He, wast wos?

He, wast wos? De X is schwonga!
He, wast wos? De sein getrennt!
He, wast wos? Sei Vota hotn des Auto gekaft!
He, was wos? LIES WEITER.

Ihr schreibt a Diandl, wie se so vü obgnommen hot. Sie mant lei, doss des jo unwichtig sei. De Ontwort drauf is „Ma bitte, es wär schon guat, doss de Leit wissn, wie du in de Mogasucht grutscht bist. Konnst jo a Vuabild fia uns Follower sein. Unverantwortlich.“

Geht a Mädi hochschwonga voabei. Bese Worte falln am Nebentisch. Vua 3 Monat hot se no mit 2 Buamen gschmust? Sie is jo mittn im Studium? Lebt de jetzt fias Kindageld? Hot se jo fix des lei gmocht, damit se mitn Hawara zammbleibt? Des Mädl tuat so als tat se nix hern. Oba i sig, wie se hert.

De zwa sein frisch valiebt. Drei Monat love pua. Kafn sich a Wohnung. Baun a Haus oder ziagn lei zomm. Egal, wos se tuan. De Leit WISSN, doss es zfrua is. Vü zfrua. Wer ziag so fria zomm? DES GEHT NIT. Do zohlt fix sei Papa es Haus, es is fix in 6 Monat aus. GONZ SIA, weil de Leit wissn des.

Bade 30 ohne Kinda. Sie liebt ihrn neichn Job. Er sei freies Lebn. Oba Familientreffn, de wern imma schlimma. Wonn kims Putzi??? Sie sog eiskolt NIE. Erschrockene Blicke, Tante Martha greg fost an Herzstillstond. Empörtes WARUM. Vadammt, sie konn kane Kinda gregn. Wos is schmerzhofta als des? Des sogn zu miasn, sich rechtfertign zu miasn, warum se ka Kind hot. Und des bei jedn fuckin Familientreffn.

Er is ewig ohne Freindin. Es Lebn long. Ständig greg er blede Kommentare „Bah gach werst schwul.“ OMG. Ob er jetzt homo- oder heterosexuell is, spüt ka Rolle. Warum? Weil de Leit diese Ongst hobn, is jo schon oag gnuag oda? Sich Gedankn machen, wen der ondre liebt und nur desholb niemanden hot. Es is lächerlich.

Es is olles lächerlich. oda? Denk i folsch? Is es echt dei Kaffee, wenn a Mädi mit 22 Mama wert? Deaf se des nit ohne dei Erlaubnis? Darf man ohne dei OK Bloggen? Oder verurteilst du donn a de Leit. Host du mir zu sogn, ob i Bloggerin sein deaf? I glab nit. Es geht di a nix on, warum de Cousine von dein Schwoaga mit 35 imma noch ka Baby hot.

Erinnerung: Nit jeda wü so a Lebn hom wie du!!
Du bist dei Geld fia Zigarettn aus, a ondra fia Gwond, a ondra fia Instagrampromotion.
Du wüst später 3 Kinder, er kane, sie a nit.
Fia di is Zammziehen ab 2 Joa ok, fia ondre passts fria.

Judgen is es neie Rauchn- ungsund und mocht kronk.

He, wast du wos?

KER AMOL VUA DEINA EIGENEN TIA.

Dir, de Person de ständig über ondre urteilt, hot eventuell kan Partner, kane Kinder oda eben an Dauagrant. Hot dir schon mol wer gsog, wie nervig du Grantscheibn bist?? Redest mit der Person nerma? Do hot de Person Glick. Gonz ehrlich, dei Bewertung braucht kana. Es juckt kan, wos du denkst. Niemand braucht dein Segn, fias Heiratn, Zommsein, Schmusn, Leben. Egal wos.

Und omg, mir folln so vü Nomen ein. Meinen Leser*innen a. Beochtets so wen nit. Es zählen lei de Leit, de eich a guats Gefühl gebn. Versprochn.