Wie kema uns lei valian?

Es is Zeit. Wieda Zeit fia a bisi Gefühlschaos, Poesie und bisi Herzlscheiße. I spü mit offenen Karten. Deshalb sog i glei, wo i de Inspo her hon.  Schwör, supportets bisi des österreichische Schatzi Fabian Wegerer

 

Wie isn des gongen?
Wie hom wir uns lei valian kennen?
Wie konn man sich Oam in Oam valian.
Erklea ma des, bitte.

In deine Augn sig i, doss du nerma do bist, wo i bin.
Du bist nerma bei mir.
Bevua i es überhaupt mol realisier, doss i di valia.
Hon i di valoan.
Hom uns valoan.

Es fühlt sich ehrlich gsog sogoa a bisi on,
als wa wos in mir drin gstoam.

Oft homa uns gfrogt,
ob wir hinta uns stehen oda
decht uns lei im Weg.
Du wolltest des nerma,
du wolltest gehn.
Du sogst, i muas des verstehn.
Lei..
muas i des wirklich?

Bade wollten Gewinner sein.
Erfolgreich sein.
So a super couple,
de Erfolge feiern und Siege teilen.
Am Ende hot wer kirza tretn miasn.
Laut dir, woast du des
weil i woa imma des fuckin mess

Schaugn host auf mi miasn,
desholb wüst des mit uns jetzt in Wind schiasn.

Es tuat ma lad von mir
trifft auf des
Passt schon von dir
I wisch de Tränen weg
du druckst mei Hond weg

In wenigen Sätzen sogst du des,
wos du sogn willst.
Doch i begreif de Worte bis heit nit.

Wir wollten uns lei holtn,
dabei homa uns aufgholtn.
Olles sollt bleiben wie beim Oltn.
Des is jo e imma des wos ma eigentlich wolltn.

Ausn Weg gehn,
nerma beinonda stehn.
Des is des wos du jetzan willst.

Des geht jo nit. Es geht anfoch nit.
Jede Nocht schlof ma zamm ein,
jeden Tog woch ma nemanond auf.

Wie isn des gongen.
Wie hom wir uns lei valian kennen?
Wie konn man sich Oam in Oam valian.
Erklea ma des, bitte.

Und kimm zruck zu mir.
Seima wieda a wir.
Bitte.

---

Diese Pärchen, de durchgehend glücklich sein. De nie streiten, de a guates Sexleben ham, deren Hochzeit man sich schon glott erwoatet. Wo de Trennung jeden trifft wie a Stanschlog. Wo jeder mit offenen Mund do steht und es sich nit aklean konn. Wo ana von badn nit wirklich damit gerechnet hot und quasi an den Kopf gstoßn woan is. Anfoch so. Aus dem nix. Aufamol is kloa woan, doss dieser gemeinsam bestrittene Weg alan doch leichter is. Aufholtn, wollt man sich zwoa nie. Hot man oba. Aus Gewohnheit. Aus dem Alltagstrotz ausa. Man losst den ondan holt gehn, weil er kimt jo e wieda. De Person kimmt schon zruck, in des Leben, in den Alltag. Bold is wieda olles bam Oltn. Gonz sicha. Gonz bestimmt.
Es vergehen Toge, Wochn und Monate. De Person is imma noch weg, da Schmerz oba noch do. Immer noch ka Erklärung, immer noch de tausende Frogezeichen. Konn des sein? Muas des sein?
Wie kennen solch perfekte Beziehungen ausanondagehn? Wie konn man sich beim Lieben entlieben? Wie konn man sich so aus den Augen valian? Do woa doch immer de schützende Hond, de an eingholtn hot. Do woan doch immer de offenen Oame, de an aufgongen hom. Wo sein de jetzt? Warum sein de nerma do?

Um a bisi realistisch zu wern, es ghert anfoch zum Leben dazua. Menschen kumen und gehn, de Gefühle a. Nit jede Trennung is am Ende a Verlust, jeder neien Situation konn man a wos guats obgewinnen.

On olle, de sich do verstondn fühl. I denk on eich. Es hot olles an Grund, olles an Sinn. Gehts eichan Weg. Ihr schoffts des olle ❤️ Ihr seids nit de ersten, de do durch hom miasn, ihr werdets a nit de letzten sein. Bussis.