Sicher is schod

Sicher is schod

6. März 2022 0 Von Laxobu

hi meine süßen. es kimmt a herzltext, den i bisi liegn hob lossn miasn, weil er brondhas und frisch is. oba guat issa. enjoy 😉 es geht drumm, wenn eich a mensch, der sich ausn leben gezupft hot, gschrieben hot „he du i vamiss di. denk on di“. und ihr seids geheilt und habs damit abgschlossn. weil.. naja ihr seids dazua gezwungen woan. ondre wahl hots nit gebn.natürlich is es schod, doss du nerma in mein leben bist. gonz emotionsfrei gsogt, weil i des schon vaoabeitet hob.
natürlich is es schod, doss i meinen freindinnen sogn hob miasn, doss es di nerma in mein leben gibt. begründung? de gibt es nit.
natürlich is es schod, doss i nerma als ollaerstes, wenn wos schenen passiat, zum handy greifn konn und di teilhobn lossn konn on der soch.
natürlich is es schod, doss i di nerma onruafn konn, wenn mei tog ma zvü woa und da obend zu einsom wert. weil zwa stund telefonian mit dir woa de beste therapie überhaupt. i hob ba dir gonz wertfrei de gonze herzlkacke obliefern diafn, hob da vielleicht wos onvatraut, wos nit jeda was. und du host ma a so vü dazelt, a jedn schas.
natürlich is es schod, doss du no vua zwa wochn geplant host, wos wir no so olls mochn wern, doss i deine freind kennen lernen werd und du mei restliche gang a. und jetzt woa des olles ka plan, sundan lei a tram. schod, doss des lei woate woan, de nie wirkliche tatn wern.
natürlich is es schod, doss i ma gedocht hob, endlich wieda a person gfundn, auf de i baun konn. der i vatraun konn. in dera welt is des nit so easy und zwischen toxischen energiesaugern, de irgendwie nix wohl ausa schlechtes, hob i gmant des is wos echtes. echte ehrliche freindschoft is anfoch OLLES wert.
natürlich is es schod, doss es olles so plötzlich und so spontan vorbei woa. so wie s holt ongfongen hot. oba i hobs zerst nit amol realisiert. wie i s ghobt hob kapiat, woa i has. brennhas. weil olta wos soll des? in zwa sätzen wos beenden, wos a gonzes buach wert wa?
natürlich is es schod, doss de quasi no letzte woche mein blogpost vorab glesn host und jetzt vermutlich nit amal so lesn werst, wos i a versteh. weil i glab, donn tuat da es herzl weh. i tat a kane zeiln mehr lesn wolln von dia, oba du host ma gnuag inspo gebn.
natürlich is es schod, doss i imma lustigaholba gsog hob „egal, wos des wert. du bist und bleibst mindestens an blogpost wert!“ jetzt sans vermutlich 12e de i noch da reih ausehaun werd und i wer do schon so long nerma dei stimm ghert hobn. weil wast du, es is es ma a nit wert. es is es ma nit wert, nochmal jemals wos aufzubauen, wos jemand umgschupft hot. woa im kindagoatn schon so: hot wer mein baustein-turm umghaut, bini aufgstondn und gongen. nit mit großn drama und blean, i hob lei imma schon gwusst: von solche leit holt i mi fern.
natürlich is es schod, doss i des jetzt a so schreib. es werd vermutlich ana der bestn blogposts überhaupt und du gregst dafia holt kan applaus. applaus host dafia davua von mir fia dein goldenen charakter greg, jetzt is holt recht spät. und wast wos i hoff? doss i gonz vü leit damit beweg und erreich, weil de schon erlebt ham, den selben scheiß. mit irgendan ondan menschen, egal welches geschlecht und welchn nomen. se solln vastondn wern, doss nit lei se sich so fühlen.
natürlich is es schod, doss du jetzt überoll wo du eingspeichat woast und auf amol bist jetzt archiviert. damit i nit sig, ob du ma schreibst oda nit. weil de versuchung werd sunst zgroß und gonz ehrlich, tat i nitmol wissn wos i da ontwoatn soll. also loss i es glei.
natürlich is schod, doss mei handy ma imma wieda anzagt „schreib X a nachricht“ via insta oder whatsapp oder messenger und i ma denk „tat i gern. oba ob de person überhaupt no on mi denkt?“ mei handy so „willst a nochricht schreim?“ i so „NA I WÜ SCHREIN.“
natürlich is es olles schod. is es jo imma. bei olle. oba es woa dei entscheidung, von dir alan. natürlich hätt i ma gwunschn wir hom mehr zeit mitanonda ghobt. hätt di jo zum freindeskreis dazua gezählt, eventuell bold als ana der lieblingsmenschen a betitelt. oba man soll niemanden aufholtn. 

