es is egoistisch

es is egoistisch

14. März 2021 3 Von Laxobu

es gibt gefühle, de wir fühlen- oba im nochhinein uns denkn „es woa nit fair von mir selba“. und des tipp i nieda.

nach langem hin und her, auf und ob und noch amol hin und her hot sich de lisa entschlossn, es bleibn zu lossn.
drei joa beziehung sein vorbei. 
sie sog ihrn boy goodbye. 

Es is bessa so. vü bessa.
sie was, es leben geht weita.
blockiat ihn, weil es ihr nit guat tuat.
seine armseligen versuche, es guat zu mochn.
wos er de letzn 36 monat nit gschofft hot.

lisa hot obgschlossn.
hot ihr „große“ liebe obgschossn.
es is bessa, so vü bessa.

doch donn, noch a poa wochn kims gefühl.
vom vamissn.
des fühlt sich so richtig… gschissn.
on. gefühl, de weg woan, sein wieda do.

deaf se ihn schreibn?
nochn drittn glasl wein?
mittn in da nocht um dreie,
wenn se ham geht alan. 
weil wos ihr jetzt auffollt:
er woa doch irgendwie ihr daham.

deaf se sogn, doss er fallt?
in da freindesrunde von senen.
doss ihm imma ihr gonza respekt gallt?
weil sei charakter gold wert woa?

wenn er ihre nachrichten ignoriert,
wird se grantig. 
sie woa mol olles fia ihn und jetzt?
is er es sich zfein dafia, ihr zu antworten. 
wos is bitte aus dem traumkerl woan?

sie vamisst ihn,
will ihn wieda.
und er tuat so, als wär es zspot?

ihn zu vamissn und ihm des zu sogn,
und ihn glott aufzutrogn,
doss er des gefühlschaos erwidern muas.
is so folsch. 
es is so folsch.

wenn se sich depat vuakimmt,
schiabt sie es aufn alk von gestan.
sowie se dafua olles auf ihn gschobn hot.
jedn streit, jeden fehler, jede mood,

sie will wissn, wovon er tramt.
wie es sein opa geht und wen er jetzt so täglich schreibt.
sie wü nämlich heimlich, doss er allein bleibt.
recht hot se kans,
oba sie nimmt es sich.

wochenlang hot se ihn trauern lossn,
im leeren lossn.
in trümmern der beziehung.
und kimt donn anfoch daher mit:
Wos treibst? wie gehts da?
I bin gern wieda bei dir.

Merkt sie nit?
wie egoistisch des is?

Es is nit lei de lisa, es is a de melanie, theresa, da nico, da martin oda da johannes. es sein olle. viele. nit olle, sorry. oba viele leit gehn und „schliasn ob“ in drei vier tog. gehn wieda fuat, auf de jagd- schmusn blind uma, daten jedn schas. und „es geht senen guat“ und donn daweil de ondre seitn leidet und trauert und sich selber suacht, kimt de person wieda hinta. doch nit olles so guat oda? wer von sich selber behauptet, er losst schnell a langjährige beziehung hinta sich- kennt sich selba noch nit. do steckn gefühle, zeit, arbeit und olles drinnen. des als schnell abgearbeitet zu empfinden, is fraglich. und es is SO SCHEISS EGOISTISCH. so egoistisch, jemanden anderne zu verletzen. natürlich i sog e imma: ihr > de welt. oba wen zu valetzn, weil es eich bessa geht und eich donn wieda umzustimmen: is a no-go. ehrlich. wenn ihr wen gehen lossts, lossts des a donn sein. imma hinta lafn, aufs neie de wundn aufreisn und hoffnungen mochn, do gibs karmapunkte. am schlimmstn sein de bsoffenen texter de am nächsten tag sich schämen und donn wieda stille herrscht. oda donn wieda im bett landen und donn sogn „na doch nit!“ wer geht, hot an grund. natürlich kann man sich mal irren. oba ondre leit damit zu verwirren- tuats des nit.

Es is egoistisch zu awoatn, doss de leit eich wieda ins herzl lossn, olles mochn lossn. es is egoistisch zu glabn, de person werd imma auf eich woatn und deaf nit glücklich ohne eich wern. es is egoistisch zu leben und donn zruck zu gehn und sich wundan, warum de ondre person goa nerma verliebt is oda wen ondan gfundn hot. es is egoistisch sich selbst als so geil/ besonders/ wertvoll zu segn, doss man selber über leichen von gefühlen der andere gehen darf.

Kuss.