Wie wärs mit „Zupf di“?

Für die wahre Liebe sollt man kämpfen. Sog man doch so oda? Oba eigentlich is des jo kompletta Bullshit. Wieso sollt i jemanden überzeugen müssen, doss er bei mir bleiben sollte, wenn er des onscheinend nit will? Ihn zu überreden, doss Zeit mit mir zu verbringen, jo wos schenes is? Wenn er des nit so sig, Pech ghobt. Zupf di.

Die Lisa fliagt soooooo aufn Simon. Leider schreibt er ihr imma lei so selten hinta und donn kumt a lei a „Wie gehts? Sorry hon ka Zeit ghobt.“ Ach, hauptsoch er meldet sich. Sie hupft wie irr durch de Gegend, schmeißt mit Herzln um sich und sig sich schon in an Brautkleidl vua ihm stehen. Er hot jo echt Wichtiges zum tuan. Es is doch schen, doss er sich noch 2 Wochen Funkstille gmeldet hot. Liebe Lisa..
wir sein im 21. Jahrhundert. Der Kerl hot immer sei Handy mit, Snapchat verwendet er 24/7, während da Oabeit druckt er a lei auf dem Kastln uma. Und du glabst ihm des, doss er ka Zeit ghabt hat? Wieso konn er in da Mittogspause donn Fotos auf Instagram liken. Wir leben in ana Zeit, wo du ehrlicherweise imma und überall jemanden erreichen konnst, wenn du willst. Per Whatsapp, Facebook, Anruf, Brieftaube.. WILLST du di bei wem melden, host du a de Möglichkeit dazua. Du willst Ehrlichkeit? Der Kerl hot holt anfoch ka Lust auf die Lisa. Ehrlicherweise hätt er ihr a Message schicken sollen à la „Es tuat ma nit lad, doss i mi nit gmeldet hob. Oba grod is ma fad und deshalb meld i mi bei dir, weil i e was, doss des di komplett gfreit.“ Des wär unhöflich, oba de Woaheit. Sie sollt ihm am besten a „Zupf di anfoch.“ hinta schreiben.
(Tuat sie bestimmt nit, sie laft ihm noch so ungefähr 3 bis 8 Monat noch, bis es ihr zdepat wert und sie sein geilaren, netteren Cousen aufreißt. Des wünsch i da Lisa!! Und ihm wünsch i a Karmaheimspiel mit an Diandlen, des ihn als Trostpreis oder Sidechick verwendet hihihihi. Hexentalk Ende.)

Nina und Jonas sein frisch zomm. So richtig a Schmetterlingstreiben spielt sich im Beichl vom Jonas ob, oba de Nina tuat so komisch. Sie sog de gonze Zeit so Sochn, de ihm a bisi herstressen. „Eigentlich wär i wohl gern Single.“ „Wegen dir konn i jetzt nerma mit de Mädels ziagn gehn, weil i tat do e lei mitn feschn Nochbabua schmusn.“ „Red amol mit deiner Ex und i bin weg.“ Blind vor Liebe will er sie nit hergeben. Also erlaubt da Jonas ihr olles. Grod doss er in da Fria beim Aufstehen nit sog „DANKE, DOSS DU NOCH DO BIST.“ Zwangsumarmung und Obschmusa inklusive. De zwamolige Seitenspringarei hot er ihr sowieso verziehen, weil, ma sie will jo sunst e goa nerma bei ihm bleiben..
Jonas, bitte. Loss sie gehn. Sie soll sich zupfen. Du solltest da a Diandl suachn, des gerne bei dir is und de du nit förmlich mit ollen Freiheiten onlocken sollst. Du bist mehr wert.

Die letzte Beziehung von da Vanessa woa hoat. Er hot sie betrogen, er hot sie scheiße behondelt und sie woa anfoch unglücklich. Noch nit amol komplett vadaut hot sie des gonze Drama, oba hauptsoch schon in ana neien Beziehung. Mitn Nico. Wir vergleichen en Nico natürlich lei mitn Ex. Weil er a a Bua is, weil er a a Schwanzl hot. Des hast, Nico wird die Vanessa a betrügen. Er wird ihr a sogn, doss sie zu dick is. Er wird ihr des Fuatgehn a verbieten und er wird a ihr Handy kontrollieren. Oll de Sochen kumen en Nico nit amol in den Sinn. Oba nachdem de Vanessa ihm olle 3 Stund aklean muas, wie depat da Ex woa und wos er olles geton hot, fongt da Nico on sich rückwärts zu bewegen. Er zupft sich, von alan. Najo gonz alan nit, de Vanessa hotn wohl vergrault. Weil er was, doss sie de olte Beziehung amol veroabeitn muas, sie muas amol schaun, wos sie grod selba braucht. Da Nico will ihrn Knacks nit richten und er will nit immer verglichen wern.

Willst du an Menschen in dein Leben ham, der nit amol Teil deines Lebens sein will?

I nimm amol stoak on, doss du grod dei Kepfl schüttelst.
Du solltest niemols dafia kämpfen müssen, doss jemand gern bei dir is. Dei Zeit is so wertvoll und wenn wer des nit so schätzt, hot er Pech ghobt, nit du.
A wenns di momentan mehr beschäftigt und dir sogoa vielleicht weh tuat, glab ma bitte. Des überstehst du leicht. Denk lei a Sekunde on an Menschen, der dei Anwesenheit und Freindschoft schätzt. Ruaf de Person an, „verschwend“ an Moment an an Gedanken über de Person .. donn wirst merken, doss de Person an höheren Stellenwert in dein Leben hot und dir bessa tuat. So konnst donn leichta de ondre Person sich zupfn lossn.

I kenn des jo selba zu guat, wie oag es an zerreist, wenn sich jemand nie meldet oda wenn wer anfoch de Gefühle nit erwidert. Oba i hob glernt, doss wenn du glücklich bist und mit dir selber zufrieden, werd dir sowos echt schnell egal. Achselzuckend losst du de Personen sich zupfen und fertig. Wer es nit schätzt, doss se Zeit mit dir verbringen dürfen, kennen di amol. Hintafrog des anfoch nit, darauf host du jo so oda so kan Einfluss. Suach nit de Fehler bei dir, oft hot es gonz ondere Gründe. Und loss mi in Ruah mit dein „Ma i tat oba trotzdem gern wissen, warum er mi geghostet hot oder warum er jetzt a Ondre hot..“ des is a private Gschicht, de di nix ongeht. Du brauchst do nix nochfrogn, Ontwort gregst sowieso meist kane.
Monche Sochn sein anfoch so und wenn du do nix dagegen tuan konnst, is es holt amol so. Und loss de Ondre in Ruah bitte!!! Fong ma nit wieda mit dem „I mog sie nit“ on.

Des hast nit, doss du dein Kampfgeist glei in de Mülle klopfen konnst, sowie de Menschen, de sich gezupft hom. Kämpf fia Sochn, de di bewegen. Kämpft um Menschen, denen du weh geton host und de du wirklich liebst und se di a.  Kämpf fia di selba. Oba nit um Menschen, de es anfoch nit verdient hom und de es nit amol merken taten.

Du bist ehrlich mehr wert als so a Theater.

Du > Egoisten.
Bussis. ❤️