Wos, wenn er mi nit will?

Wos, wenn er mi nit will?

24. November 2021 0 Von Laxobu

i tat liagn, wenn i sog vor kurzem is a freindin mit der thematik zu mir kemen. weil de woaheit is: in letzter zeit san anige meiner girl zu mir kemen mit der ongst „Wos is, wenn de person mi nit will?“ und hier meine lieben kimt de antwort.

also kurzfassung: de nina und da nino (kreative namen ausständig) daten sich. also nit doss man des daten nennt. se treffen sich, machen oft was zamm, gehen nachn fuatgehn zamm ham und irgendwie deklariat des e schon jeda als a thing, ausa de zwa natürlich. sie schreiben, daily. teln manchmal und hjo wos soll man sogn. de nina is valiebt. is se. oba sie was nit, ob da nino sie mog. und frogn will se nit. aus angst, doss a ablehnung kimt. is es zfruah onzuredn? is es schon zspot und es is schon lang freindschaft plus sex ohne gefühle? sie is verwirrt.

wos sollt de nina tuan? mut zomkrotzn. jo. sig i a so. sog i ihr a. oft. oba geht nit, laut ihr. weil sie jo ongst hot. dabei hon i do so an guatn spruch im kopf von meiner altn lehrerin:

Du konnst vua nix ongst hobn, wos du nit kennst. lei respekt. ob des donn ongst werd, konnst donn entscheidn. oba zerst gehst do mol ohne panik eine. 

sprich: de nina soll sich vuabereitn, worte zrecht legn und donn anfoch onfgongen. „Hey du. kurze frage..“ na moment! de nina zag schon wieda auf.

„wos wenn er mi nit will??? donn bin i am boden zerstört. i will doss es guat ausgeht.“

ok. kurz durchatmen. du willst, dass es guat ausgeht? spoiler: ES WIRD SO ODER SO GUAT AUSGEHEN. wos i schon wieder red, frogst du di? Lies weiter, liebes wesen:

de situation hot zwa (realistische) ausgänge.
1. er mog sie. sie kemen zamm und pipapo.

2. er mog sie nit. es is aus.

natürlich tatets olle glei sogn, variante ans is positiv, de zweite negativ. oba i sog, es san bade gleichwertig. gleich positiv oda neutral zu segn. warum?

najo, wenn da nino de nina gehen losst, is se nerma in dem gspusi-hinundher gefangen. sie valiat jo nix, ausa den guatn sex. weil sicherheit? hot er ihr kane gebn. a wenn se sich sicherheit eingredet hat, woa des a temporäre, so long wie holt nagellack holtet, genau a nummer/event lang. sprich: sie findet wieder stabilität im leben, ohne ihn. weil wenn er geht, hot se de gewissheit, doss er nerma do is. kann damit abschließen und ankemen. zu sich. und wos is, wenn sie kurz drauf DEN Menschen trifft und den heiratet? wir wern donn in da drittn reihe stehen und se onfeian. und hom gwusst, warum damals der 2. ausgang a positiv woa.

natürlich was i, doss zerst amal so a trennung, de jo ka trennung is, schiach is. oba langfristig und es leben is schen langfristig gsegn: is des genauso a positiver ausgang. weil de nina gewissheit hot, weil de nina ihre augen wieda aufs wesentliche legt und des is fix ka monn, der nit was wos er on ihr hot und sie lei sonntagabends im bett hoben will oda am mittwoch noch training. so kann man theoretisch jede trennung segn, realistisch is es trotzdem voller tränen, erinnerungen und liebeskummer. oba danach gehts richtig schen ob.

also: sprechts eire gspusis on, wos es is. seids erleichtert, wenn ihr klarheit habs. feierts es, wenns positiv ausgeht und gehts mit stolz weiter, wenn de person zbled is, eich wirklich und vollkommen zu ham.

des seids nit alan damit. wir holtn zamm. ihr > de welt.