wos i gern tat

wos i gern tat

24. Dezember 2021 1 Von Laxobu

es is weihnachten. frohe weihnachten ✨a poa gedonkn, wos i eich schenkn tat.

i tat so gern eich olln zu weihnachten a glasl voller liebe schicken, des brauchts lei aufmachen und schon fühlts eich guat. i tat eich gern es schnurren von da zola schicken, des bringt mi imma oba und beruhigt mi. i tat eich de luna schicken, damit se mit ihrn kepfln on eich schmust, sabbat und anfoch nit aufhert. i tat eich so gern kurz de ängste, de des hobs nehmen und anfoch klana mochn oda wegpusten. i tat so gern fia eich den mut hoben eichan crush zu sogn, doss ihr de person megst und doss donn de funkn fliagn. i tat gern sternschnuppen verschicken, damit ihr eich an wunsch sogn kennts, der donn a in erfüllung geht. i tat eich so gern de herzlan richtn, de wundn zommpickn und eich bussis auf de stirn geben., und aufs bauchi. und i tat so gern eich olle umoamen, a bisi zlong, weil man jo nie was, ob es de letzte umoamung woa. i tat gern eich briaflen schreiben und eich es gefühl geben, doss ihr nie alan seids. des tat i eich olles gern zu weihnochtn vapockn und a schoki dazualegn.

i tat so gern menschn, de eich weh geton hom, mit schnee einreiben& senen, ab dem moment, wo ihr geheilt seids& endlich verstehts doss ihr ohne se kennts, a glaskugl vors gsichtl druckn, wo se eich so glücklich wie no nie segn. ohne se. i tat so gern olln vawondtn von eich, de noch kindawunsch, hochzeit, partner und all de intimen fragen, de se nix angehen, sogn, doss se sich um senre ongelegenheitn kümmern. nit jede frau will& kann mama wern. jeda der eich toxisch auf des thema essn/alkohol anredet tat i gern en mund zua pickn. (sonntag kimmt da a blogpost!!) i tat gern jedn, der weihnachten allan vabringt, zomm in an raum mit ondre steckn, damit de macht der gemeinsamkeit wirkt. i tat gern ollen scheidungskindern, denen es nit schen tuat, doss mama& papa nerma banond sein, so vü kroft fia de weihnochtstog schicken & se solln merken, doss de liebe zum kind fia imma do sein werd, a wenns bei den eltern nit greicht hot.i tat olle leit, de unbedingt an „tatsächlich liebe“ moment ham wolln mit an schild& 10 tonnen mut, zu de häuser fian, damit se des wunder vollbringen kennen.

wenn i christkindl wa, tat i des jo tuan.

wenn i lei kennt.