du host ma gschriebn. doss es schod is. i sog wie es is: i hobs sott. i vasteh des nit. du host an gesunden menschenverstond, host sia schon gnuag gschissene leit kennenglernt und erkennst mein wert. du host ma dei entscheidung, a endgültige, aufgedruckt, mit der hob i kloa kemen miasn. wie i mit sowos kloa kim? i bin mol grantig, schreib poa blogposts und vagiss nit, wer i bin. und doss leit, de nit in mein leben sein wolln, gern gehn kinnen weils sena valust is, nit meina. jetzt stell davua i bin no nit so weit oda a ondra charakter und besteh auf ontwoatn, will gewisse sochn hintafrogn und du hättest mi do stehn lossn? i hätt zabrechn dronn kennen, wast wie i man? du kennst mei devise: Niemals menschen mit absicht verletzen. niemals.

dazel ma nit, doss es nit leicht ohne mi is. i was es. dazel ma nit, doss dei entscheidung nit durchdocht woa,  i was es. dazel ma nit, doss du ständig on mi denkst, i was es. dazel ma nit, doss du doch mehr on mir hängst, i was es. i was oba a ans: dei entscheidung, deine konsequenten. i holt mi do hinta. tat i mi jeds mol einesteigan, wenn a mensch aus mein leben geht ohne wirkliche begründung: olta i tat mi nerma im spiagl ondaschaun. i was nit wie des ba dir eigentlich is? na ok des is gemein. weil i steh zu meinen wortn: hauptsoch dia gehts guat. wenns da ohne mi a guat geht, GO ROCKSTAR. (oba ehrlich, a leben ohne laxo is imma zu 77 Prozent unlustiga)

schen, doss es nit leicht fia di is, oba wie gehts wohl mir? oda frogst du di des nit? wenn i nix dafia konn und des anfoch so hinnehmen muss. i soll des ertrogn und donn deaf i ma onhean, wie schod du des findest. wer tats nit schod findn, a gsunde freindschoft in de tonne zu tretn fia.. nix? oba jo is dei entscheidung

i awoat nit mol a ontwoat von dir, weil de ignoranz werd gwinnen. willst ma nochmol sogn doss es schod is? donn zuck i aus. menschen kumen und gehn ins lebn und damit muss man bled gsogt. damit lebn. du konnst nit fia olle olles gebn und i gib holt jemanden, der gehen will, anfoch lei a „pass auf dei herzl auf“ mit aufn weg. und donn guat weg haha.

hob i nit mol sogoa a aussog getätigt, de du bestätigt host: menschen strebn heit noch imma mehr. wollen es beste und schätzen des wos se hom nerma. und donn losst du an da bestn menschn wos man hobn könnte stehn?

i bin schon so miad, doss menschen aus mein leben gehn, weil se glabn, se brauch mi nit. es geht nit imma ums brauchn, sundan ums wolln. oba zu glabn, doss es an bessa geht ohne mi is meistens bullshit. hob i de situation nit jetzt schon zum 4. mol durchglebt, mit verschiedenen menschen? und wieda es selbe spiel: de person kimt hinta mit den worten „es is so schod..“ oba.. wos konn i dafia? kehr du vua deina tia und klär deine themen, i loss ma des sia nit nehmen. wos soll i richtn, wenn i nix geton hob? warum muss i des hern, wenns nit mit mir zu tuan hot.

also an alle, de mal zu wem den kontakt abgebrochen haben, ohne großn grund und des bereuen: jo bereuts es. gerne. oba druckts der person nit anfoch eire feelings noch poa wochn-monaten wieda aufe. weil ihr wissts jo nit, wie es der person grod geht. stellts eich vua de heilt grod so richtig schen ob, des herzl glüht nerma und BAM IHR KEMS UND REISSTS DES AUF. i mogs goa nit, wenn leit so wichtige dinge am handy ma schreiben und i muas donn quasi damit leben, doss se sogn, wie oag i fehl. man konn onruafn „he i wü di segn“ oda schreibn und donn wenn de person sog „na du i brauch di grod nit in mein leben.“ was man bescheid oda de person hert eich e gern zua, oba des is donn nit eia entscheidung. eia entscheidung, so a tolle person gehen hob zu lossn, hobs getroffn. ob ihr do wieda ins leben diafts oda eich ausredn diafts, des entscheidets ihr donn nerma.

HOLY WOA DES JETZT LONG.