Vati.

Du bist de Definition von Selbstlosigkeit.

Du sigst Sochn ols Selbstverständlichkeit on, de olls ondre als selbstverständlich san.

Du schneidest ma bis heit en Speck auf, a wenn i 21 bin. Tatest des jemols in Froge stelln? Niemols.

Du lossest mi gehn, a wenns mit schwan Herzn is & lossest de Tia imma offn, folls i wieda ham kim.

Du und di Mutti ergebs a echt a guats Dreamteam im Thema Kindererziehung. Hunderziehung nit sooooou. Generell seids ihr zwa so a siases Paarle. Und ihr lossts Hausparties zua, ihr seids richtig coole Eltern.

Du bist da beste Foalehra da Welt. „Gaaaaaaas Gas GAAAAAAAS!!“

Du host ma gezag, doss a Opel Vectra a vadammt coole Kistn is.

Du mochst da Suagn um mi, tat i ma zwenig mochn.

Du suachst bei meine Fehler dei Schuld. Du wirst de holt nie finden.

Du host ma Gott sei donk dein Humor weitageben. Bist a witziga Teifl du.

Du host ehrlich a Herzl wie a Bergwerk. A Wahnsinn bist a.

Du lossest mi spinnen. Du lossest mi fliagn. Du lossest mi gehn. Du lossest mi zruck kemen.

Du stellst di imma hinten on, dabei wärst du jo vü wichtiga.

Du bist ka Monn der vielen Worte, oba der richtigen.

Du mochst ma kloa, wos Glück bedeitet. Gsund sein, Familie & Freind hom und a Daham hom. Urlaub auf den Dahamas > olles!!!

Du liest mein Blog, obwohl di weder de Themen interessieren noch verstehst du olle Ausdrücke. Mir zu liebe tuast es derwegen.

Du vamittelst ma de Werte, de i in an Monn, in ana Beziehung, in Freindschoft und in mein Leben suach.

Du sogst ma imma „Du brauchst jetzt kan.“ Obwohl du genau wast, du willst lei kan. Na Spaß, du willst lei, doss i mi nit fia weniger hergib wie i wert bin. Moch i a nit.

Du schaust ma zua beim Zukunft planen und hilfst, wo du helfen konnst. Oba niemols tatest ma einereden.

Du lossest mi mein Weg gehn, a wennst nit imma olles glei so verstehst.

Du bist selba kan leichten Weg gongen, fia uns Kinda tatest gern unsre Lebenswege pflostan, damit ma sicher ins Ziel kemen.

Du schaust Vorstadtweiber mit mir.

Du bist da Mensch, den i am wenigsten entteischn wüll und vua dem i den grestn Respekt hon.

Du und die Bambina sein a Herz & a Seele und des is ans da liabstn Sochn auf da Welt.

Du host a Löwenherz.

Du schimpfest goa nerma bei meine Strofzettl.

Du bist so a gscheids Kepfl. Wast so vü und bist a Kopfrechengenie. Dei „i kenn mi nix aus“ is lei a Bledsinn.

Du bist imma drei mol so gscheid wie i. Des find i a ok so.

Du holst mi oft auf den Boden der Tatsachen zruck. Sonft, oba mit Kroft.

Du und dei roter Adidaspullover bleiben ma fia imma in Erinnerung.

Du konnst so geilen Schweinsbrotn mochn und de Pizza vom Grill is da Wahnsinn. Du bist wohl a da beste Burgermacher in town.

Du host in dein Haus an Partykeller einegebaut!! Auf des konn man jo lei stolz sein, des is die coolste Idee ever.

Du stehst Fotos/ Texten/ Daten im Internet kritisch gegenüber, i loss da dei Meinung. Du ma meine jo a.

Du sigst Sochn oft gonz ondas wie i. Muas nix schlechtes hasn.

Du host ma Bud Spencer nahe gebracht. Des hot mei Repertoire on Synonyme erweitert. Tuat da Denkmurmel guat. & meinen nit vorhandenen Bauchmuskeln.

Du host ma schnopsn& wattn& feian glernt. Du mogst es holt nit, wenn i gwinn.

Du bist vermutlich grod wieda bisi zu Tränen gerührt, oba passt schon. I doch a.

Du nimmst ma s genauso wenig bes wie de Mutti, doss i wie imma vü zlaut grod um viere in da Fria ham bin. Oba de Zeitung hob i aufn Tisch glegt. Außerdem probia i imma leise eingehn.

Vati, i was, du wirst noch vieles mit mir durchmochn. Generell mit dem bunten Haufen, wos du Familie nennst (oder nennen deafst. Bist jo genauso donkboa wie i.) Du bist a verdommt geduldiger und herzensguata Mensch. Dir kerat so vü hintageben. I mog echt nit ohne mein Papa jemols sein miasn.

Hob di lieb, Vati. ❤️

PS: i werd imma ham kemen, Papa. Des is jo mei Daham.