hätt i lei gwusst

hätt i lei gwusst

21. April 2021 0 Von Laxobu

herzltext. der tausendsmillionste. über freindschoft und doss man schätzen soll wos man hot. solongs do is. sunst tuats weh.

hätt i lei gwusst, doss i di nerma so schnell in meine oam hobn konn.
hätt i lei gwusst, doss de letzte umoamung echt a joa her sein werd.
hätt i lei gwusst, doss des „beim nächsten mol zohl donn i“ de letzn 2 joa offen bleibt.
hätt i lei gwusst, doss i da mol so noh woa und des nit so gschätzt hob, wie i hätt solln.

jetzt bist fuat. nit wirklich fuat fuat. oba holt nerma do. nerma bei mir.

anfoch wo ondas, wo ondas wo i nit bin. und nit sein will. und i glab, du wüst es selba a nit.
i finds holt oag, wie bled naiv wir woan. bade. du genauso wie i.

wir hom gmant, wir sein anfoch freinde. de sich megn und hobn.
Oba wie oag wir uns eigentlich brauchn, woa uns nie kloa.
da wöchentliche kaffee, de gemeinsamen autofoatn und de wahnsinnig witzign ausgehaktionen- wir hom de mehr gebraucht, ols uns kloa woa.
du woast a konstante in mein lebn, i in dein. oba kitschlos.

i vasteh jedn, der in de social media welt fotos mit seine freinde schmeißt.
hashtags #besties #friendsforever verwenden.
des is nit dumm, des is nit kindisch. des is wichtig.
i hätt gern a foto mit dir, oda zwa. auf de i hinta schaugn konn.
und ma sog: wir woan so close. wir woan glücklich.
du, i sig mei strohln in de augn nit, des i ghobt hob, wenn ma banond woan.
wir hom kane videos, wo i di überroscht hon.
i trog des zwoa in mein kepfln und herzln mit, oba des vaschwindet holt irgendwonn.
so wie du aus mein lebn.

mein oltn i tat i so gern sogn:
Bleib bei der person.
vazicht auf des date, welches scheiße lafn wird.
geh nit fuat, wenn de person liaba daham chün wü mit dir.
und bleib so long es geht. sog nit um 21 uhr, doss de gehst.
konnst a bis 3e am bett huckn bleibn.
du, larissa, hos deine gonzn chancen vabaut und vaschossn.
de zeit de du ghobt hättest mit der person, is aufgebraucht.
kimmt nerma hinta. und du host es nit gschätzt.

deshalb is es heit umsowichtiga zu sogn und wissn:
zeit is vergänglich.
Menschen bleiben nit fia ima do.
de leit, de ihr liebs, kern geliebt. offen, ehrlich und oft.
schreibs senen.
ruafts on.
tuats wos.
nix tuan, und donn hätte hätte fahradkette. tuat anfoch lei weh.
scheiß weh.