Oft amol
Oft mag i nit stark sein und so tuan als wär olles happypeppy.
Oft mag i nit lachen, nur weil es andre irgendwie angenehmer is, weil jo a grantiges gsichtl zagn kennt, doss grod on der situation nit olles richtig is.
Oft mag i nit mi selber aklean müssen, warum mi jetzt genau de aussage so hart trifft. reichts nit, wenn do is in mein herzln a stich? es sollte ja drum gehn, wie dei gegenüber deine worte aufnimmt und nit wie du se vastehst und manst.
Oft mag i nit zwischen vielen menschen stehn, de jedes mol woatn, bis de toge vagehn, um dann anfoch lei im club zu stehn. i mag nit dann so viel trinkn „miasn“, bis mei herzl rast und i nerma gonz genau was, wie i has oda wo hin i kehr oda wos mei herzl is wert.
Oft mag i nit hoffen und warten, auf menschen, doss de sich so vaholtn, wie i es gern hätt. oft is mei geduldsfaden dünn und des zu recht. i muas fia niemanden auf der welt auf was verzichten, lei weil de person mant wichtig zu sein. i muas mi nit verletzten lassen, damits ana ondan person guat geht. i muas nit a schachfigur in an spiel sein, des i nit amal spielen will.
Oft mag i ma nit sorgen um andre machen, weil de sich imma wieda selber in de scheiße reitn. natürlich bin i fia meine liebsten da, aber nit von tag zu tag und immer des gleich hin und her und tarra. wie kann man denn bitte auf wen andren schaugn, wenn man selbst grod nit auf sich selba acht geben kann? wieso valongt man des und wieso is selbstliebe so was arrogantes? es is doch viel arroganter, wenn man mit menschen spielt und es ausnutzt, doss se sich sorgen machen.
Oft mag i nit diskutian, wenns in meinen augen kan grund gibt. wieso muas i mi rechtfertigen für die länge meines rockes? wieso muas i ana fremden person dazelen, wieso i meine entscheidungen so triff, wie i es tua? wieso is a „i fühl mi heit nit guat“ oder „mei psychische gesundheit is ma wichtiger“ ka absagegrund gnuag? wieso intressiats de leit, ob se davua laut na gsog hot oda nit. wieso is de herkunft von manchen ach so wichtig und oft is des, worüber man e nit spricht.
So, wie oft hast du di jetzt selbst in den zeilen erwischt, als hättest du se selber geschrieben? wie oft wirst du noch denken „ab morgen lass i des nerma mit mir machen. ab morgen bin i stärker, mutiger und zag mehr selbstliebe.“ wieso nit glei? was is schon dabei.
Du > de welt. fia imma.