Positive Gedonkn konn man trainieren

Naaaa des is ka Clickbait. Des is de reine Woaheit, de i imma wieder predig. Es gibt nämlich Moods, do konn man super on sich oabeitn und Sochn vorbereiten für Phasen, de nit so schmeilogeilo sein. Wie so Tierchen vorm Winterschlaf, onfuttan und donn liegen gehn und überleben. So kann man des mit schlechten Tagen a machen.

Positive Vibes brauch ma imma wieda. Wie de Wilden Hühner damals so geil gmacht ham mit Marmeladegläser voller schöner Momente, geht des heit a. Muss ka Glasl sein, kann a Biachle sein, kann es Kepfle sein oda es Handy egal. I find es guat, wenn man de Sochn wo hin schreibt und lesen kann im Ernstfall.

Lenk de Gedanken

Sobald du merkst, es geht da nit guat. Erinner di on schene Momente. Wonn woast du mega happy? Was hast du schon geschafft im Leben. Wo host du gmant, du werst des nie überstehen und hast es schlussendlich gmacht? Anfoch sobald de bösen Gedanken kemen, umlenken oda ablenken.

Zukunftsangst und Vergangenheit

De Ongst vor da Zukunft ist oft irrational. Niemand konn in de Zukunft schaugn und wissen, wie es werd. Also gib dem nit zvü Plotz im Kopf. Moch da liaba Gedanken über des Hier und Jetzt. Wos is jetzan wichtig. I glab es is grod egal, ob du in 7 oda 8 Joa heiraten werst oda a nit. Und überdenk nit schon wieda den Fehler, den du vor 4 Joa gmacht hast. Ehrlich. Vergangenheit is vergangen, da hast kan Einfluss mehr drauf. Abschließen, loslassen und akzeptieren. Konzentria di auf Sochn, de du beeinflussn konnst- die Gegenwart. Mit deiner Präsenz, mit dein Wachsein.

Loss die Traurigkeit traurig sein

I wü eich nit zwingen, olles glei zu überspielen. Davon bin i ka Freind, sowos konn i selbst nit amal. Also seids traurig und moody, wenn ihr des heit seids. Is jo ok. Oba zags des a den ondaren und tuats nit als wär „olles ok.“ Aspoa da den emotionalen Druck, doss du dir nix onmerken lossen darfst. Darfst du. Ehrlich. Bleib nit für immer traurig, oba für den Moment is des so in Ordnung. De Woaheit überzuckan mit Lügen bringt niemanden wos.

Dei Kepfl is es

Dei Kepfl is es, nit de Situation. Is dei Hoaschnitt echt sooooo schlimm? Oda lei dei mangeldes Selbstbewusstsein? Is der Snap von dem andren Mädel so sexy gwesn oda eher dei Ongst, verlassen zu wern? Dei Kepfl malt dir oft de schlimmsten Sachen aus, Sachen de e nie passian tatn. Also otme gscheid und sei da bewusst, doss dei Kepfl di oft austrickst und bisi vaoascht. Geh nit imma auf wie a Germtag. Tua liaba omten und umlenken und denken „Es is olles nit so schlimm.“ Loss de Emotionen über di kemen oba donn is bitte a Ruah. Tua nit olles tausendmol überdenken, nei aufrollen und verzweifeln. Sei dir bewusst, doss dei Kepfl mehr Kreativität auslebt, als du willst.

Spoiler: Nit olles wos du denkst, stimmt a. Glab dir nit olles. Oft hilft es ondare zu frogn, wos se denken. Oba bessa wa, wenn du selber drauf kimmst. Bin i wirklich so dick? Na. I fühl mi nur so dick und bin unsicher. Er betrügt mi sia, wenn i nit do bin. Na, tuat er sia nit, weil er mi echt mog. Korrigiats eire negativen Gedanken so guat es geht. Oda frogs um Hilfe. Und nehms de Hilfe a on.

Es wird nie Sinn mochen, gegen sich selber zu kämpfen. Do valiat man lei. A gegen de inneren Dämonen hot man ka Chance. Erstickts de mit Selbstliebe und Akzeptanz. Lebs eia Leben und seids eich bewusst, wie guat es eich geht. Und schätzts es Leben mehr. Es is so vü Oabeit. I hab den Blogpost in 15 Minuten obagetippt, selber dronn goabeitet hob i 2 Joa. Und es eich zu dazelen bringt nix, wenn ihr es nit selber ändern wollts.

Und herts auf diese „sad kids“ zu sein, de es geil finden, broke zu sein. Des is bullshit. Broke zu sein is a Phase ok, oba nit es gonze Leben. Glück is so vü schena.

Also die Notfallliste sollte beinhalten:
– schene Momente, de dir a gutes Gefühl geben
– a Playlist mit Liadan, de di beruhigen
– Gerüche. Was schnupperst gern? Wos bringt di oba??
– Meilensteine. Was hast du schon alles erreicht im Leben?
– Was magst du gern an dir? Deine Stärken? 

I hob noch so vü zu sogn. Oba es freit mi schon so, doss anige sich verbessert ham und mir davon dazelen. A Mädi mant sie hot sogoa ihr Beziehung durch anige Tipps retten kennen. Segs. Es is holt olles a Soche von eich selba. Seids es eich wert. Weil sunst holt eich es Leben sowieso ein.

Jemand, der sich nie selber lieben will, wird nie glücklich sein.

Bussis.