankriechenden selbstzweifel: es gibt imma wen, der di versteht und alan, dass dir manche sachen bewusst sein, is schon a riesiger schritt.

zum buach selbst a noch amal: Lena Kupke beleuchtet das Thema Frau sein oder besser gesagt Erwachsen werden auf a herrliche, erfrischende Art. a wenn sie 10 joa älter is als i, gibt es kapitel, de hätt i schreiben kennen. von enttäuschungen über eigene fehleinschätzungen bis hin zum klassischen „i hab meine tage und trag a weiße hose“ gibt es hier viele themen, de aufgegriffen und bearbeitet werden. vorallem ihr kapitel über freundschaft hat ma so viel gegeben. es is egal, dass nit jedes kapitel für jeden gleich interessant is. im großen und ganzen holt lena jedn an einer stelle ab und setzt ihn mit an erleichterten „i bin doch nit alan ab“. gerne lesen, wenn man sich verstanden fühlen will!

disclaimer: i sprich hier zum grestn teil von weiblich gelesenen personen. liebe männer, wenn ihr eich vastonden fühlts, GO. gerne! i hab in den letzten wochen vermehrt mitgreg, wos der „vorteil“ is weiblich gelesen zu wern. es is uns nämlich mehr erlaubt, selbstliebe zu lernen und an uns zu arbeiten. für viele männlich gelesene wesen is des nämlich nit so von der gesellschaft angesehen, was natürlich bullshit is. a jungs sollen ihr benehmen/verhalten reflektian. i hab anfoch in den letzten drei joan de erfahrungen mit einschließlich girls gesammelt. daher wirkt es hier alles so weiblich. bitte vazeihts ma des und ihr seids genauso willkommen wie jeda mensch do. weil hauptsoch liab!