Gegenteil von Einsamkeit bitte

„Wir haben kein Wort für das Gegenteil von Einsamkeit, aber wenn es eins gäbe, könnte ich sagen, genau das will ich im Leben.“- Marina Keegan

I geh anfoch frech davon aus, doss ihr des Zitat geschweige de Rede von dieser Marina Keegan noch nit gekannt habs. De Rede von dieser zauberhaften Seele leg i eich ans Herzl, weil es mi so berührt hot. Auf Englisch konn man es Original do nachlesen. Zur Einstimmung.

Marina Keegan hot diese Rede gehalten, is ins Auto eingstiegen und verstorben. Mit unglaublich jungen 22 Joan. Schrecklich. Wieder amol a Situation, de unverständlich für mi scheint.
Hob i doch ungelogen ihr Buach seit Juli drei Mal durchgelesen und stolper immer wieder über Ansätze, de mi so bewegen und zum Nachdenken bringen. Wos tat i gern mit 22 a Buach schreiben, des donn später Menschen immer und immer wieder zum Denken bringt.

Oft frog i mi selber, wos i eigentlich will. Dann zähl i natürlich glei meine 10 Traumautos auf. Okay mol im Ernst, es muss anfoch genug Plotz fia a bisi Sarkasmus und Witz im Leben bleiben! Imma wieda her i, doss i doch olles lei ins Lächerliche ziag und niemand mein Sarkasmus versteht. Also bitte, liebe Leser, des woa grod ironisch. Wenn i mi selber frog, wos i will, denk i nit an materielle Dinge. I denk an Gefühle, de mi überkemen sollten. I erinner mi an Situationen, de sich wiederholen sollen und wünsch mir Momente, de i noch erleben will.

Dank an Zitat von Atticus hob i gmerkt, doss i ma viel zu lang wos folsches eingredet hob. I wollt unbedingt L I E B E spian, dabei will i doch nix außa geliebt zu werden. Sein nämlich zwa verschiedene Poa Schuach. Oba dazu kema wonn ondas, ok?

Nie im Leben will i reine, schmerzhafte Einsamkeit spüren. Do wo du zwischen ondaren Menschen sitzt und di trotzdem so abgekapselt und alanig fühlst. Du spiast nit mol mehr de Hond, de du holtest. Du sigst nit mol mehr de Sternlen, de du dafua in den Augen der anderen gsegn host.
Es Gegenteil von Einsamkeit wär doch perfekt. Konn jemand a Wort dafür finden? Na, es is nit „Zusammen sein“. Des denkt man sich grad beim Lesn hm? Muss i eich leida entteischn. Nur weil i mit Menschen zusammen bin, kann i dennoch allein oder einsam sein. Nur weil i mit anderen in an Raum bin, hast es nit, doss i mi wohl fühl. Des Gefühl, des holt es Gegenteil von diesem grausigen „i bin so einsam“ is, sollt uns überkummen. So richtig schen, sicher und woam fühlt sich des on.

Viele von uns fühlen sich oft einsam. Sogs nit alan dazua, alan bedeutet nit zwingend wos negatives. Des sein a wieda zwa verschiedenen Schuach. Alan sein kann a a Entscheidung sein mit positiven Auswirkungen. Nach an wilderen Wochenende frisch geduscht alan mit an Tee und an Buach ins Bett liegen. A Traum. Mit sich selba alan zu sein tuat sowos von guat und des braucht jeder amal. Dem wurde der fancy Titel „ME TIME“ geben. Doch es gibt a Zeiten, da is man alan und es tuat schon schiach. Nur weil man grod a „i will a Beziehung“ Alanigkeit vaspiat, hot des oba ima no nix mit der Einsamkeit zu tuan. Viele übertreiben halt schnell& sein glei einsam und verlassen, weil de BF amol in ian Leben a Date hat und ka Zeit hat. Manche sein jo forever alone, weil se 3 Monat nerma gschmust ham. De Leit vergessen, wie guats senen geht. Wos is mit den Menschen, deren Partner verstorben sein? De Einsamkeit will i nie spian. Wie gehts wohl all den älteren Wesen, de alan im Altersheim vabittan, weil es ka Familie mehr gibt, de auf Besuch kimt? Und all de Waisenkinder? Unsa Einsamkeit is oft so a Luxusproblem, lei weil ma nit 24/7 Aufmerksamkeit und Liebe gregen. Dabei merk ma des lei oft nit und segn de Klanigkeiten als selbstverständlich.

Wos man in Fällen von trostloser Einsamkeit tuan konn?

1. Schau zum Himmel. Vielleicht sigst do an Stern oder a Wolke. Gonz viel ondre Leit segn des a. Du bist nit einsam, weil wir sein olle untam gleichen Himmel. Wir sein unta de gleichn Stern. Wie viel einsam konn man do noch sein?
2. Es klingt jetzt wieder mol ironisch, oba i man es ernst. Wir fühlen olle zomm dieselbe Einsamkeit. Des Verliebtheitsgefühl kennen wir doch a olle, Trauer leider a. Also wie einsam bist du bitte, wenn irgendwie de gonze Bevölkerung genau was, wie du di fühlst?
3. Atme 3 mol durch und konzentrier di auf dein Atem. Du atmest, des hast, du lebst. Wie konnst du als lebendes Wese bitte einsam auf der Welt sein?  Du glabst, niemand versteht di, oba i hob da schon gsog: Wir kennen olle des Gefühl. Sei dei eigener Superheld und rett di selber fia den Moment. Red dir ein, doss du nit einsam bist. Sog da, doss du do fia di bist.
4. I will da jetzt nit zu nahe treten. Oba gonz ehrlich, du bist schon unfair. Du bist umgeben von zig wunderbaren Menschen, de sich um di bemühen. Dennoch sigst du nur des Negative und des Schlechte.. Wieso losst du kan zu dir zuabe? Klar, es gibt genug falsche Freunde und rachsüchtigen Wesen und bösen Menschen, ABER es gibt genauso die guten. Jetzt bekämpf nit die starken Seelen, nur weil du von nit so tollen Menschen verletzt worden bist. Jeder Mensch hot a Chance verdient. Nimm Hilfe an, wenn sie da angeboten wird. Oda frog a um Hilfe. Oba fall nit ins Loch der Einsamkeit, nur weil dir zu bequem bist, Menschen helfen zu lassen, de es echt wollen. Oft hilft mal a Anruf, manchmal a Nachricht. Anstatt von der Einsamkeit erschlagen zu wern, kämpf da gegen an. Mach a Treffen aus, bastel was für deine Liebsten, skype deine Girls an. Des hilft sooooo.

Monche miasn ihr Leben viel zu fria auf da Erde aufgeben. Also vielleicht sollten wir es Leben schätzen und uns auf de Suche nach dem Gegenteil der Einsamkeit mochn. Weil zwa Menschen mitanonda sein schon mol weniger einsam. Addiert man donn noch a poa guate Seelen dazua, konn es schon fost nerma passian.

Weil die Marina hot nämlich ans gwollt:
„I want enough time to be in love with everything . . .“

❤️