Das langersehnte lifeupdate
Ok, vielleicht is de überschrift a bisi a clickbait, oba wenn du do bist: hallo, schen doss du des grod liesest 🙂 I bin de larissa (wos du wohl vermutlich wast) und i update di jetzt a bisi über mei leben. wenn de wills. i liefer da a bisi inspo, wenn de willst. 😚wast du wo i grod sitz? ok, wie sollst du des a wissn.. IN MEIN NEICHN LESESTUHL. bin so fertig. am samstag abend hama de wichtige entscheidung getroffn. und bevor du da jetzt schon de augn vadrahst, lies bitte weita. i bin in gewissen dingen so a kopfmensch, wobei i eigentlich fia meine herzlentscheidungen bekonnt bin. i wollt mit 10 joan den schminktisch vom ikea hom, wo i nit amol gwusst hon, wos a eyeliner is. und mit 17 joan zu weihnochtn hotn ma mei papa aka es christkindl den gschenkt. i hob 7 joa gwoatet. warum? weil wenn i den so long will, will i ihn fia imma. und jetzt in da neien wohnung passt er perfekt eine. es gleiche mit dem stuhl- wir redn hier von 200 euro ohne den hocker (den hol i ma vermutlich oba noch). 200 euro für a möbelstück, des kan mehrzweck hat: lei fia mi. zum lesn, oabeitn, bloggn, netflixen… nehms ma des nit bes, oba i vasteh nit, wie man den „anfoch so“ kafn konn. i man des is schon a investition. wenn i in dem nit drinn sitz, brauch i den nit. seitdem i 15 bin, will i den. so sehr. und jetzt mit 23 joa olt bin- hab i ihn mir gegönnt. mit gonzn herzn. und mei firmpatin hat ihn ma noch zur hälfte gezahlt (bin ihr dafia genauso donkboa wie fia olles ondre ❤️). oh gott wie vü konn a mensch über an lesestuhl schreiben??? ob mir tränen kemen sein, wie er fertiga do gstondn is? oba sowos von!
notiz am rande: des is mei blog. mei spielwiese. mei kreative fläche. niemand, echt niemand, konn ma de worte do nehmen niemond konn sogn „schreib des nit“. natürlich darf man kritik ausüben (beleidigungen sein ka kritik, btw). oba i werd hier meiner meinung ima mehr raum gebn als meinung anderer. is jo kloa? i man i erwähn jo e imma „i denk ma“ „in meine augen“. nur weil i schreib „tomaten sein grausig!“ hast es nit, doss ihr olle kane tomaten mehr megn diafts. meine worte sein ka gesetz. mei meinung is mei meinung, muss nit deine sein. also nimm nit olles persönlich & aklea mir nit, doss auf mein blog zu viel mei meinung is. i man alan mit der DM hast da schon alles selbst beantwortet. mei blog. mei meinung.
Und noch schnell: Danke, doss du so oft auf mein blog gehst und di durch meine über 200 blogpost durchstöberst. es is so schen. des motiviert mi. ohne di? tat i nit schreiben. danke danke danke.
de letzn wochn woan härter als gedocht. 2021 is schon a ungustl a bisi oda? i man es wetter.. i vazeih es a bisi. oba letzte woche woa so BRRRRR-kolt, do bin i ausn BRRRRR sogn nerma ausakemen. i man hallo. najo, der katzen-zwischenfall hat mi aus da bahn gworfen. sehr. und deshalb such i jetzt wieder mehr halt: vertief mi fest in mei oabeit, lies mehr, verlier mi erneut in greys anatomie und versuch in der partnerschaft noch mehr zu gebn. mehr geben geht imma btw. unsa wohnung hama auf besseren stand gebracht, es fehlen jetzt nur noch kleinigkeiten. und nägel für de bilder. oba i hab echt gmerkt, in schlechten zeiten braucht man nur: verdammt guate freinde & sich selber. und des hob i ghobt und bin noch dankbarer als dafua dafia ❤️
i werd jetzt wieda a 4-wochen-programm mit da leonie starten. WUHU. weil i echt eingestehen muss, sport tuat ma so guat. und irgendwie muss i mei neie myprotein-bestellung rechtfertigen… Oba mei körpergefühl woa noch nie bessa als jetzt. gott sei donk hob i letzten november mit ihr ongfongen, des woa schon a bisi a rettung fia mi (und mein ruckn).
mei nest am kopf wos man hoa nennt mocht ma zu schoffn. irgendwie is mei hoastruktur jetzt wellig nerma so mega glatt wie damals. und des stresst mi. weil i soll de nerma kampln sogn olle. und wos wü i ? KAMPLN. btw versuch i mi grad an naturkosmetik und merk leider, doss i sooooo nit gut drauf reagier. de geplante kooperation werd i absagen, weil i sowos nit verantworten kann. generell muss i mi imma wieda über kolleg*innen aufregen, de anfoch unseriös handeln.
olles, wos i do aufn blog und insta bewirb: i steh dahinta. hinta jedn öl, shampoo, rezept, uhr.. a wenn i nit bezahlt greg sundan es eich anfoch so zag: i zag lei wos, wos i geil find. zum beispiel unser klopapier woa letztens so a müll, des zag i eich nit. oba mein backofenreiniger- DER IS LEBEN. und i wü, doss ihr ma des glabs. ehrlich. mi kotzt des an, wenn wer mit 0815 rabattcodes von firmen kimt, wo jeda schon was, de produkte sein schrott. de leit donn „i hob es packl ausgepackt, teste es erst OBA ihr kennts jetzt schon mit mein code kafn (wo i provision greg)!“ und donn de woche drauf blosn se olles ob und de leit sitzn mitn kaputten lippen, durchsichtigen leggings und weniger geld daham. WOS SOLL DES.
I probia dir so vü ehrlichkeit wie es geht hier zagn. i post so viele filterlose fotos. i schreib meine gefühle, egal ob happypeppy oda eben traurig, nieda. i teil es eich mit. warum? weil i ka influencerin bin, sundan a sinnfluencerin. i bin ehrlich, mei content soll SINN machen fia eich. natürlich ob und zua red i über beauty oda schmuck, wos vielleicht bisi sinnbefreiter is, oba es sein leidenschaften von mir. wissts wie i man? oba i will, doss ihr meine stories schaugs und nit denkts „de hot a geiles leben, i bin neidig“ sundan „danke, doss du ma zagst, doss es leben nit imma anfoch is. danke, doss du ma zagst, doss es ok is. danke doss du über beziehungsprobleme, sex und feminismus redest“ i wü fia di, eich, uns do sein. nit um firmen a gratis plattform zu bieten oder mir selber wos zu beweisen.
Des schreiben do tuat ma guat, sowos von guat. und eich gibs jo a wos. und eichre worte dazua tuan mir wieder schen. deshalb. wir zamm. ❤️